Janguba 4 - Ala Ya Salatikan Kula Kitabu

Ài y'ài fanmajii Ala yɛ

¹ Kɛlɛko ni sɔsɔyali minu y'ài tɛma, wolu bɔnin min ne? Jalasa wolu ma bɔ àiya niikanukolu le lɔ, minu y'ài kɛlɛla waate bɛ ài falikolo lɔ?

² Fen dɔ lɔɔ y'ài la min tɛ ài bolo. Wo le ài lɔla mɔɔ faala. Ài nata lanin fen dɔ kɔkan, ài do tɛ se min sɔlɔnna. Wo le ài lɔla i ɲɔɔ sɔsɔla k'i ɲɔɔ kɛlɛ. Ài yi min kɔ, wo tɛ ài bolo, kamasɔlɔn ài tɛ a dalila Ala la.

³ Ài do v'a dalila, ài tɛ fen sɔlɔnna, kamasɔlɔn ài tɛ daili kɛla a ɲa bɛlɛbɛlɛ ma, mafɔ ka bɛn ài niikanukolu le ma.

⁴ Àilu lanandeyabalilu! Ài m'a lɔn ko dunuɲa kanu yi nala Ala lagbeyaɲɛ le le? Wo lɔ, ni mɔɔ mɔɔ si y'a fɛ k'a jɛlɛ kɛ dunuɲa kanuba le, wo tii kɛtɔ a jɛlɛ kɛla Ala juu le le.

⁵ Jalasa a ài kɔnɔ ko kuma min kun t'a la min sɛvɛnin kitabu kɔnɔ, ko: «Ala na nii min bilala mɔ lɔ, a yi wo makeleyala bubale»?

⁶ Wo bɛ n'a kɛ, Ala yi nɛɛma min dila mɔ ma, wo buɲayine. Wo le y'a ma, a sɛvɛnin kitabu kɔnɔ, ko: «Ala yi mɔɔ fannɔbalu le kɛlɛla, kɛɛ a aa nɛɛma dila mɔɔ fanmajiininnu le ma.»

⁷ Wo lɔ saa, ài y'ài fanmajii Ala yɛ. Ài y'ài lɔ Soitana ɲa, a do yi bɔlile ài ma.

⁸ Ài y'ài madon Ala la, a do kɛtɔ a madonna ài la. Àilu julumbutɔlu, ài y'ài bololu lako. Àilu miliyafilatiilu, ài y'ài josokun lasɛnɛya.

⁹ Ài àiya fandanniya lɔn, k'ài josomakasi, ani k'ài ɲaji bɔ! Àiya jɛlɛ ma yi falin k'a kɛ kasi le, k'àiya kɔnɔlɔdiya kɛ niilafin ne.

¹⁰ Ài y'ài fanmajii mɔ Tii yɛ, a do kɛtɔ ài kɔlɔtala.

Limaniyamɔɔlu man kan k'i ɲɔɔ kiti

¹¹ M̀ badenmalu, ài kà kuma yon fɔ i ɲɔɔ ma. Mɔɔ min vɛ kuma yon fɔla a badenma ma niwotɛ ka a kiti, wo tii yi kuma yon fɔla Ala ya seliya le ma ka a kiti. Ni mɔɔ min vɛ seliya kitila, wo tii t'a latelenna, mafɔ k'a jɛlɛ kɛ kititɛɛba le a kunna.

¹² Seliyadiba ni kititɛɛba kelenpesa le yi je, min yi se lakisili ni halakili kɛla. Ile do i jɛlɛ yena mɔɔ suu mindɛ le k'a fɔ ko i i mɔɔɲɔɔ kiti?

Limaniyamɔɔlu man kan k'ai waso

¹³ Ài y'ài tolomalɔ ǹ na butu, àilu minu y'a fɔla ko: «Bi niwotɛ sinin, mɔ taatɔ so ba dɔ la, ka san kelen kɛ je julaya la ka tɔnɔ sɔlɔn,»

¹⁴ k'a talan ài gbu m'a lɔn min kɛtɔ ài lasɔlɔnna sinin. Àiya dunuɲalɔtɛɛ kɛnin di? A kɛnin wo lɔ bumu le le, min yi bɔla waateni kɔlɔ ka ban ka tunun.

¹⁵ Ài do ka kan k'a fɔ le ko: «Ni mɔ Tii ka diɲa, m'i tole mɔ nii la ka ko minu kɛ.»

¹⁶ Kɛɛ tandainɔ yi ne, ài y'ài wasola ka bɛn àiya fannɔbaya le ma. Waso suu wolu bɛ kɛwonyayine.

¹⁷ Wo le y'a ma, ni mɔɔ min ka koɲuma lɔn, a ka kan ka min kɛ, a do k'i ban wo ma, wo vɛ kɛla, a vɛ julumbu ta.