Kɛkolu 10 - Ala Ya Salatikan Kula Kitabu

Sɔdasi kuntii dɔ ka Piyɛli kili teme

¹ Wo k'a talan, kɛ́ dɔ tɛɛ Sezale so kɔnɔ, min tɔɔ tɛɛ ko Kɔɔnɛli. Lɔmu sɔdasi kuntii dɔ le tɛɛ a le, min siinin tɛɛ sɔdasi kɛmɛ (100) jate kunna, minu fɛ tɛɛ sɔdasi jama dɔ la, ai tɛɛ a fɔla min ma ko Itali kɛlɛkɛjama.

² Kɔɔnɛli tɛɛ Alaɲasiyanɲɛmɔɔ le le, ale ni aa bonnamɔɔlu bɛ. A do tɛɛ koɲuma kɛla mɔɔlu yɛ kosɛvɛ, ani ka Ala dali kudein.

³ Lon dɔ, wuladala lɛlɛ sawa waate, Ala ka ko dɔ lajɛlɛ Kɔɔnɛli ɲa ma. A do ka Ala ya mɛlɛka dontɔla ye bon na k'a fɔ a yɛ, a vɛɛ: «Kɔɔnɛli!»

⁴ A do k'i ɲa kaa mɛlɛka lɔ siyan boloma k'a javi, a vɛɛ: «Ǹ Kuntii, mindɛ le?» Mɛlɛka do vɛɛ a yɛ: «Iya Aladali ni iya koɲuma kɛninnu fandannilu yɛ, wolu vɛ jɛlɛ Ala ɲakɔlɔ iwo hangilitonɔ salaka.

⁵ Tandainɔ, i yi mɔɔ dɔlu lataa Jopa so kɔnɔ ka taa kɛ́ dɔ kili, min tɔɔ yi ko Simɔn, ai y'a fɔla min ma ko Piyɛli.

⁶ A jiyanin mɔɔ min fɛlɔ, wo fana tɔɔ le ko Simɔn, min taanin kɛla gbolobaalekɛba le. Aa bon yi kɔɔji da le la.»

⁷ Mɛlɛka ka ban kumala a yɛ ka taa feeya, Kɔɔnɛli ka aa bonnabɔiden fila kili ani aa sɔdasikɛ dɔ min tɛɛ Alaɲasiyanɲɛmɔɔ ni a madɛmɛnba le.

⁸ A wɔlinin ko bɛ ɲafɔla ai yɛ, a k'ai lataa Jopa so kɔnɔ.

Ala ka ko dɔ lajɛlɛ Piyɛli ɲa la teme

⁹ Wo kɛnɛbɔlon, mɔɔ sawa wolu masulunyatɔla Jopa so la, Piyɛli ka jɛlɛ bon kɔkan telelatelen waate Aladaliko lɔ.

¹⁰ Kɔɔn k'a mina, a tɛɛ a fɛ ka dɔnni kɛ. Ai ka to gbadonna a yɛ, Ala ka ko dɔ lajɛlɛ a ɲa ma.

¹¹ A do ka sangbolo dalakanin ye, ka fen dɔ jiitɔla ye min kɛnin tɛɛ iwo bilingan ba, a minanin tɛɛ a tungun naani la.

¹² Tuukɔlɔsoo ni tuukɔlɔkɔnɔ ani fɔnfɔnnifen suu bɛ dɔ tɛɛ a lɔ.

¹³ Wo kɛ, Piyɛli ka kumakan dɔ mɛn, wo vɛɛ: «Piyɛli, i wuli, i y'a dɔ faa k'a dɔn.»

¹⁴ Kɛɛ Piyɛli vɛɛ: «Ǹ Tii, wo tɛ kɛ feu! M̀ ma fen sɛnɛyabali dɔn ba tuun, kumatɛ fen kɔsɔnin ma!»

¹⁵ Kumakan ka bɔ a siɲa filana lɔ k'a fɔ a yɛ, a vɛɛ: «Ala na fen min lasɛnɛyala, i kà a fɔ wo ma ko fen kɔsɔnin.»

¹⁶ Wo ka kɛ siɲa sawa le mingɛ, bilingan la ka jɛlɛ sangbolo lɔ.

