Kɛkolu 16 - Ala Ya Salatikan Kula Kitabu

Timote ka bila Pɔli ni Silasi fɛ teme

¹ Wo kɔ, Pɔli ni Silasi ka se Dɛlɛbɛ so kɔnɔ, ka bɔ je ka taa Lisitile. Kɛ́ dɔ tɛɛ je Isa kɔbiladennu tɛma, min tɔɔ tɛɛ ko Timote. A ba tɛɛ Jahudiya limaniyamɔɔ le le, kɛɛ a fa tɛɛ Gɛlɛkika le le.

² Limaniyamɔɔlu bɛ tɛɛ Timote tɔɔ ɲuma le fɔla Lisitile ni Ikoniyɔmu solu kɔnɔ.

³ Pɔli tɛɛ a fɛ Timote yi taa ai fɛ, kɛɛ je Jahudiya bɛ tɛɛ k'a lɔn ko a fa tɛɛ Gɛlɛkika le le. Wo le k'a kɛ, Pɔli ka Timote makɛnɛkɛ.

⁴ Wo kɛ, Pɔli nu vɛ timintiminna solu wotɛ, ai vɛ dandɛɛli kɛla limaniyamɔɔlu yɛ ka bɛn ko wolu latelenko ma, minu latɛɛnin keladennu ni ɲamɔɔlu bolo Jelusalɛmu.

⁵ Wo boloɲa ma, limaniyajamalu sɛmɛ tɛɛ donna limaniya lɔ, ai do ma tɛɛ kafonna lon bɛ.

Ala ka Pɔli kelaya teme Maseduwani

⁶ Komi Nii Sɛnɛyanin tɛɛ vɛ Pɔli nu dansii Ala kumakan lasenko la Esiya koovi lɔ, wo lɔ, ai ka Filigiya ni Galatiya koovilu lɔtimin.

⁷ Ai senin Misiya koovi dan na, ai k'i lɔja ka don Bitiniya koovi lɔ, kɛɛ Isa Nii Sɛnɛyanin ma diɲa wo ma.

⁸ Wo lɔ, ai ka Misiya koovi lɔtimin ka taa Tolohasi so kɔnɔ.

⁹ Wo lon su lɔ, Ala ka ko dɔ lajɛlɛ Pɔli ɲa ma. A do ka Maseduwanika kɛ́ dɔ lɔnin ye, wo v'a madiyala, a vɛɛ: «Na i yi mɔ madɛmɛn Maseduwani koovi lɔ.»

¹⁰ Ko wo la ka jɛlɛ Pɔli ɲa ma mingɛ, mɔ ka mɔ lɔbɛn telemanin ka Maseduwani siya mina, kamasɔlɔn mɔ ka la a la k'a fɔ ko Ala vɛ mɔ kela ko m'i Samakan Kein lase je mɔɔlu ma.

Lidiya ka limaniya teme

¹¹ Mɔ ka don kulunba kɔnɔ Tolohasi so kɔnɔ ka mɔ telen Samotilase kɔɔtɛmaduu la. Wo kɛnɛbɔlon, mɔ ka se Neyapolisi so la.

¹² Mɔ ka bɔ je ka taa Lɔmukalu ya so dɔ la, min tɔɔ yi ko Filipi, min yi Maseduwani koovi fan kelen so ba dɔ le. Mɔ ka tele dana kɛ je.

¹³ Nɔningɛlon senin, mɔ ka taa kɔɔ dala so kɔma, a tɛɛ mɔ jii ma k'a fɔ ko mɔ kɛtɔ Jahudiyalu ya Aladaliya dɔ yena je. Wo kɛ, mɔ k'i sii ka kuma damina moso dɔlu yɛ, minu ladɛnnin tɛɛ je.

¹⁴ Mɔɔ minu tolomalɔnin tɛɛ mɔ la, ai lɔ mɔɔ kelen tɔɔ le tɛɛ ko Lidiya ka bɔ Tiyatila. Alabatoba le tɛɛ a le, min tɛɛ faani daagbɛlɛnnu felela. Mɔ Tii k'a josokun laka k'a ladiɲa Pɔli kumakannu ma.

¹⁵ Ale ni aa bonnamɔɔlu makonin kɔɔ kɔlɔ, a k'a fɔ mɔ yɛ k'a magbeleya, a vɛɛ: «Ni ài yi ǹ jatela mɔ Tii ya limaniyamɔɔ bɛlɛbɛlɛ dɔ le, ài yi na, ài yi jiya ǹa bon na.» A do ka to a magbeleyala haan fɔɔ mɔ ka diɲa a ma.

Ai ka Pɔli ni Silasi bila kaso la Filipi teme

¹⁶ Lon dɔ, mɔ taatɔla Aladaliya lɔ, jɔnsingbili dɔ ka mɔ labɛn. Jina dɔ tɛɛ a lɔ, min tɛɛ fɛlɛnnikɛ see dila a ma. Aa jɔnfalu tɛɛ tɔnɔ ba le sɔlɔnna ka bɛn a ma.

¹⁷ A do vɛ bilala mɔ ni Pɔli nu kɔ ka to gbanɔla, a vɛɛ: «Masa Taala ya bɔidennu le ne, minu yi kisiko siya lasena ài ma.»

¹⁸ Singbili ka to wo la tele siyama kɔlɔ. Kɛɛ lon dɔ, Pɔli josola ka kuna a ma. A do k'i ɲa tilimin k'a fɔ jina yɛ, a vɛɛ: «Ǹ'i jamalila Masa Tɔɔmasenin Isa tɔɔ lɔ, ǹ ko, i yi bɔ a lɔ!» Jina do ka bɔ singbili lɔ telemanin.

