Kɛkolu 1 - Ala Ya Salatikan Kula Kitabu

Isa ka Nii Sɛnɛyanin lahedi ta teme

¹ Ǹ tɔva Teyofile, ǹa sɛvɛli kunfɔlɔ lɔ, ǹ na kumala ka bɛn Isa kɛkolu ni aa kalan bɛ ma ka ta aa baale damina ma,

² haan fɔɔ a kɔlɔtanin waate min nɔ ka taa haijɛnɛ. Jani a kɔlɔ tɛɛ ta, a ka jamalilu di aa keladen tanilu ma Nii Sɛnɛyanin ya see lɔ.

³ Aa tɔlɔya kɔ, a ɲɛnɛma ka bɔ gbɛ la ai ɲana boloɲa siyama ma, ani k'a jɛlɛ jiya ai la tele binaani (40) kɔlɔ, ka kuma ka bɛn Ala ya masaya ma.

⁴ A ka to ai fɛ ka jamali di ai ma, a vɛɛ: «Ài kà bɔ Jelusalɛmu, mafɔ ka ǹ Fa ya lahedi mafako makɔnɔ, ǹ na min ya ko fɔla ài yɛ.

⁵ Kamasɔlɔn Yaya tɛɛ mɔɔlu makola ji le le, kɛɛ tele dana vɛ timinna, ài makotɔ Nii Sɛnɛyanin ne le.»

Isa kɔlɔ ka ta ka jɛlɛ sangbolo lɔ teme

⁶ Ai bɛ ladɛnnin dingila kelen nɔ, keladennu ka Isa maɲininga, ai vɛɛ: «Mɔ Kuntii, i kɛtɔ masaya laseila Bani Isilankalu ma waate min ne lɔ?»

⁷ A k'ai javi, a vɛɛ: «Àiya ko tɛ wo le, k'a fɔ ài yi waate ni lon wolu lɔn, minu latɛɛnin ǹ Fa ya seetiiya lɔ.

⁸ Kɛɛ Nii Sɛnɛyanin vɛ jiila ài kɔkan, ài kɛtɔ fanga sɔlɔnna. Ài do kɛtɔ ǹ selelu le Jelusalɛmu ani Jude ni Samaliya koovilu lɔ, haan fɔɔ dunuɲa dan na.»

⁹ Isa wɔlinin wo fɔla, a kɔlɔ ka ta ai ɲana ka jɛlɛ sangbolo lɔ, ado sanbiliya ka a latunun ai ma.

¹⁰ Ai ɲa lɔnin ka to Isa lɔ, a jɛlɛtɔla sangbolo lɔ, kɛ́ fila ka bɔ gbɛ la telemanin k'i lɔ ai dafɛ, faani gbɛ vɛ ai kanna.

¹¹ Wolu vɛɛ ai yɛ: «Galilekalu, mindɛ lɔ ài lɔnin jan, ài ɲa vɛ sangbolo lɔ? Isa min kɔlɔtanin ài tɛma ka jɛlɛ sangbolo lɔ, a do kɛtɔ seikɔla wo boloɲa kelen ne ma, iwo ài n'a jɛlɛtɔla yena teme sangbolo lɔ.»

Ai ka Matiyasi bila Judasi nɔ lɔ teme

¹² Wo kɛnin, keladennu ka jii tini la ka seikɔ Jelusalɛmu. Ai y'a fɔla tini min ma ko Zeituna tini. Wo ni Jelusalɛmu wotɛ yi kilo kelen jate bɔle.

¹³ Ai donnin so kɔnɔ, ai ka taa sangaso sanmabon na, ai jiyanin tɛɛ tɛɛminja. Ai tɔɔlu le ne: Piyɛli, Yohana, Janguba, Andele, Filipe, Tomasi, Batolomu, Matiyu, Alife denkɛ Janguba, Fasokanuba Simɔn, ani Janguba denkɛ Judasi.

¹⁴ Ai bɛ tɛɛ ai ladɛnna Aladaliko lɔ miliya kelen ne kan waate bɛ, ailu ni moso dɔlu, ani Isa ba Mɔyamu, ni a dɔɔkɛlu.

¹⁵ Tele dana timinnin kɔ, Piyɛli k'i lɔ limaniyajama tɛma ka kuma ai yɛ, mɔɔ kɛmɛ ni mɔɔ muan (120) jate.

¹⁶ A do vɛɛ ai yɛ: «M̀ badenmalu, fɔ kitabu kɔnɔ kuma ma tɛɛ fa, Nii Sɛnɛyanin ka Nabi Dawuda lɔ min fɔla ka bɛn Judasi ma, min na kɛla Isa minabalu ɲabila le.

¹⁷ A tɛɛ mɔ dɔ le le. A fɛ tɛɛ baale min na.»

¹⁸ (Wo kɔ, a ka sala min sɔlɔn min tɛɛ aa koyonkɛ sala le, a ka gbɛkɛnɛ dɔ san wo la. A do k'i ben a kun kan je le, k'a kɔnɔ lɔte k'a noo bɛ jɛzɛn.

¹⁹ Jelusalɛmukalu bɛ ka wo lɔn mingɛ, ai ka fɔ woja ma ai balakan nɔ ko Akɛdama. Wo kɔlɔ le ko Mɔɔ Jeli Gbɛkɛnɛ.)

²⁰ Piyɛli k'a fɔ kɔtunun, a vɛɛ: «A sɛvɛnin Zabuli kɔnɔ, ko: ‹Aa bon lakolon yi to, mɔɔ suu suu kà sii a kɔnɔ.› A sɛvɛnin fana, ko: ‹Mɔɔ gbɛlɛ yi baale kɛ a nɔ lɔ.›

²¹ Wo lɔ, fɔ m'i kɛ́ kelen kafon mɔ kan ka bɔ mɔ bilankɔɲɔɔlu lɔ minu tɛɛ mɔ fɛ waate bɛ, mɔ tɛɛ jii ni jɛlɛla Isa fɛ waate min nɔ,

²² ka damina a mako waate ma Yaya bolo, haan fɔɔ a kɔlɔ ka ta mɔ tɛma lon min na. Wo tii yi kɛ sele dɔ le mɔ fɛ ka bɛn mɔ Tii Isa lawuliko ma ka bɔ saya lɔ.»

²³ Wo lɔ, ai ka mɔɔ fila jiya. Dɔ tɔɔ le tɛɛ ko Jusufu, ai tɛɛ a fɔla min ma fana ko Balasabasi, niwotɛ Jusitusi. A tɔ kelen tɔɔ le tɛɛ ko Matiyasi.

²⁴ Ai bɛ vɛ Ala dalila, ai vɛɛ: «Mɔ Tii, ile le ka mɔɔ bɛ josokun lɔn. I na min tala mɔɔ fila minu lɔ, i yi wo jiya mɔ la.

²⁵ Wo yi keladenya baale kɛ mɔ fɛ, kamasɔlɔn Judasi vɛ baale min bila ka taa dingila dɔ lɔ, min bɛnnin a ma.»

²⁶ Wo kɛ, ai ka kalabila kɛ, ado kala ka bɛn Matiyasi tɔɔ le. Wo le k'a kɛ, ai ka a kafon keladen mɔɔ tan ni kelen (11) kɔkan.