Jude 1 - Ala Ya Salatikan Kula Kitabu

¹ Ǹe Jude, min yi Masa Tɔɔmasenin Isa ya bɔiden ne ani Janguba badenma, ǹ'i lɛtɛlɛ min sɛvɛla mɔ Fa Ala ya mɔɔ kilininnu le ma, a yi minu kanula, ani k'ai ladalo Masa Tɔɔmasenin Isa yɛ.

² Henandeya ni josolajii ni kanundeya yi sawati ài tɛma kosɛvɛ.

Faɲafɔ kalanmɔɔlu

³ Ǹ diyananmɔɔlu, hali a lɔɔ tɛɛ ǹ na bubale ǹ'i min sɛvɛ ài ma ka bɛn mɔ dɛɛn ma kisiko kelen na, kɛɛ m̀'ɛ a ye fɔ ǹ'a sɛvɛ ka bɛn ài sɛmɛdonko ma kɛlɛ ma limaniya makalanko lɔ, Ala na min dila mumininnu ma siɲa kelen ne haan fɔɔ habadan.

⁴ Kamasɔlɔn mɔɔ dɔlu vɛ don ài tɛma doon nɔ, minu ya kolatɔn sɛvɛnin ka ta waate jaan ma. Samakan bɛlɛbɛlɛ ka bɛn mɔ Tii Ala ya nɛɛma ma, Alaɲasiyanɲɛbali wolu yi wo kɔlɔ le majɛlɛmana k'a kɛ malobaliyako dailu le, ani k'ai ban Masa Tɔɔmasenin Isa lɔ, min kelenpesa yi mɔ Kuntii le, ani mɔ Tii.

⁵ Tandainɔ, ǹ'a fɛ ǹ'ài hangili bila ko dɔ lɔ, k'a talan ài tɛɛ k'a lɔn kɔlɔman ne feu ko mɔ Tii le na Bani Isilankalu lakisila ka bɔ Misilan jamana lɔ, kɛɛ wo kɔ a ka limaniyabalilu bɛ halaki ai tɛma.

⁶ Ado mɛlɛka minu ma diɲa ka to ai lɔyalu lɔ mafɔ ka bɔ ai makɛya bɛlɛbɛlɛ lɔ, wolu silinin habadan jɔlɔkɔ le le divi fin mainmain nɔ, haan fɔɔ kititɛɛ lonba yi se.

⁷ Wo boloɲa kelen ma, Sɔdɔmukalu ni Gɔmɔlikalu ni ai laminin solu k'ai fɛ bila kanukɛko la, ani niikanukolu minu bɛnnin tɛ adamadenya ma. Wo le k'a kɛ, Ala k'ai latɔn habadan taa le k'ai kɛ misali le bɛ yɛ.

⁸ Wo boloɲa kelen ne ma, faɲafɔ kalanmɔɔ minu bolomalanin aiya kibalokannu ma, wolu y'ai falikolo lakɔsɔla, ka kuntiiya lagbeyaɲɛ, ani ka nii nɔɔlɔnilu lafeya minu yi haijɛnɛ.

⁹ Hali mɛlɛka kuntiiba Mingailu gbu m'a wakali ka Soitana jobaliya lafeyalikan ne, ai tɛɛ i ɲɔɔ sɔsɔla waate min nɔ ka bɛn Nabi Musa fuleni ya ko ma, mafɔ a vɛɛ: «Ǹ Tii i latɔn!»

¹⁰ Faɲafɔ kalanmɔɔ minu koni yi lafeyalikan ne fɔla ka bɛn kolu ma, ai ma minu ɲaye. Ai kɛyine iwo tuukɔlɔsoo hangilindannu, minu yi kolu kɛla ai kunfɛ, ka halaki lana ai jɛlɛ ma ko minu gbugbu sabu la.

¹¹ Gbalo y'ai yɛ! Kamasɔlɔn ai vɛ Kabila ya siya ta, ani k'ai fɛ bila Balaamu ya filibandeyako ɲɔɔzii la ka bɛn wɔliko nata ma. Ai vɛ mulutu iwo Kole ka kɛ teme, ai do yi halakile iwo wo fana.

