Kɛkolu 2 - Ala Ya Salatikan Kula Kitabu

Nii Sɛnɛyanin ka jii limaniyamɔɔlu kɔkan teme

¹ Tele Biloolunanlon selilon senin, limaniyamɔɔ bɛ k'ai ladɛn dingila kelen nɔ.

² Ado mangan dɔ vɛ bɔla sanma telemanin iwo fɔɲɛ ba dɛgbɛ, ka bon lafa, ai tɛɛ siinin min kɔnɔ.

³ Ai ka fen dɔlu ye mɔɔ nɛɛ sawula lɔ, minu kɛnin tɛɛ iwo taamɛnɛn. Wolu vɛ jɛzɛnna ka jii ai kelenkelenna bɛ kɔkan.

⁴ Ai bɛ josola ka fa Nii Sɛnɛyanin la, ai do ka kuma damina kan gbɛlɛlu lɔ iwo Nii Sɛnɛyanin ka see di ai ma teme.

⁵ Wo k'a talan, Jahudiya siyama jiyanin tɛɛ Jelusalɛmu, minu tɛɛ Alaɲasiyanɲɛmɔɔlu le ka bɔ dunuɲa jamana bɛ lɔ.

⁶ Mangan wo bɔnin, jama ba k'i ladɛn ka kawakoya, kamasɔlɔn ai kelenkelenna bɛ tɛɛ limaniyamɔɔlu kan mɛnna ai balakannu lɔ.

⁷ Ai ka kawakoya fɔɔ k'ai kɔnɔlɔfili, ai do vɛɛ i ɲɔɔ yɛ: «Mɔɔ minu yi kumala yi ne, ai bɛ yi Galileka le le, kɛlɛ?

⁸ A yi di wo lɔ, mɔ kelenkelenna bɛ yi mɔ balakan mɛnna ai da?

⁹ Paatiyankalu yi jama min nɔ, ani Medekalu ni Elamukalu ni Mesopotamikalu ni Judekalu ni Kapadɔsiyakalu ni Pɔndukalu ni Esiyakalu

¹⁰ ni Filigiyakalu ni Panfilikalu ni Misilankalu ni Libiyakalu ka bɔ Silɛni fan nɔ. Ado lonalu yi jama min nɔ ka bɔ Lɔmu so kɔnɔ,

¹¹ Jahudiya bɛlɛbɛlɛlu ani siboloma gbɛlɛ mɔɔ tubeninnu. Kɛlɛtɛkalu ni Alabulu fana yi jan. M'ai kan mɛnna yi ne, ai vɛ Ala kɛko makawaninnu lasena mɔ balakannu lɔ!»

¹² Ai bɛ ka kawakoya fɔɔ k'ai kɔnɔlɔfili. Ai do v'i ɲɔɔ maɲiningala, ai vɛɛ: «Min kɔlɔ yi mindɛ le?»

¹³ Kɛɛ a dɔlu tɛɛ jɛlɛbɔla ai lɔ, ai vɛɛ: «Gbɛ le y'ai la!»

Piyɛli ka mɔɔlu kawani teme

¹⁴ Wo lɔ, Piyɛli lɔnin ka to a keladenɲɔɔ mɔɔ tan ni kelen (11) dafɛ, a k'a kan labɔ k'a fɔ jama yɛ, a vɛɛ: «Àilu ǹ Jahudiyaɲɔɔlu ani Jelusalɛmukalu bɛ, ài y'ài tolomalɔ ǹ kumakan na ka ko min lɔn.

¹⁵ Gbɛ tɛ mɔɔ minu la iwo a ài miliya lɔ teme. Siintele waate le min ne bene!

¹⁶ Mafɔ, ko min sɛvɛnin kitabu kɔnɔ Nabi Jowɛli bolo, wo le yi kɛla yi ne. A sɛvɛnin ko:

¹⁷ ‹Ala vɛɛ: Dunuɲa laban waate, ǹ kɛtɔ ǹ Nii Sɛnɛyanin lajiila adamaden bɛ kɔkan. Ài denkɛlu ni ài denmosolu kɛtɔ kelaya kɛla. Ǹ kɛtɔ ko dɔlu lajɛlɛla àiya kavelennu ɲa ma, ani àiya kɛmɔbalu kɛtɔ kolu yena siwolu lɔ.

