Kɛkolu 19 - Ala Ya Salatikan Kula Kitabu

Pɔli ka Samakan Kein lase Ɛfɛsi teme

¹ Apolosi tɛɛ Kolɛnti waate min nɔ, Pɔli ka Esiya koovi lɔtimin ka taa se Ɛfɛsi so kɔnɔ. A do ka limaniyamɔɔ dɔlu ye je,

² ka wolu maɲininga, a vɛɛ: «Ài na limaniyala waate min nɔ, jalasa Nii Sɛnɛyanin na jiila ài kɔkan?» Ai ka Pɔli javi, ai vɛɛ: «Ɛnɛn, kaipa mɔ ma Nii Sɛnɛyanin ko mɛn ba bene.»

³ Pɔli do k'ai maɲininga, a vɛɛ: «Ài na makoli suu mindɛ le sɔlɔnna wo lɔ?» Ai vɛɛ: «Yaya ya makoli suu.»

⁴ Pɔli do vɛɛ ai yɛ: «Yaya tɛɛ mɔɔlu makola ji kɔlɔ ka bɛn ai dajoo mafalinko ma, a v'a fɔla ko mɔɔ min natɔ a kɔ, min taanin kɛla Isa le, ai yi limaniya wo ma.»

⁵ Wo mɛn ai bolo, ai ka makoli sɔlɔn mɔ Tii Isa tɔɔ lɔ.

⁶ Pɔli k'a bolo la ai kɔkan mingɛ, Nii Sɛnɛyanin ka jii ai kɔkan. Ai do ka kuma damina kan gbɛlɛlu lɔ ani ka kelaya kɛ.

⁷ Kɛ́ wolu bɛ lakafonnin tɛɛ mɔɔ tan ni fila (12) jate le le.

⁸ Kalo sawa kɔlɔ, Pɔli tɛɛ taala Aladalibon na ka kuma mɔɔlu fɛ josolagbeleya boloma, k'i lɔja k'ai lakunfa Ala ya masaya ma.

⁹ Kɛɛ a dɔlu kunnɔ ka gbeleya ka to limaniyabaliya lɔ, ka kuma yon fɔ Isa ya siya ma jama ɲakɔlɔ. Wo lɔ, Pɔli ka bɔ ai fɛ, ka taa Isa kɔbiladennu le Tilanusi ya kalankɛbon na, ka to ai kalanna je lon bɛ.

¹⁰ A do ka to wo la san fila kɔlɔ, haan fɔɔ Esiya duulen bɛ ka mɔ Tii kumakan mɛn, Jahudiya ni Gɛlɛkika bɛ.

¹¹ Ado Ala tɛɛ kawananko ba siyama kɛla Pɔli fɛ.

¹² Hali Pɔli ya ɲalɔtɛɛfaani ni aa baalekɛfaanilu, a tɛɛ vɛ minu bila a ma, ai tɛɛ taala wolu le jangalotɔlu fɛ, ado wolu ya jangalolu tɛɛ basila, ani jinajuulu tɛɛ bɔla jinatɔlu lɔ.

¹³ Jahudiya timintiminkɛba dɔlu tɛɛ je, minu tɛɛ jinalu gbɛnna mɔɔlu lɔ. Lon dɔ, wolu ka jinajuulu gbɛnko lɔsuma ka bɔ mɔɔlu lɔ mɔ Tii Isa tɔɔ lɔ, ai v'a fɔla ai yɛ: «M'ài jamalila Isa tɔɔ le lɔ, Pɔli yi min ya ko lasena!»

¹⁴ Jahudiyalu ya salakalase kuntiiba min tɔɔ tɛɛ ko Sekeva, wo denkɛ wolowulan ne tɛɛ wo kɛla.

¹⁵ Kɛɛ wo fɔ ai bolo, jinajuu dɔ vɛɛ ai yɛ: «Ǹ ka Isa lɔn. Ǹe do yi Pɔli ya ko kalama. Àilu do? Jene y'ài le?»

¹⁶ Wo fɔ, jinatɔ k'i kɛ ai kan ka fanga sɔlɔn ai bɛ ma. Ai do vɛ bɔlila ka bɔ bon na, ai falimakolon ni ai madiminnin ne.

¹⁷ Wo mɛn Jahudiyalu ni Gɛlɛkikalu bolo Ɛfɛsi so kɔnɔ, ai bɛ ka siyan kosɛvɛ, ado mɔ Tii Isa tɔɔ ka magbiliyali sɔlɔn.

¹⁸ Mɔɔ minu tɛɛ vɛ limaniya, wolu siyama ka na k'ai dalabɔ ai kɛkolu ma.

¹⁹ Mɔɔ minu tɛɛ wɔimaya kɛla, wolu siyama ka na aiya wɔimaya sɛvɛlu le ka wolu ɲɛnin jama ɲakɔlɔ. Sɛvɛ wolu sɔɔn bɛ lakunnin ka bɛn wɔligbɛ gbana waa biloolu (50 000) jate le ma.

²⁰ Wo boloɲa ma, mɔ Tii kumakan ka to jɛzɛnna ka fanga sɔlɔn.

Ɛfɛsikalu ka mulutu teme

²¹ Ko wolu bɛ timinnin, Pɔli k'a latɛɛ ko a yi Maseduwani ni Akayi koovilu lɔtimin ka taa Jelusalɛmu. A do vɛɛ: «M̀'ɛ sena Jelusalɛmu, wo kɔ, fɔ ǹ'i se Lɔmu fana.»

