Janguba 2 - Ala Ya Salatikan Kula Kitabu

Limaniyamɔɔlu man kan ka lafisayali kɛ

¹ M̀ badenmalu, àilu minu limaniyanin mɔ Tii nɔɔlɔnin Masa Tɔɔmasenin Isa ma, ài kà lafisayali kɛ.

² Misali boloma, ni kɛ́ kelen ka na àiya ladɛn nɔ, a masilinin vɛ sanu koina ni faani kein ne, ani kɛ́ fandan fana ka na, a masilinin vɛ faani kolon ne,

³ ni ài do k'ài ɲabɔ faani kein tii fɛ k'a fɔ a yɛ: «Na, i sii siifen kein nɔ jan,» kɛɛ do ài vɛɛ fandanni yɛ: «I lɔ jannɔ ve», ni wo tɛ: «Na, i sii duu ma ǹ sen kɔlɔ,»

⁴ ni ài ka wo kɛ, ài ma a dɔ lafisaya a dɔ le ài tɛma, k'ài jɛlɛ kɛ kititɛɛba sɔn yonnu le?

⁵ Ài tolomalɔ, ǹ diyanan badenmalu! Jalasa Ala ma dunuɲa fandannilu ta fɔsa ai yi banaya limaniya lɔ, ani k'ai fɛ bila aa masaya la, a na min lahedi tala a kanundelu yɛ?

⁶ Kɛɛ àilu koni yi fandannilu lafeyala! Jenelu y'ai fanga siila ài kɔkan, k'ài masama kititɛɛbalu ɲakɔlɔ, ni nafolotiilu tɛ?

⁷ Wolu le tɛ kuma yon fɔla tɔɔ ɲuma wo ma, min lanin ài la?

⁸ Ni ài ka Ala ya masaya seliya latelen iwo a sɛvɛnin kitabu kɔnɔ teme, ko: «I siiɲɔɔ kanu iwo ile gbu,» wo vɛ kɛla, ài gbu v'a kɛ kobɛn.

⁹ Kɛɛ ni ài ka lafisayali kɛ, wo vɛ kɛla, ài vɛ julumbu ta, ài do vɛ jobaliya seliya bolo k'ài kɛ seliya tiɲaba le.

¹⁰ Ni mɔɔ min ka seliya lakunnin latelen, kɛɛ ni a ka koli a kelenpesa lɔ, wo vɛ kɛla, a vɛ jobaliya a bɛ lɔ.

¹¹ Kamasɔlɔn min n'a fɔla ko: «I kà jalonya kɛ», wo kelen ne n'a fɔla ko: «I kà mɔɔ faa.» Hali i ma jalonya kɛ, ni i ka mɔɔ faa, i vɛ kɛ seliya tiɲaba le.

¹² Wo le y'a ma, ài y'ài kumaɲa ni ài taamaɲa bɛ kɛ iwo mɔɔ minu ya kiti tɛɛtɔ ka bɛn seliya wo ma, min yi lafɛlɛ dila.

¹³ Kamasɔlɔn ni mɔɔ min ma hena dɔlu la, wo tii ya kiti tɛnala tɛɛla henandeya boloma. Henandeya le yi see sɔlɔnna kiti ma.

Limaniya ni kɛko ɲumalu

¹⁴ M̀ badenmalu, nafa mindɛ yi wo la ni mɔɔ dɔ k'a fɔ ko limaniya y'a bolo, k'a talan a tɛ kɛko ɲuma kɛla? Jalasa limaniya wo suu yi sene a lakisila?

¹⁵ Ni ài badenmakɛ niwotɛ ài badenmamoso dɔ ka kɛ feeyabɔtanya lɔ, ani bi balo gbu t'a bolo,

¹⁶ ni ài dɔ k'a fɔ wo tii yɛ: «Taa hɛlɛ lɔ, Ala y'i balo k'i feeyabɔ,» k'a talan a ma foi di min yi wo mako laɲia, nafa mindɛ le wo la?

¹⁷ Limaniya kɛnin wo boloɲa kelen ne ma. Ni a tɛ mɔɔ lɔla kɛko ɲumalu la, wo vɛ kɛla, limaniya wo sayine.

¹⁸ Kɛɛ ni dɔ k'a fɔ ko: «Ile limaniyayine, ǹe do yi kɛko ɲumalu le kɛla,» wo vɛ kɛla, ǹ kɛtɔ wo tii javila, ǹ ko: «Iya limaniya jiya vɛ ǹ na ka bɔ i kɛko ɲumalu kɔ, ǹe do kɛtɔ ǹa limaniya jiyala i la ka bɛn ǹ kɛko ɲumalu le ma.»

¹⁹ Jalasa i limaniyanin ko Ala kelenpesa le yi je? Wo bɛnyine feu! Hali jinalu gbu limaniyanin wo ma, ai do lɔ yi jaajaala siyan boloma.

²⁰ Ile hangilindan! I y'a fɛ a la yi gbɛ i yɛ ko nafa tɛ limaniya la ni a tɛ mɔɔ lɔla kɛko ɲumalu la?

²¹ Ala ma mɔ bema Ibulahima jate telenmande le ka bɛn a kɛkolu le ma, a ka a den Isiyaka lala salakagbalan kɔkan waate min nɔ?

²² I v'a ye ko aa limaniya ni a kɛkolu tɛɛ baalela i ɲɔɔ fɛ, ado a kɛkolu le ka aa limaniya dafa.

²³ Wo boloɲa le ma, kitabu kɔnɔlɔ kuma ma ka fa, ko: «Ibulahima ka limaniya Ala ma, ado Ala ka a jate telenmande le.» K'a dɔ la wo kɔkan, Ala k'a fɔ Ibulahima ma ko: «Ǹ tɔva.»

²⁴ Ài v'a ɲaye wo lɔ, ko mɔɔ yi jatela telenmande le Ala bolo ka bɛn a kɛkolu le ma, aa limaniyako tɛ dein.

²⁵ Wo boloɲa kelen ne ma, jalasa Ala ma sungulunbamoso Lahabu gbu jate telenmande le ka bɛn a kɛkolu le ma, a na duu lakɔlɔsibalu jiyala waate min nɔ, ka ban k'ai lataa siya gbɛlɛ fɛ?

²⁶ Kamasɔlɔn falikolo yi fen sanin ne teme ni nii t'a lɔ, wo boloɲa kelen ma, limaniya min tɛ mɔɔ lɔla kɛko ɲumalu la, wo sayine.