¹⁹ Aa jɔnfalu k'a ye mingɛ ko aiya tɔnɔ sɔlɔnɲa vɛ tiɲa, ai ka Pɔli ni Silasi mina k'ai fɔnfɔn ka taa ai le so tɛma ɲamɔɔlu ɲakɔlɔ.

²⁰ Ai do k'ai lalɔ Lɔmu ɲamɔɔlu ɲakɔlɔ k'a fɔ, ai vɛɛ: «Mɔɔ minu vɛ maa so ɲaami. Jahudiya le ai le,

²¹ minu yi mɔɔlu kalanna laana dɔlu la, minu ladaannin tɛ ǹu Lɔmukalu ma, kumatɛ ka mɔ bolo sii ai kɔlɔ.»

²² Wo fɔ, jama v'i wulila Pɔli ni Silasi kanma, ado ɲamɔɔlu ka jamali di ko k'aiya faanilu bɔ ai kanna, ani k'ai gbasi gbusan na.

²³ Ai wɔlinin ai gbasila bubale, ai k'ai bila kaso la, ani ka jamali di kasobon lakanaliba ma ko a ai lakana kpekpe.

²⁴ Ka bɛn jamali wo ma, a ka Pɔli ni Silasi bila kasobon kɔnɔlɔbon na, k'ai sennu gbaan kulun na.

Kasobon lakanaliba ka limaniya teme

²⁵ Sutala lɔ, Pɔli ni Silasi tɛɛ Ala dalila ka baiti la a yɛ, kasoden tɔlu tolomalɔnin vɛ ai la.

²⁶ Telemanin, duukolo ka jaajaa gbiligbili ka kasobon lamaamaa. Wo kɛ, da bɛ la ka ka, ani nɛɛ jɔlɔkɔlu ka bɔ kasodennu bɛ la.

²⁷ Kasobon lakanaliba ka kunun mingɛ ka kasobon dalu lakanin ye, a ka aa siyamifan labɔ a jɛlɛ faako lɔ, kamasɔlɔn a tɛɛ a kɔnɔ kasodennu vɛ bɔli.

²⁸ Kɛɛ Pɔli ka gbanɔ a ma, a vɛɛ: «I kà ko kɛ i jɛlɛ la! Mɔ bɛ yi jannɔ.»

²⁹ Wo kɛ, kasobon lakanaliba ka fitina makili ka taa Pɔli ni Silasi ma ɲagba le, k'i kɛ ai sen kɔlɔ, a lɔ vɛ jaajaala.

³⁰ A do ka Pɔli ni Silasi labɔ banama k'ai maɲininga, a vɛɛ: «Ǹ kuntiilu, ǹ'i mindɛ kɛ fɔsa ǹ'i kisi?»

³¹ Pɔli ni Silasi k'a javi, ai vɛɛ: «I yi limaniya mɔ Tii Isa ma. Wo vɛ kɛla, i yi kisile, ile ni iya bonnamɔɔlu bɛ.»

³² Ai do ka mɔ Tii kumakan lase ale ni aa bonnamɔɔlu bɛ ma.

³³ Wo waate kelen su lɔ, kasobon lakanaliba ka Pɔli ni Silasi ta k'aiya daalu lako. Wo kɛ, ai ka ale ni aa bonnamɔɔlu bɛ mako ji kɔlɔ telemanin.

³⁴ A do ka taa Pɔli ni Silasi le aa bon na, k'ai faana. Sawa ba le tɛɛ ale ni aa bonnamɔɔlu bɛ la, kamasɔlɔn ai tɛɛ vɛ limaniya Ala ma.

³⁵ Kɛnɛ bɔnin, so ɲamɔɔlu ka sɔdasilu lataa kasobon lakanaliba fɛlɔ, ai vɛɛ: «Kɛ́ wolu bila.»

³⁶ Wo lɔ, kasobon lakanaliba vɛɛ Pɔli yɛ: «Ɲamɔɔlu vɛ samakan lana ko ka ile ni Silasi bila. Wo ma, ài yi taa hɛlɛ lɔ.»

³⁷ Kɛɛ Pɔli k'a fɔ sɔdasilu yɛ, a vɛɛ: «Hali Lɔmu duulen ka kɛ mɔ le, ai na mɔ gbasila bala le lɔ, k'a talan ai ma maa kiti tɛɛ, ka ban ka mɔ bila kaso la. A yi di vɛ, ai y'a fɛ ka mɔ bila doon nɔ? Wo tɛ bɛn feu! Fɔ ailu gbu yi na ka mɔ labɔ jan!»

³⁸ Wo fɔ Pɔli bolo, sɔdasilu ka taa wo lase ɲamɔɔlu ma. Ai k'a mɛn mingɛ ko Pɔli ni Silasi yi Lɔmu duulen ne le, ai ka siyan.

³⁹ Wo le k'a kɛ, ai ka taa Pɔli ni Silasi fɛlɔ ka jo di ai ma k'ai labɔ kaso la, ka ban k'ai madiya ko ai yi bɔ so kɔnɔ.

⁴⁰ Ai ka bɔ mingɛ kaso la, ai ka taa Lidiya ya bon na ka limaniyamɔɔlu ye je. Ai wɔlinin wolu sɛmɛdonna, ai ka taa.