¹⁸ Lon wolu lɔ, ǹ kɛtɔ ǹ Nii Sɛnɛyanin lajiila ǹa jɔnnu kɔkan, kɛ́lu ni mosolu, ai do kɛtɔ kelaya kɛla.

¹⁹ Ǹ kɛtɔ kawanankolu kɛla sangbolo lɔ, ka tɔɔmaselu kɛ duukolo kɔkan, minu kɛtɔ jeli ni taa ni sisi kulu ba le.

²⁰ Tele jɛlɛmantɔ ka kɛ divi le, kalo do wulɛntɔ iwo jeli. Wo bɛ kɛtɔle jani mɔ Tii ya lonba makawanin yi se.

²¹ Ado ni mɔɔ mɔɔ ka madaili kɛ mɔ Tii tɔɔ lɔ, wo tii yi kisile.› »

²² Piyɛli vɛɛ kɔtunun: «Àilu Bani Isilankalu, ài y'ài tolomalɔ ǹ kumakan na. Isa Nazalɛtika tɛɛ mɔɔ le le, min tɛɛ kawanankolu ni ko makawaninnu ni tɔɔmaselu kɛla ài tɛma Ala ya seetiiya lɔ k'a lagbɛ ài yɛ ko Ala na diɲala ale le ma, iwo àilu gbu k'a lɔn teme.

²³ Kɛɛ ka bɛn Ala ya latɛɛ ni lɔnni ma, ài k'a mina k'a don koyonkɛbalu bolo, fɔsa ài y'a gbaan kɔlɔman ma ka faa.

²⁴ Kɛɛ Ala ka a lawuli ka bɔ saya lɔ, k'a lafɛlɛ ka bɔ saya fanga kɔlɔ, kamasɔlɔn saya tɛɛ tɛ se nɔ sɔlɔnna a ma.

²⁵ Kamasɔlɔn Nabi Dawuda ka Isa ya ko sɛvɛ Zabuli kɔnɔ, a vɛɛ: ‹Ǹ tɛɛ ǹ Tii yena ǹ ɲakɔlɔ waate bɛ, kamasɔlɔn a yi m̀ bolokini fannɔ, fɔsa ǹ joso la kana maamaa.

²⁶ Wo le y'a ma, ǹ kɔnɔlɔdiyayine, ani ǹ da yi sawakan ne fɔla. Hali fen sata ka kɛ ǹ ne, kɛɛ ǹ kɛtɔ ǹ nɔningɛla jeisii lɔ.

²⁷ Kamasɔlɔn i tɛnala ǹ nii tola sulu tɛma, niwotɛ ka diɲa iya Mɔɔ Sɛnɛyanin fuleni yi tolin kabulu kɔnɔ.

²⁸ I vɛ ǹ lalɔnni iya niimaya siyalu la, i do kɛtɔ ǹ lasawala i ɲakɔlɔ.› »

²⁹ Piyɛli vɛɛ kɔtunun: «M̀ badenmalu, fɔ ǹ'i mɔ bema Dawuda ya ko fɔ ài yɛ k'a lagbɛ. Ǹ ko, a na sala, ai do na a su doonna. Hali bi a kabulu yi mɔ fɛlɔ jan.

³⁰ Kɛɛ kela le tɛɛ a le, min tɛɛ k'a lɔn ko Ala na lahedi min tala a yɛ, k'a kalin ko a kɛtɔ a bɔzɔn dɔ lasiila aa masayasiifen nɔ a kɔ.

³¹ Nabi Dawuda ka Masa Tɔɔmasenin lawuliko natɔ ye, a do ka kuma ka bɛn a ma, a vɛɛ: ‹A ma to sulu tɛma, a do fuleni ma tolin kabulu kɔnɔ.›

³² «Ala na Isa wo le lawulila ka bɔ saya lɔ. Ǹu gbu yi min sele le.