Kɔɔnɛli ya keladennu ka na ka Piyɛli talan teme

¹⁷ Piyɛli kɔnɔlɔfilinin ka to ka bɛn kojiyanin wo kɔlɔ ma, kɛ́ minu lataanin tɛɛ Kɔɔnɛli bolo, wolu tɛɛ vɛ Simɔn ya bon dingila lɔn. Ai do tɛɛ lɔnin luu da la.

¹⁸ Ai k'ai kan labɔ ka ɲiningali kɛ, ai vɛɛ: «Simɔn, ai y'a fɔla min ma ko Piyɛli, a jiya le ne?»

¹⁹ Piyɛli ka to a milila ka bɛn kojiyanin wo ma, Nii Sɛnɛyanin k'a fɔ a yɛ, a vɛɛ: «I tolomalɔ! Kɛ́ sawa nanin jan, ai i ɲininna.

²⁰ I wuli, i yi jii ka bila ai kɔ. I do kà sika, kamasɔlɔn ǹe le n'ai lanala.»

²¹ Wo lɔ, Piyɛli ka jii ka taa ai ma, a vɛɛ: «Ài yi mɔɔ min ɲininna, ǹe le wo le. Ài nanin mindɛ la?»

²² Ai do ka Piyɛli javi, ai vɛɛ: «Sɔdasi kuntii Kɔɔnɛli le na mɔ lanala. Mɔɔ telennin ne a le, ani Alaɲasiyanɲɛmɔɔ, Jahudiyalu bɛ yi min buɲala kosɛvɛ. Lɔhɔlɔma mɛlɛka dɔ le n'a fɔla a yɛ ko a y'i kili aa bon na, fɔsa a a tolomalɔ i kumakan na.»

²³ Wo kɛ, Piyɛli k'ai ladon bon na k'ai jiya. Wo dusagbɛlon, Piyɛli k'i wuli ka bila ai kɔ ka taa, ado Jopa limaniyamɔɔ dɔlu ka taa a fɛ.

Piyɛli ka taa Kɔɔnɛli fɛlɔ teme

²⁴ Wo kɛnɛbɔ, ai ka se Sezale so kɔnɔ. Wo k'a talan Kɔɔnɛli tɛɛ v'a badenmalu ni a tɔva bɛlɛbɛlɛlu ladɛn, a vɛ Piyɛli nu makɔnɔna.

²⁵ Wo lɔ, Piyɛli dontɔla, Kɔɔnɛli ka taa a labɛn k'i bilin a sen kɔlɔ batoli boloma.

²⁶ Kɛɛ Piyɛli k'a lawuli k'a fɔ a yɛ, a vɛɛ: «I wuli, ǹ'i mɔɔnivin ne le iwo ile gbu.»

²⁷ Piyɛli ka to kumala Kɔɔnɛli fɛ, ai ka don bon na ka mɔɔ siyama ladɛnnin ye je.

²⁸ A do vɛɛ ai yɛ: «Àilu gbu k'a lɔn a ladaannin tɛ ǹu Jahudiyalu ma k'i madon siboloma gbɛlɛ mɔɔlu la, kumatɛ ka taa bɔ ai ma. Kɛɛ Ala v'a jiya ǹ na ko ǹ kà a fɔ mɔɔ suu suu ma mɔɔ sɛnɛyabali, niwotɛ mɔɔ kɔsɔnin.

²⁹ Wo le n'a kɛla, ài na ǹ kilila mingɛ, m̀ ma sɔsɔyali bila a lɔ, mafɔ ka na. Ǹ'ài maɲiningala wo lɔ, ài na ǹ kilila mindɛ la?»

³⁰ Kɔɔnɛli do vɛɛ a yɛ: «A vɛ tele naani bɔ, waate suu min nɔ, ǹ tɛɛ Ala dalila ǹa bon na wuladala lɛlɛ sawa waate. Ado kɛ́ dɔ k'i lɔ ǹ ɲakɔlɔ telemanin, faani gbɛ pepe v'a kanna.

³¹ A vɛɛ: ‹Kɔɔnɛli, Ala v'iya madailikan mɛn, k'a hangili to iya koɲuma kɛninnu lɔ fandannilu yɛ.

