Janguba 3 - Ala Ya Salatikan Kula Kitabu

Limaniyamɔɔlu ka kan ka ai nɛɛ makolo teme

¹ M̀ badenmalu, ài siyama man kan ka kɛ kalanmɔɔlu le, kamasɔlɔn ài k'a lɔn ne ǹu kalanmɔɔlu ya kiti gbeleyatɔle ka timin dɔlu ta la.

² Mɔ bɛ le la yi filila ko siyama lɔ. Ni mɔɔ min tɛ filila a dalakan nɔ feu, wo tii yi mɔɔ dafanin ne le, min yi se a jɛlɛkanu falikolo makolola ko bɛ lɔ.

³ Ni mɔ ka kaafɛlɛ don soo da fɔsa a yi kolo mɔ yɛ, wo vɛ kɛla, soo ya ko bɛ kɛtɔ ǹu le le.

⁴ Ài y'ài mili kɔtunun kulunbalu ma. Hali ai buɲanin ka kɛ kosɛvɛ ani fɔɲɛ ba ka kɛ ai lasusula, kulunbɔlibalu yi sene k'ai lataa ai sawonan fannɔ kulunkala mɛsɛnnin ne.

⁵ Wo boloɲa kelen ma, hali mɔɔ nɛɛ ka kɛ i falikolo fannu lɔ dɔɔmandani dɔ le, kɛɛ a yi wasola ko babalu le la. Ài y'ài mili kɔtunun, taalolo ni a dɔɔya bɛ, a yi sene wola ba dɛgbɛ ɲɛninna.

⁶ Adamaden nɛɛ fana yi taa le le, ani telenbaliyako suu bɛ bɔya. A yi mɔ falikolo fan dɔ le le min yi mɔ falikolo lakunnin lakɔsɔla, a vɛ taa bilala maa dunuɲalɔtɛɛ bɛ la, hali a jɛlɛkanu ka kɛ ɲɛninna jahanama taa bolo.

⁷ Adamadennu yi sene niimafen suu bɛ makolola: Tuukɔlɔsoolu o, kɔnɔlu o, kɔɔjikɔlɔfennu o, ani fɔnfɔnnifennu, adamadennu do vɛ wolu bɛ makolo.

⁸ Kɛɛ adamaden nɛɛ koni, mɔɔ foi tɛ se wo makolola! Fen yon kolobali le a le, mɔɔfaa jeemun yi bɔla min nɔ.

⁹ M'i Ala tanula mɔ nɛɛ le le, ale min yi mɔ Tii ni mɔ Fa le. Mɔ do yi mɔɔlu daanna mɔ nɛɛ kelen wo le le, k'a talan ai ladannin Ala sawula le lɔ.

¹⁰ Tanuli ni daanni yi bɔla da kelen wo le lɔ. M̀ badenmalu, wo man kan ka kɛ dɛ!

¹¹ Jalasa ji diyanin ni ji kunanin bɛ yi sene bɔla kɔɔkun kelen nɔ?

¹² M̀ badenmalu, jalasa toloju yi sene k'a den zeituna la? Lɛzɛnju yi sene k'a den tolo la? Wo tɛ kɛla! Ado ji kɔɔlamaa yi bɔla kɔɔkun min nɔ, ji diyanin tɛ se bɔla kɔɔkun kelen wo lɔ.

Hangilimaya min bɔnin haijɛnɛ

¹³ Jene yi lɔnnila ni hangilima le ài tɛma? Fɔ wo tii y'a jiya a taamaɲa ɲuma fɛ ko a a kɛkolu kɛla fanmajii le lɔ hangilimaya boloma.

¹⁴ Kɛɛ ni keleya yon ni jɛlɛlafisaya ka kɛ ài josokun nɔ, wo vɛ kɛla, ài kà ài waso k'ài ban tuɲa lɔ.

¹⁵ Hangilimaya suu wo tɛ bɔla haijɛnɛ, mafɔ dunuɲa jan. Adamaden jɛlɛlalu ta le wo le, ani jinalu.

¹⁶ Kamasɔlɔn keleya ni jɛlɛlafisaya vɛ kɛla tɛɛminja, sɔsɔyali ni koyon suu bɛ yi talanna wo le ja.

¹⁷ Kɛɛ hangilimaya min yi bɔla haijɛnɛ, wo yi nala sɛnɛyali le le kunfɔlɔ le, ka josolajii tuun wo la, ani sɔniyali ni nɔya. Henandeya y'a lɔ, a do kɛkolu ɲumayanin kosɛvɛ. A do tɛ lafisayali ni filangafoya kɛla.

¹⁸ Mɔɔ minu yi baale kɛla josolajii lɔ ka josolajii ladon mɔɔlu wotɛ, baale wo tɔnɔ yi telenmandeya le le.