Janguba 5 - Ala Ya Salatikan Kula Kitabu

Nafolotiilu lalɔnniko

¹ Àilu nafolotiilu, ài y'ài tolomalɔ ǹ na butu! Ài yi kasi ka gbanɔ ka bɛn gbalo ma min natɔ ài masɔlɔnna.

² Àiya nafololu vɛ tiɲa, baabaalu vɛ àiya faanilu dɔn.

³ Soon vɛ àiya sanu ni wɔligbɛlu mina. Soon wo le kɛtɔ sele le ài kanma k'ài falisoo tiɲa iwo taa. Ài vɛ nafololu ladɛn ài jɛlɛ yɛ waate laban min nɔ.

⁴ Ài y'a ye! Ài n'ài bolo gbalinna baaledennu sala ma tɔɲɔli boloma, minu na àiya sɛnɛfennu kalila. Ai sala wo kasikan yi bɔla ài kanma, ado sɛnɛfen kalibalu kasikan vɛ se Seebɛtii Ala ma.

⁵ Ài vɛ àiya dunuɲalɔtɛɛ kɛ banaya lɔ k'ài jɛlɛ diyabɔ. Ài do vɛ ài jɛlɛ labuɲa iwo kolofennu ka bɛn ài kannatɛɛ lon ma.

⁶ Ài vɛ telenmande jobaliya k'a faa, min tɛɛ tɛ ài kɛlɛla.

Sawali ni Aladaliko

⁷ Wo lɔ, m̀ badenmalu, ài y'ài sawali haan fɔɔ mɔ Tii nalon yi se. Ài y'a ye sɛnɛkɛbalu yi sɛnɛfen kulugbɛlɛnnu makɔnɔna teme ka bɔ aiya sɛnɛlu lɔ sawali boloma. Ai do sawalinin yi tola haan fɔɔ sanji kunfɔlɔ ni a labannu yi na.

⁸ Àilu fana y'ài sawali, k'ài lɔgbeleya, kamasɔlɔn mɔ Tii nalon ma vɛ sulunya.

⁹ M̀ badenmalu, ài k'ài makasi i ɲɔɔ kan, fɔsa kiti kana bila ài la. Ài y'a ye, Kititɛɛba lɔnin donda la!

¹⁰ M̀ badenmalu, ài yi kelalu ya sawali ni aiya tɔlɔyalu kɛ misali le, minu ka kuma mɔ Tii tɔɔ lɔ.

¹¹ Ài y'a ye, mɔɔ minu n'ai sawalila, m'i wolu jatela duwawudennu le teme. Ài na Sedina Ayuba ya sawali mangutu mɛnna, ani ài k'a lɔn mɔ Tii ka labanko ɲuma min di a ma. Kamasɔlɔn mɔ Tii ya henandeya ni aa maɲumandeya walayine bubale.

¹² M̀ badenmalu, ǹ'i min magbeleyala ài yɛ, wo le min ne: Ài k'ài kalin. Ài k'ài kalin haijɛnɛ la, niwotɛ dunuɲa la, niwotɛ boloɲa suu suu ma. Àiya kolamina yi kɛ kolamina le, ani àiya ban yi kɛ ban ne, fɔsa ài kana kiti bila ài jɛlɛ la.

¹³ Jalasa mɔɔ dɔ y'ài tɛma min tɔlɔyanin? Wo vɛ kɛla, wo tii yi Ala dali. Jalasa mɔɔ dɔ y'ài tɛma min kɔnɔlɔdiyanin? Wo vɛ kɛla, wo tii yi baiti la.

¹⁴ Jalasa mɔɔ dɔ y'ài tɛma, min kɛnɛyanin tɛ? Wo vɛ kɛla, wo tii yi limaniyajama ɲamɔɔlu kili, ai yi Ala dali a yɛ ka tulu kɛ a kun nɔ mɔ Tii tɔɔ lɔ.

¹⁵ Aladali min kɛtɔ limaniya lɔ, wo kɛtɔ jangalotɔ lakisila, ado mɔ Tii kɛtɔ a lawulila. Ni do a k'a talan a tɛɛ vɛ julumbu dɔlu ta, wo bɛ lɔ yi kotole.

¹⁶ Wo lɔ saa, ài y'ài dalabɔ àiya julumbulu la i ɲɔɔ ɲakɔlɔ, ani ka Ala dali i ɲɔɔ yɛ, fɔsa ài yi kɛnɛya sɔlɔn. Fanga ba le yi telenmande ya Aladali la, a do yi ko ɲiala kosɛvɛ.

¹⁷ Nabi Iliya tɛɛ mɔɔnivin jɛlɛla le le iwo ǹu, kɛɛ a ka Ala dali kosɛvɛ ko san kà na, ado san ma na duukolo kɔkan sanji sawa kalo wɔɔlɔ kɔlɔ.

¹⁸ Wo kɔ, a ka Ala dali kɔtunun, ado san ka na, ani sɛnɛfennu ka fɛlɛn duukolo kɔkan.

¹⁹ M̀ badenmalu, ni ài dɔ ka fili k'i majaanya tuɲa siya la, ni mɔɔ dɔ k'a laseikɔ k'a bila tuɲa siya kɔkan,

²⁰ wo vɛ kɛla, ài y'a lɔn ko mɔɔ min n'a labɔla aa lafilili siya kɔkan, wo tii vɛ julumbutɔ wo nii lakisi ka bɔ saya ma. A do vɛ kɛ sabu le, julumbu siyama lɔ vɛ koto.