Kɛkolu 12 - Ala Ya Salatikan Kula Kitabu

Masakɛ Helodi ka limaniyajama jangata teme

¹ Wo waate lɔ, Masakɛ Helodi k'i wuli ka mɔɔ dɔlu jangata minu fɛ tɛɛ limaniyajama la.

² A do ka Yohana kɔlɔkɛ Janguba faa siyamifan ne.

³ A k'a ye mingɛ ko wo vɛ diya Jahudiyalu yɛ, a ka Piyɛli fana mina. Wo ka bɛn Bulufununbali Selilon waate le ma.

⁴ Piyɛli mina kɔ, a k'a bila kaso la k'a kalifa sɔdasi kulu naani la lakanali boloma, sɔdasi naani tɛɛ min kelenkelenna lɔ. A tɛɛ Helodi kɔnɔ ko Timinkunna Selilon vɛ timinna, a yi Piyɛli ya kiti tɛɛ jama bɛ ɲakɔlɔ.

⁵ Wo lɔ, ai tɛɛ Piyɛli lamalala kaso la, kɛɛ limaniyajama tɛɛ Ala dalila a yɛ kosɛvɛ.

Piyɛli ka bɔ kaso la teme

⁶ Jani Helodi tɛɛ aa kiti tɛɛ wo dusagbɛlon, su wo lɔ, Piyɛli ka to sunɔɔ lɔ sɔdasi fila tɛma, jɔlɔkɔlu v'a bolo fila bɛ la, ado lakanaliba dɔlu lɔnin tɛɛ da la.

⁷ Telemanin, mɔ Tii ya mɛlɛka ka bɔ gbɛ la a yɛ, ado kɛnɛya tɛɛ mɛnɛnna kasobon na. Mɛlɛka ka Piyɛli magbasi a fulu fɛ k'a lakunun, a vɛɛ: «I wuli falafala!» Ado jɔlɔkɔlu ka bɔ a bolo la ka ben duu ma.

⁸ Mɛlɛka vɛɛ a yɛ: «I tɛsili k'iya samala don.» Piyɛli ka wo kɛ. Wo kɔ, mɛlɛka vɛɛ a yɛ: «I iya faaniba bila i kanna, i yi bila ǹ kɔ.»

⁹ Piyɛli do ka bila a kɔ ka bɔ kaso la. Wo bɛ n'a kɛ, a tɛɛ m'a lɔn mɛlɛka tɛɛ ko min kɛla, ni wo yi tuɲa le le. A do tɛɛ a yena, ko le yi jɛlɛla a ɲa ma.

¹⁰ Ai ka timin lakanaliba kulu kunfɔlɔ la, ka timin a filana la, ka se nɛɛ koon ba ma, min da yi kala ka don so kɔnɔ. Da ba wo la ka ka a jɛlɛ ma ai ɲa. Wo kɛ, ai ka bɔ ka siya dɔ taama damina, ado mɛlɛka ka bɔ Piyɛli fɛ telemanin.

¹¹ Piyɛli ka kɛ a jɛlɛ kalama mingɛ, a do vɛɛ: «M̀'ɛ a lɔn butu k'a fɔ ǹ Tii le na aa mɛlɛka lanala ka m̀ bɔ Helodi bolo ani ka ǹ lakisi koyon bɛ ma, Jahudiyalu jii tɛɛ min ma.»

¹² Piyɛli ka wo ɲaye mingɛ, a ka taa Mɔyamu ya bon na, Yohana ba koni, ai tɛɛ a fɔla min ma ko Malɛkɛ, mɔɔ siyama ladɛnnin tɛɛ tɛɛminja, ai vɛ Ala dalila Piyɛli yɛ.

¹³ Piyɛli ka luu da makɔnkɔn mingɛ, bɔidenmoso min tɔɔ tɛɛ ko Loda, wo k'i madon da la k'a tolomalɔ.

¹⁴ Kɛɛ a k'a lɔn mingɛ ko Piyɛli le kan, a ma da laka fɔ ka bɔli sawa boloma ka taa a fɔ mɔɔ bɛ yɛ ko Piyɛli lɔnin banama.

¹⁵ Ai do vɛɛ a yɛ: «Fa l'i lɔ!» Kɛɛ Loda k'a to a fɔla k'a magbeleya ko Piyɛli le. Ai do vɛɛ: «A yi kɛ aa mɛlɛka le le.»

¹⁶ Wo bɛ lɔ, Piyɛli ka to da makɔnkɔnna. Ai do ka da laka mingɛ, ai ka Piyɛli ye k'ai dalaja.

¹⁷ Kɛɛ Piyɛli k'a bolo jate ai yɛ fɔsa ai yi jeden, ka ban k'a ɲafɔ ai yɛ mɔ Tii na a labɔla kaso la teme. A do vɛɛ: «Ài yi wo bɛ lase Janguba ni mɔ badenma tɔlu ma.» Wo kɔ, a ka bɔ je ka taa dingila gbɛlɛ lɔ.

¹⁸ Kɛnɛ bɔnin, Piyɛli tununko ka sɔdasilu hangili ɲaami bubale.

¹⁹ Wo lɔ, Helodi ka aa mɔɔlu lɔ a ɲininna fan bɛ lɔ. Ai m'a ye mingɛ, Helodi ka lakanaliba wolu maɲininga ka ban k'ai lataa ai faaya lɔ. Wo kɔ, Helodi ka bɔ Jude ka taa Sezale so kɔnɔ ka tele dana kɛ je.

Helodi ka sa teme

²⁰ Wo k'a talan, Helodi mɔnɛnin tɛɛ bubale Tili ni Sidɔnkalu kanma. A lɔɔ tɛɛ ai la k'a josolajii, kamasɔlɔn ai balo tɛɛ bɔla Helodi ya jamana le lɔ. Wo lɔ, ai k'i kun bilin i ɲɔɔ ma ka mɔɔ dɔlu lɔ Helodi majo dila. Mɔɔ wolu ka kuma masakɛ ya bonkunnasiiba Bilasitusi fɛ haan fɔɔ a ka diɲa k'ai madɛmɛn. Wo kɔ, ai ka taa masakɛ fɛlɔ k'a madiya ko ai yi bɛn a lɔ.

²¹ Lon latɛɛnin senin, Helodi ka aa masakɛfaani bila a kanna k'i sii aa masayasiifen nɔ ka kuma jama yɛ.

²² Ado jama vɛ gbanɔla, ai vɛɛ: «Adamaden kan tɛ min ne, mafɔ tii dɔ kan!»

²³ Telemanin, mɔ Tii ya mɛlɛka dɔ ka Helodi gbasi, kamasɔlɔn a ma magbiliyali di Ala ma. Wo kɛ, tɔnɔngɔlu k'a noolu dɔn k'a faa.

²⁴ Wo bɛ lɔ, Ala kumakan ka to jɛzɛnna, ado mɔɔ siyama ka limaniya.

²⁵ Sawuli ni Baanabasi ka na madɛmɛlifen ne Jelusalɛmu mingɛ, ai ka seikɔ Yohana le, ai tɛɛ a fɔla min ma ko Malɛkɛ.