Kɛkolu 15 - Ala Ya Salatikan Kula Kitabu

Limaniyajama ɲamɔɔlu ka ladɛn ba kɛ Jelusalɛmu teme

¹ Wo kɔ, kɛ́ dɔlu ka na Antiyɔsi ka bɔ Jude koovi lɔ, minu tɛɛ limaniyamɔɔlu kalanna, ai vɛɛ: «Ni ài ma kɛnɛkɛ ka bɛn Nabi Musa ya laana ma, ài tɛnala sena kisila.»

² Wo lɔ, sɔsɔyali ba ka don kalanmɔɔ wolu ani Pɔli ni Baanabasi wotɛ. Wo le k'a kɛ, limaniyajama ka Pɔli ni Baanabasi ta, ani ai lɔ mɔɔ dɔlu, k'ai bɛ lataa Jelusalɛmu fɔsa ai yi ko min lase keladennu ni ɲamɔɔlu ma.

³ Limaniyajama k'ai lasalanna, ai do ka Fenisi ni Samaliya koovilu lɔtimin, ai v'a ɲafɔla je limaniyamɔɔlu yɛ ko siboloma gbɛlɛ mɔɔlu vɛ tube. Wo ka diya wolu yɛ kosɛvɛ.

⁴ Ai ka se mingɛ Jelusalɛmu, limaniyajama ni keladennu ni ɲamɔɔlu k'ai bolo sii ai kɔlɔ. Pɔli nu do ka dandɛɛli kɛ ai yɛ ka bɛn ko bɛ ma, Ala na minu kɛla ai fɛ.

⁵ Kɛɛ limaniyamɔɔ dɔlu tɛɛ je, minu fɛ tɛɛ Falisilu la. Ai do k'i lɔ k'a fɔ, ai vɛɛ: «Siboloma gbɛlɛ mɔɔ minu limaniyanin Isa ma, fɔ wolu lɔ kɛ́lu yi kɛnɛkɛ, ani m'ai jamali Nabi Musa ya seliya latelenko la.»

⁶ Wo fɔ, keladennu ni ɲamɔɔlu k'i kun bilin i ɲɔɔ ma k'i ɲa kaa ko wo lɔ kosɛvɛ.

⁷ Ai mɛnnin sɔsɔyalila, Piyɛli k'i wuli wo lɔ k'a fɔ ai yɛ, a vɛɛ: «M̀ badenmalu, àilu gbu k'a lɔn ko kolu damina lɔ, Ala na ǹ tala ài tɛma Samakan Kein lasenko lɔ siboloma gbɛlɛ mɔɔlu yɛ, fɔsa ai yi wo mɛn ka limaniya.

⁸ Ala min ka adamaden bɛ josokun lɔn, a v'a lagbɛ ko a bolo siinin siboloma gbɛlɛ mɔɔlu kɔlɔ, kamasɔlɔn a na Nii Sɛnɛyanin dila ai ma iwo a na a dila mɔ ma teme.

⁹ Wo ma, Ala ma lafisayali kɛ ǹu ni ailu wotɛ, kamasɔlɔn a n'ai josokun lasɛnɛyala ka bɛn aiya limaniya le ma.

¹⁰ Wo lɔ saa, mindɛ lɔ ài y'a fɛ ka Ala lɔsuma ka doni sii kɔbiladen wolu kun, ǹu ni mɔ bemanu ma se min kɔlɔ?

¹¹ Mɔ limaniyanin teme k'a fɔ ko mɔ kisinin ka bɛn mɔ Tii Isa ya nɛɛma le ma, wolu fana kisinin ten ne.»

¹² Jama bɛ jedennin ka to k'ai tolomalɔ Baanabasi ni Pɔli la, wolu vɛ dandɛɛli kɛla ka bɛn tɔɔmase ni kawanankolu ma, Ala na minu kɛla ai fɛ siboloma gbɛlɛ mɔɔlu tɛma.

¹³ Pɔli ni Baanabasi wɔlinin kumala, Janguba ka kuma ta, a vɛɛ: «M̀ badenmalu, ài y'ài tolomalɔ ǹ na.

¹⁴ Simɔn Piyɛli n'a ɲafɔla mɔ yɛ, Ala na a hangili bilala teme siboloma gbɛlɛ mɔɔlu lɔ kunfɔlɔ le, k'ai dɔlu kɛ a ta le.

¹⁵ Kuma min ni kelalu ya kuma bɛnnin i ɲɔɔ ma, kamasɔlɔn a sɛvɛnin kitabu kɔnɔ, ko:

¹⁶ ‹Mɔ Tii vɛɛ: ko wolu vɛ timinna, ǹ kɛtɔ seikɔla ka Dawuda ya bon lɔ kɔtunun, min tenin. Ǹ kɛtɔ a lɔla kula le aa bongbala le kɔkan.

¹⁷ Wo vɛ kɛla, mɔɔ tɔlu kɛtɔ ǹe ai Tii ɲininna, siboloma gbɛlɛ mɔɔlu koni, ǹ na minu bɛ kilila ǹ tɔɔ lɔ k'ai kɛ ǹ ta le. Ǹe ài Tii le na wo fɔla, ǹe min na ko wo bɛ kɛla,

¹⁸ min lɔnnin m̀ bolo kɔlɔkɔlɔ le.› »

¹⁹ Janguba vɛɛ ai yɛ kɔtunun: «Wo lɔ saa, m̀'ɛ a latɛɛ k'a fɔ ko mɔ kà siboloma gbɛlɛ mɔɔlu ɲagba, minu y'ai jɛlɛ laseila Ala ma.

