Kɛkolu 18 - Ala Ya Salatikan Kula Kitabu

Pɔli ka Samakan Kein lase Kolɛnti so kɔnɔ teme

¹ Wo kɔ, Pɔli ka bɔ Atɛn ka taa Kolɛnti so kɔnɔ.

² A do ka Jahudiya kɛ́ dɔ ye je, min tɔɔ tɛɛ ko Akuila, min sɔlɔnnin Pɔndu koovi lɔ. Ale ni a moso Pisila nanin kula le tɛɛ ka bɔ Itali jamana lɔ. Ai bɔnin tɛɛ je kamasɔlɔn Lɔmu masakɛba Kulodi tɛɛ vɛ jamali di ko Jahudiyalu bɛ yi bɔ Lɔmu so kɔnɔ. Pɔli ka taa ai ma,

³ ka to ai fɛlɔ ka kɛ ai baaledenɲɔɔ le, kamasɔlɔn ai bɛ tɛɛ faani tooda ladanba le le.

⁴ Ado Nɔningɛlon bɛ, Pɔli tɛɛ taala Aladalibon na ka kuma Jahudiyalu ni Gɛlɛkikalu yɛ, a v'i lɔjala k'ai lakunfa.

⁵ Silasi ni Timote ka na mingɛ ka bɔ Maseduwani, Pɔli k'a gbaladon Ala kumakan lasenko ma, a vɛ seleya dila Jahudiyalu ma ko Isa le Masa Tɔɔmasenin ne.

⁶ Kɛɛ komi ai tɛɛ a sɔsɔla ani k'a jɛvɛ, wo lɔ, Pɔli ka aa faaniba lɔgbasi ka wo kɛ ai ban tɔɔmase le. A vɛɛ: «Ài halakiko yi kɛ ài kunko le. Ǹ sen t'a lɔ. Ka damina bi ma, ǹ kɛtɔ Samakan Kein lasena siboloma gbɛlɛ mɔɔlu le ma.»

⁷ Wo lɔ, Pɔli ka bɔ je ka taa kɛ́ dɔ ya bon na, min tɔɔ tɛɛ ko Titiyɔ Jusitusi. Siboloma gbɛlɛ le tɛɛ a le min tɛɛ siyanna Ala ɲa. Ado aa bon tɛɛ Aladalibon dafɛ.

⁸ Aladalibon wo ɲamɔɔ Kilisipusi ni aa bonnamɔɔlu bɛ ka limaniya mɔ Tii ma. Kolɛntika siyama fana ka Pɔli kumakan mɛn, ka limaniya, ka ban ka makoli sɔlɔn.

⁹ Lon dɔ su lɔ, mɔ Tii ka ko dɔ lajɛlɛ Pɔli ɲa ma, a do vɛɛ a yɛ: «I kà siyan, i yi to kumala. I do kà jeden,

¹⁰ kamasɔlɔn ǹe gbu i fɛ. Mɔɔ mɔɔ tɛnala a benna i kan ka koyon kɛ i la, kamasɔlɔn ǹa mɔɔlu walayine so min kɔnɔ.»

¹¹ Wo lɔ, Pɔli ka to je, ka sanji kelen kalo wɔɔlɔ kɛ mɔɔlu kalanna Ala kumakan na.

¹² Kɛɛ Galiyo tɛɛ Akayi jamanatiiya la waate min nɔ, Jahudiyalu k'ai ladɛn k'i wuli Pɔli kanma. Ai do k'a mina ka taa a le kititɛɛya lɔ.

¹³ Ai vɛɛ: «Kɛ́ min yi mɔɔlu lakunfala Ala batokɛɲa gbɛlɛ le ma, min bɛnnin tɛ maa seliya ma.»

¹⁴ Jani Pɔli tɛɛ kuma damina, Galiyo k'a fɔ Jahudiyalu yɛ, a vɛɛ: «Àilu Jahudiyalu, ni kɛ́ min na koyon ne kɛla, niwotɛ kobɛnbali, ǹ tɛɛ ǹ tolomalɔle àiya telemasɔɔli la.