³² Wo ma yi ne, i yi mɔɔ dɔlu lataa Jopa so kɔnɔ ka Simɔn kili, ai y'a fɔla min ma ko Piyɛli. A jiyanin mɔɔ min fɛlɔ, wo fana tɔɔ le ko Simɔn, min taanin kɛla gbolobaalekɛba le. Aa bon yi kɔɔji da le la.›

³³ Wo le n'a kɛla, ǹ na mɔɔlu lataala i kɔ telemanin. Ado i nako vɛ iya ɲumaya jiya mɔ la. Mɔ Tii n'i lɔla ko minu fɔla mɔ yɛ, mɔ bɛ yi jan Ala ɲakɔlɔ ka mɔ tolomalɔ wolu bɛ ma.»

Piyɛli ka kawanili kɛ Kɔɔnɛli ya bon na teme

³⁴ Wo lɔ, Piyɛli vɛ kumala, a vɛɛ: «Tuɲa le, m̀'ɛ a ɲaye butu ko Ala tɛ lafisayali kɛla.

³⁵ Siboloma bɛ lɔ, ni mɔɔ minu ka siyan Ala ɲa ka kotelenninu kɛ, a a bolo siila wolu bɛ le kɔlɔ.

³⁶ Àilu gbu k'a lɔn ko Ala ka Samakan Kein lase Bani Isilankalu ma, k'a fɔ ko josolajii yi sɔlɔnna Masa Tɔɔmasenin Isa le fɛ, min yi mɔɔ bɛ Tii le.

³⁷ Ài do k'a lɔn ko minu na kɛla Jude fan bɛ lɔ, ka damina Galile, Yaya ya kawanili kɔ ka bɛn makoliko ma.

³⁸ Ala ka Nazalɛtika Isa ta ka a sɔ a Nii Sɛnɛyanin sɔ, ani seetiiya. A do tɛɛ timintiminna kokeinnu kɛla, ka mɔɔlu lakɛnɛya minu bɛ tɔlɔyanin tɛɛ Soitana bolo, kamasɔlɔn Ala tɛɛ a fɛ.

³⁹ Isa ka ko minu kɛ Jelusalɛmu so kɔnɔ ani Jahudiyalu ya jamana lɔ, ǹu le kɛnin wo bɛ sele le. Ai k'a gbaan kɔlɔman ma k'a faa,

⁴⁰ kɛɛ a tele sawana lon, Ala k'a lawuli ka bɔ saya lɔ, k'a lankɛnɛmaya.

⁴¹ Kɛɛ mɔɔ bɛ m'a ye, mafɔ Ala na ǹu minu tala ka mɔ kɛ sele le, ǹu minu na dɔnni kɛla ani k'i min a fɛ a lawuli kɔ ka bɔ saya lɔ.

⁴² Ado Isa ka mɔ lɔ kawanilila ani ka seleya di ko Ala v'a lasii k'a kɛ kititɛɛba le niima ni fulenilu bɛ kunna.

⁴³ Seleya dinin ka bɛn a ma kelalu bɛ bolo, ko ni mɔɔ mɔɔ ka limaniya a ma, wo tii ya julumbulu lɔ yi kotole a tɔɔ sabu la.»

Kɔɔnɛli ni aa mɔɔlu ka Nii Sɛnɛyanin sɔlɔn teme

⁴⁴ Piyɛli ka to kumala, Nii Sɛnɛyanin ka jii a kumakan lamɛnbalu bɛ kɔkan.

⁴⁵ Jahudiya limaniyamɔɔ minu nanin tɛɛ Piyɛli fɛ, wolu ka kawakoya kamasɔlɔn Ala na a Nii Sɛnɛyanin dila k'a lajii hali siboloma gbɛlɛ mɔɔlu gbu kɔkan,

⁴⁶ kamasɔlɔn ai tɛɛ ai kannu mɛnna, ai vɛ kumala kan gbɛlɛlu lɔ ka Ala tanu. Wo lɔ, Piyɛli vɛɛ:

⁴⁷ «Mɔɔ minu na Nii Sɛnɛyanin sɔlɔnna iwo ǹu n'a sɔlɔnna teme. Wo lɔ, jene yi se ai dansiila ai makoko la?»

⁴⁸ Wo le y'a ma, Piyɛli ka jamali di ko ai yi makoli sɔlɔn Masa Tɔɔmasenin Isa tɔɔ lɔ. Wo kɛnin, ai ka Piyɛli madiya ko a yi tele dana kɛ ai fɛlɔ.