²⁰ Kɛɛ fɔ m'i sɛvɛ lataa ai ma k'a fɔ ko ai kà joosɔsoo dɔn, ni wotɛ jufaasoo, niwotɛ jeli, ani ai kà kanu kɛ.

²¹ Kamasɔlɔn seliya min dinin Nabi Musa ma, ka ta waate jaan ma, ai yi wo kalanna Aladalibonnu la Nɔningɛlon bɛ, ani a kumakan la yi sena so kelenkelenna bɛ la.»

Ai ka sɛvɛ min lataa siboloma gbɛlɛ limaniyamɔɔlu ma

²² Wo le k'a kɛ, keladennu ni ɲamɔɔlu ni limaniyajama bɛ k'a latɛɛ ko ai yi kɛ́ dɔlu ta ka wolu lɔ Pɔli ni Baanabasi malɔla Antiyɔsi. Wo lɔ, ai ka Judasi ta (ai tɛɛ a fɔla min ma ko Baasabasi), ani Silasi, minu tɛɛ ɲamɔɔlu le limaniyamɔɔlu tɛma.

²³ Ai ka sɛvɛ don wolu bolo ko ai yi taa a le. A sɛvɛnin tɛɛ ko: «Ǹu keladennu ni ɲamɔɔlu, ài badenmalu koni, m'i lɛtɛlɛ min lataala siboloma gbɛlɛ limaniyamɔɔlu ma Antiyɔsi so kɔnɔ ni Siliya ni Silisiya jamanalu lɔ. M'ài fola.

²⁴ Mɔ n'a mɛnna ko mɔɔ dɔlu bɔnin mɔ tɛma ka taa ài ɲagba kuma dɔ le, min n'ài kɔnɔlɔfilila. Ǹu do ma wolu lataa ài ma.

²⁵ Wo le n'a kɛla, mɔ bɛ na bɛnna a ma ko ka mɔɔ dɔlu ta k'ai bila mɔ diyananmɔɔ Baanabasi ni Pɔli fɛ k'ai lataa ài ma.

²⁶ Kɛ́ minu n'i banna ai nii lɔ ka bɛn mɔ Tii Masa Tɔɔmasenin Isa tɔɔ le ma.

²⁷ Wo le n'a kɛla, mɔ na Judasi ni Silasi lataala ai ma, minu dalakan kɛtɔ ko minu lagbɛla ài yɛ.

²⁸ A diyayine Nii Sɛnɛyanin yɛ, ani ǹu gbu, k'a fɔ ko mɔ kà doni gbili sii ài kun, mafɔ diyanigbeya ko minu:

²⁹ Ài kà joosɔsoo dɔn, niwotɛ jufaasoo, niwotɛ jeli, ani ài kà kanu kɛ. Ni ài ka ko wolu matanga, wo yi bɛnne. Ala yi to ài fɛ.»

³⁰ Keladen wolu lasalannin, ai ka taa Antiyɔsi ka limaniyajama ladɛn, ka sɛvɛ wo don ai bolo.

³¹ Sɛvɛ kalannin, wo k'ai sɛmɛdon k'ai kɔnɔlɔdiya bubale.

³² Judasi ni Silasi, minu gbu taanin kɛla kelalu le, wolu k'ai sɛmɛdon ani k'ai lasawati kuma siyama le.

³³ Judasi ni Silasi wɔlinin waateni kɛla je, limaniyamɔɔlu ka duwawu kɛ ai yɛ k'ai labila, ko ai yi seikɔ ai kelabalu ma josolajii lɔ.

³⁵ Kɛɛ Pɔli ni Baanabasi ka to Antiyɔsi, ai vɛ mɔɔlu kalanna ka mɔ Tii kumakan lase, ailu ni mɔɔ siyama.

Pɔli ni Baanabasi ka falan a ma teme

³⁶ Tele dana timin kɔ, Pɔli vɛɛ Baanabasi yɛ: «Mɔ na mɔ Tii kumakan lasena so minu la, ài m'i kɔsei wolu kelenkelenna bɛ lɔ ka mɔ badenmalu kɛɲa lɔn.»

³⁷ Baanabasi tɛɛ a fɛ Yohana tɛɛ taa ai fɛ (ai tɛɛ a fɔla min ma ko Malɛkɛ).

³⁸ Kɛɛ Yohana bilako ai fɛ, Pɔli ma wo jate kobɛnnin ne, kamasɔlɔn Yohana tɛɛ vɛ bɔ ai fɛ Panfili koovi lɔ. A tɛɛ ma to ai kɔ aiya baale lɔ.

³⁹ Wo ko ka kɛ sɔsɔyali ba le Pɔli ni Baanabasi wotɛ, haan fɔɔ ai ka falan a ma. Ado Baanabasi ka Malɛkɛ ta ka taa a le Sipele kɔɔtɛmaduu lɔ kulun kɔnɔ.

⁴⁰ Kɛɛ Pɔli ka Silasi ta ka bɔ je, limaniyamɔɔlu ban kɔ ai kalifala mɔ Tii ya nɛɛma la.

⁴¹ Wo lɔ, ai ka Siliya ni Silisiya koovilu lɔtimin, ai vɛ limaniyajamalu sɛmɛdonna fan bɛ lɔ.