¹⁵ Kɛɛ komi ài i ɲɔɔ sɔsɔla ka bɛn kuma dɔlu ma, ani tɔɔ dɔlu, ani àiya seliyakolu, wo lɔ, ǹ tɛ diɲa ka kiti min tɛɛ. Àilu gbu y'a ɲabɔ.»

¹⁶ Wo fɔ a bolo, a k'ai gbɛn kititɛɛya lɔ.

¹⁷ Wo kɛ, ai bɛ k'i kɛ Sositɛnɛ kan, min tɛɛ Aladalibon ɲamɔɔ le, k'a gbasi kititɛɛya ɲafɛla lɔ. Galiyo do ma hamin wo le.

Pɔli ka seikɔ Antiyɔsi teme

¹⁸ Pɔli wɔlinin tele siyama kɛla Kolɛnti, a ka diɲa ɲinin limaniyamɔɔlu fɛ ka taa. A senin Sengele so kɔnɔ, a k'a kun li, kamasɔlɔn a tɛɛ vɛ dalakan ne ta Ala yɛ. Wo kɔ, a ka don kulunba kɔnɔ ka taa Siliya koovi lɔ, ado Pisila ni a kɛ́ Akuila ka taa a fɛ.

¹⁹ Ai senin Ɛfɛsi so kɔnɔ, Pɔli k'a taamaɲɔɔlu to a kɔ je. A do ka taa Aladalibon na ka kuma Jahudiyalu fɛ.

²⁰ Wolu k'a madiya ko a yi waate dana kɛ ai fɛ je, kɛɛ Pɔli ma diɲa.

²¹ A do ka siya ɲinin ai fɛ, a vɛɛ: «Ni Ala ka diɲa, ǹ kɛtɔ seikɔla ài ma.» Wo lɔ, a ka don kulunba kɔnɔ Ɛfɛsi ka taa.

²² Kulun senin Sezale so kɔnɔ, Pɔli ka bɔ ka taa limaniyajama fo Jelusalɛmu, ka ban ka taa Antiyɔsi.

²³ A wɔlinin waate dɔ kɛla je, a ka Galatiya ni Filigiya koovilu lɔtimin, a vɛ Isa kɔbiladennu bɛ sɛmɛdonna.

Apolosi ka mɔɔlu kawani teme Ɛfɛsi ni Kolɛnti solu la

²⁴ Wo waate, Jahudiya kɛ́ dɔ ka se Ɛfɛsi, min tɔɔ tɛɛ ko Apolosi ka bɔ Alɛzandele so kɔnɔ. A senin tɛɛ kumala kobɛn, ado lɔnni ba le tɛɛ a bolo ka bɛn kitabulu ma.

²⁵ A kalannin tɛɛ mɔ Tii ya siya le la fana. A sɛmɛdonnin tɛɛ Isa ya ko lasena ka bɛn tuɲa ma, k'a talan a tɛɛ ka Yaya ya makoliko le lɔn dein.

²⁶ A ka kuma damina Aladalibon na josolagbeleya boloma. Pisila ni a kɛ́ Akuila k'a lamɛn mingɛ, ai ka taa a le ai fɛlɔ ka Ala ya siya ɲafɔ a yɛ k'a lagbɛ.

²⁷ A lɔɔ tɛɛ Apolosi la mingɛ ka taa Akayi koovi lɔ, limaniyamɔɔlu k'a sɛmɛdon ka sɛvɛ lɔbɛn k'a lataa ai badenmalu ma je, ko ai y'ai bolo sii a kɔlɔ. A ka se je mingɛ, a ka mɔɔlu madɛmɛn kosɛvɛ, minu tɛɛ vɛ limaniya ka bɛn Ala ya nɛɛma ma.

²⁸ Kamasɔlɔn a tɛɛ Jahudiyalu ya kumalu kɔlɔbɔla fanga la bala lɔ, k'a lagbɛ ai yɛ kitabulu fɛ ko Isa le Masa Tɔɔmasenin ne.