³³ Komi ale Isa kɔlɔtanin k'a sii Ala bolokini fannɔ, ani a Fa na lahedi tala a yɛ ka bɛn Nii Sɛnɛyanin ma, wo lɔ, a na ko minu lajiila, ài ɲa yi minu la yi ne ani ài tolomalɔnin minu ma yi ne.

³⁴ Kamasɔlɔn Nabi Dawuda kɔlɔ tɛɛ ma ta ka jɛlɛ sangbolo lɔ, kɛɛ ale gbu k'a sɛvɛ ko: ‹Mɔ Tii n'a fɔla ǹ Tii yɛ, a vɛɛ: «Na i sii m̀ bolokini fannɔ,

³⁵ fɔɔ m̀'ɛ banna i juulu lala i sen kɔlɔ.» ›

³⁶ «Bani Isilankalu bɛ y'a lɔn bɛlɛbɛlɛ kɛ ko Isa min gbaannin tɛɛ kɔlɔman ma ài bolo, Ala v'a kɛ mɔ Tii le ani Masa Tɔɔmasenin.»

³⁷ Jama ka wo mɛn mingɛ, kuma wo ka don ai josokun nɔ kosɛvɛ. Ai k'a fɔ Piyɛli ni keladen tɔlu yɛ, ai vɛɛ: «Mɔ badenmalu, m'a kɛ di vɛ wo lɔ?»

³⁸ Piyɛli do vɛɛ ai yɛ: «Ài y'ài dajoo mafalin, ado ài kelenkelenna bɛ yi makoli sɔlɔn Masa Tɔɔmasenin Isa tɔɔ lɔ, fɔsa àiya julumbulu lɔ yi koto. Wo vɛ kɛla, ài kɛtɔ Ala ya sɔli sɔlɔnna, min kɛnin Nii Sɛnɛyanin ne.

³⁹ A na wo le lahedi tala àilu ni ài dennu yɛ, ani mɔɔ minu yi dingila majaannu lɔ, mɔ Tii Ala kɛtɔ minu bɛ kilila ka na a ma.»

⁴⁰ Piyɛli ka kuma siyama la wo kɔkan ka to ai lalila, a vɛɛ: «Ài y'ài jɛlɛ lakisi ka bɔ jangata ma min natɔ bi mɔɔ yonnu kanma!»

⁴¹ Mɔɔ minu k'ai bolo sii a kumakan kɔlɔ, ai ka wolu mako ji kɔlɔ. Ado mɔɔ waa sawa (3 000) jate ka kafon limaniyamɔɔlu kɔkan wo lon.

Limaniyajama kunfɔlɔ

⁴² Limaniyamɔɔlu k'ai sɛmɛdon kalan ma keladennu fɛ, ani ka ladɛn kɛ i ɲɔɔ fɛ iwo badenmalu, ani ka kɛ bulu lɔtalale i ɲɔɔ wotɛ, ani ka Ala dali i ɲɔɔ fɛ.

⁴³ Siyan ka don mɔɔ bɛ lɔ, kamasɔlɔn keladennu tɛɛ kawananko ni tɔɔmase siyama kɛla.

⁴⁴ Limaniyamɔɔlu bɛ bɛnnin tɛɛ a lɔ, ka dɛn i ɲɔɔ bolofennu la.

⁴⁵ Ai do tɛɛ aiya duulu ni ai bolofennu felela ka wɔli wo lɔtala i ɲɔɔ wotɛ, ka bɛn ai kelenkelenna bɛ mako jate ma.

⁴⁶ Lon lon, ai deinin tɛɛ ai ladɛnna lɔhɔlɔmabonba luu kɔnɔ, ka kɛ bulu lɔtalale i ɲɔɔ wotɛ aiya bonnu la, ani k'i ɲɔɔ sɔ sawa ni josolɔgbɛya boloma.

⁴⁷ Ai tɛɛ Ala tanula waate bɛ, ai do kokɛɲa tɛɛ mɔɔ bɛ josolajiila. Lon lon, mɔ Tii tɛɛ mɔɔlu lakisila k'ai bɔ aiya julumbulu lɔ, ka wolu kafon mɔɔ lakisininnu kɔkan.