²² Wo ma, a ka a madɛmɛnba fila lataa a ɲa Maseduwani, minu taanin kɛla Timote ni Elasitusi le. Ale gbu ka to Esiya koovi lɔ waateni kɔlɔ.

²³ Wo waate lɔ, so la ka maamaa bakɛ ka bɛn Isa ya siya ma.

²⁴ Siyaki dɔ tɛɛ je, min tɔɔ tɛɛ ko Demetiliyusi. Aiya joomoso min tɔɔ tɛɛ ko Aatemesi, a tɛɛ wo ya batobon sawulalu ladanna wɔligbɛ le le. Demetiliyusi ni a baaledenɲɔɔlu tɛɛ tɔnɔ ba le sɔlɔnna baale wo lɔ.

²⁵ Lon dɔ, a ka a baaledenɲɔɔlu ladɛn, ani minu tɛɛ baale suu wo kɛla. A do vɛɛ ai yɛ: «Kɛ́lu, ài k'a lɔn m'i tɔnɔ ba le sɔlɔnna baale min nɔ.

²⁶ Àilu gbu v'a ye ani k'a mɛn Pɔli yi min fɔla, ko joo minu ladannin mɔɔlu bolo, ko wolu tɛ foi le. Kuma wo vɛ mɔɔ siyama lɔ aiya joo bilako la Ɛfɛsi so kɔnɔ jan, ani faida Esiya koovi fan bɛ lɔ.

²⁷ Wo kɛtɔ kɛla sabu le ka maa baale magbeya, ani fana ka maa joomoso Aatemesi batobon lafeya, ani ka ale gbu dalaya majii, ale min yi batola mɔɔlu bolo Esiya ni dunuɲa fan bɛ lɔ.»

²⁸ Jama ka wo mɛn mingɛ, ai k'ai josolakuna bubale ka gbanɔ damina, ai vɛɛ: «Ɛfɛsikalu ya joomoso Aatemesi buɲayine!»

²⁹ Wɔyɔkan wo ka so fan bɛ lamaamaa. Pɔli taamaɲɔɔ fila minu tɛɛ Gayusi ni Alisitakusi le ka bɔ Maseduwani, jama k'i kɛ wolu kan telemanin k'ai fɔnfɔn ka taa ai le so ladɛnkɛya lɔ.

³⁰ Pɔli gbu tɛɛ a fɛ k'a jɛlɛ jiya jama la, kɛɛ Isa kɔbiladennu k'a dansii.

³¹ Esiya koovi ɲamɔɔ dɔlu fana tɛɛ je, minu tɛɛ Pɔli tɔvalu le. Wolu ka samakan lataa a ma k'a madiya ko a kà taa ladɛnkɛya lɔ.

³² Wo waate, wɔyɔkan ba tɛɛ bɔla ladɛnkɛya lɔ, bɛ tɛɛ ai ta fɔla. Ai siyama tɛɛ ma aiya ladɛn kun lɔn.

³³ Komi Jahudiyalu tɛɛ vɛ Alɛzandele lalɔ jama ɲakɔlɔ, wo lɔ, a dɔlu tɛɛ ai milila ko ale le nɔ yi. Alɛzandele do v'a bolo jatela ko jama yi jeden fɔsa a a kumanɔbɔ ai yɛ.

³⁴ Kɛɛ jama k'a ye mingɛ ko Jahudiya le a le, ai bɛ ka gbanɔ kelen ne lɛlɛ fila jate kɔlɔ, ai v'a fɔla: «Ɛfɛsikalu ya joomoso Aatemesi buɲayine!»

³⁵ A laban nɔ, so sɛvɛlikɛba ka se ai masawalila. A do vɛɛ ai yɛ: «Ɛfɛsikalu, bɛ k'a lɔn ko Ɛfɛsi so le joomoso ba Aatemesi ya bon lamalaba le, ani a sawula min jiinin ka bɔ sangbolo lɔ, kɛlɛ?

³⁶ Komi sɔsɔyali tɛ se bilala ko minu lɔ, wo lɔ, ài yi jeden. Ài do kà ko kɛ ài kunfɛ!

³⁷ Kamasɔlɔn ài na kɛ́ minu lanala jan, k'a talan ai ma foi suɲa joobatobon na, kumatɛ ka lafeyalikan fɔ maa joomoso ma.

³⁸ Wo lɔ, ni Demetiliyusi ni a baaledenɲɔɔlu y'a fɛ ka mɔɔ dɔ makojiya, kuntiilu yi je ani kititɛɛlonnu lɔnin. Fɔ ai yi taa wo ɲabɔ wolu le fɛlɔ.

³⁹ Ni do telemasɔɔli gbɛlɛ y'ài bolo, wo ɲa yi bɔle maa ladɛn ba lɔ ka bɛn maa seliya ma.

⁴⁰ Mɔ na ko min kɛla bi, ni mɔ m'alama, ai natɔ kiti bilala mɔ la k'a fɔ ko mɔ vɛ mulutu, k'a talan a dailu tɛ mɔɔ suu suu kɔnɔ k'a ɲafɔ.»

⁴¹ A wɔlinin wo bɛ fɔla, a ka jama labila.