¹² Ài vɛ ài ladɛnna badenmaya boloma feetikɛko lɔ, mɔɔ wolu yi nala tiɲali le le ài tɛma, ai vɛ tolon kɛla ài fɛ malobaliya boloma. Saakunnasiiba le ai le minu gbalanin ai jɛlɛkanu ko le dein, ka saalu to je. Ai do kɛyine iwo sanbiliya minu yi taala fɔɲɛ fɛ, sanji tɛ minu lɔ. Ai kɛyine kɔtunun iwo kɔlɔman minu tɛ ai denna hali ai den waate ka kɛ, ani kɔlɔman minu ju bɔnnin duu lɔ ka sa feu.

¹³ Ai kɛyine iwo kɔɔji kilinkilin magbɛlɛn min yi taa ni sei kɛla, aiya malobaliyakolu vɛ bɔla gbɛ la iwo kɔɔji kaanvu yi bɔla teme. Ai do kɛyine kɔtunun iwo loloni minu yi timintiminna sanma. Divi fin mainmain le ladalonin ai kanma kudein.

¹⁴ Enɔki, min tɛɛ Mema Adama bɔzɔn wolowulanna lɔsii le, wo le ka kelaya kɛ ka bɛn faɲafɔ kalanmɔɔ wolu ya ko ma, a vɛɛ: «Ài y'a ye! Mɔ Tii kɛtɔ nala aa lɔhɔlɔma mɛlɛka waa jilika jilika le,

¹⁵ ka adamaden bɛ ya kiti tɛɛ k'ai latɔn. A do kɛtɔ Alaɲasiyanɲɛbali bɛ jobaliyala ka bɛn aiya Alaɲasiyanɲɛbaliya kolu le ma, ani ka bɛn kuma yon minu fɔnin a kanma julumbutɔlu bolo minu tɛ siyanna Ala ɲa.»

¹⁶ Faɲafɔ kalanmɔɔ wolu yi kunnɔkumafɔbalu le le, ani wasabali, minu bilanin ai jɛlɛkanu niikanuko yonnu kɔ. Ai do y'ai wasola kuma babalu le le, ka mɔɔlu matɔɔ fuun nafa sɔlɔnko lɔ.

Lailikannu

¹⁷ Kɛɛ àilu, ǹ diyananmɔɔlu koni, ài y'ài hangili to kelayakumalu lɔ, minu fɔnin kɔlɔman ne mɔ Tii Masa Tɔɔmasenin Isa ya keladennu bolo.

¹⁸ Ai do k'a fɔ ài yɛ, ai vɛɛ: «Dunuɲa laban waate, lafeyalikɛbalu wulitɔ, k'ai bila ai niikanuko yonnu kɔ Alaɲasiyanɲɛbaliya boloma.»

¹⁹ Mɔɔ wolu le yi falanɲɔɔya kɛla, ai bilanin vɛ ai falikolo ladiyanankolu kɔ, ado Nii Sɛnɛyanin tɛ ai fɛ.

²⁰ Kɛɛ àilu, ǹ diyananmɔɔlu koni, ài limaniyanin kuma sɛnɛyanin minu ma, ài y'ài ɲɔɔ lasawati wolu le, ka kɛ Ala dalila Nii Sɛnɛyanin sabu la.

²¹ Ài yi to Ala ya kanundeya lɔ, ài vɛ mɔ Tii Masa Tɔɔmasenin Isa ya henandeya makɔnɔna min yi nala niimaya banbali le.

²² Mɔɔ minu yi sikala, ài yi hena wolu la,

²³ ka dɔlu lakisi k'ai fofa ka bɔ taa lɔ. A dɔgbɛlɛlu yi je, ài yi hena wolu la, kɛɛ ài y'alama wo kɛko lɔ, ka hali aiya faani gbu lagbeyaɲɛ min lakɔsɔnin ai falikolo niikanuko yonnu bolo.

Tanuli yi Ala yɛ

²⁴ Tanuli ale le yɛ min yi se k'ài matanga fɔsa ài sen kana tuu, ani min yi se ài lalɔla a ɲakɔlɔ jalakibaliya ni sawa ba boloma a nɔɔlɔ lɔ.

²⁵ Tanuli yi Ala kelenpesa le yɛ, min na mɔ lakisila mɔ Tii Masa Tɔɔmasenin Isa sabu la. Magbiliyali ni kamalangeya ni seetiiya ni kuntiiya y'a yɛ jani dunuɲa tɛɛ dan, tandainɔ, ani habadan! Amiina!