Janguba 1 - Ala Ya Salatikan Kula Kitabu

¹ Ǹe Janguba min yi Ala ni mɔ Tii Masa Tɔɔmasenin Isa ya jɔn ne, ǹ'i sɛvɛli min lataala Bani Isilanka kabila tan ni fila (12) le ma, minu jɛzɛnnin dunuɲa fan bɛ lɔ. Ǹ'ài fola.

Limaniya ni hangilimaya

² M̀ badenmalu, ni tɔlɔya suu suu k'ài masɔlɔn, ài yi wo bɛ jate kɔnɔlɔdiyako le.

³ Kamasɔlɔn ài k'a lɔn ne ko ni àiya limaniya lɔ ka suma, wo kɔjavi yi sawali le le.

⁴ Wo le y'a ma, fɔ àiya sawali da yi fa ka se a dan ma, fɔsa àiya ko bɛ yi dafa, ài kà dɛsɛ a suu suu la.

⁵ Ni ài dɔ dɛsɛnin ka kɛ hangilimaya la, wo tii yi Ala dali, a do yi hangilimaya dile wo tii ma. Ale le bolo fɔlinnin bɛ sɔko lɔ, makumali tɛ min nɔ.

⁶ Kɛɛ fɔ wo tii yi daili kɛ limaniya le lɔ, a do kà sika, kamasɔlɔn mɔɔ min yi sikala, wo tii kɛyine iwo kɔɔji kilinkilin min yi taa ni sei kɛla fɔɲɛ bolo.

⁷ Mɔɔ suu wo kà a mili ko a yi fen sɔlɔnne mɔ Tii la,

⁸ kamasɔlɔn miliyafilatii le a le, min tɛ tola kan kelen kan a kɛkolu bɛ lɔ.

Fandanya ni nafolotiiya

⁹ Mɔ badenma min yi bolokolon ne, wo ka kan k'a ɲalɔkɛnɛya a kɔlɔtako lɔ Ala bolo,

¹⁰ ani min yi nafolotii le, wo y'a ɲalɔkɛnɛya a majiiko lɔ Ala bolo, kamasɔlɔn a tununtɔle iwo bin feele.

¹¹ Ni tele ka bɔ ka wuyen ba sii, bin yi jale k'a feele ben, a do dalaya yi tununne. Wo boloɲa kelen ma, nafolotii tununtɔ ten ne ka bɔ a kɛkolu tɛma.

Lɔsumaliko ni manɛɛliko

¹² Mɔɔ min y'a sawalila lɔsumani lɔ, wo tii yi duwawuden ne le, kamasɔlɔn a vɛ lɔsumani manɔla, a kɛtɔ niimaya fula sɔlɔnna, min lahedi tanin Ala bolo a kanundelu yɛ.

¹³ Mɔɔ foi kà a fɔ aa manɛɛli waate lɔ, a vɛɛ: «Ala le yi m̀ manɛɛla,» kamasɔlɔn Ala ma tɛ se nɛɛla koyon bolo, a do tɛ mɔɔ foi manɛɛla.

¹⁴ Kɛɛ mɔɔ kelenkelenna bɛ ma yi nɛɛla ka bɛn a jɛlɛkanu niikanukolu le ma, minu y'a masamana k'a janva.

¹⁵ Ado niikanuko vɛ kɔnɔ tala, a yi moila julumbu le la. Julumbu do vɛ buɲala, a yi moila saya le la.

¹⁶ Ǹ diyanan badenmalu, ài kà diɲa ài la yi fili.

¹⁷ Fen ɲuma ni sɔlifen dafanin suu bɛ yi bɔla Fa Ala le fɛlɔ sanma, min na sangbolokɔnɔ mɛnɛnfennu ladanna. A tɛ jɛlɛmana ka bɔ a kɛɲa ma, ado aa kɛnɛya tɛ se nɔla divi bolo.

¹⁸ Ka bɛn a jɛlɛkanu sawonanko ma, a ka mɔ sɔlɔn kula kɛ aa tuɲa kuma sabu la, fɔsa m'i lɔya kunfɔlɔ sɔlɔn aa dannifennu bɛ tɛma.

Ala kumakan labatobalu

¹⁹ Ǹ diyanan badenmalu, ài y'a lɔn ko ài kelenkelenna bɛ y'a lateleja a tolomalɔla, k'a kunsuma kuma fɔko lɔ, ani k'a kunsuma mɔnɛla.

²⁰ Kamasɔlɔn adamadennu ya mɔnɛya tɛ Ala ya telenmandeya dafala.

²¹ Wo le y'a ma, ài yi kokɔsɔnin ni dannatimin yon bɛ dabila, k'ài bolo sii Ala kumakan kɔlɔ fanmajii boloma, a na min donna ài josokun nɔ, min yi se k'ài nunakili lakisi.

²² Ài yi kɛ Ala kumakan labatobalu le. Ài do kà kɛ a lamɛnba le dein, k'ài jɛlɛ lafili wo le.

²³ Kamasɔlɔn ni mɔɔ k'a tolomalɔ Ala kumakan na, a do ma diɲa a labatoko ma, wo vɛ kɛla, wo tii kɛyine iwo mɔɔ min y'a ɲakɔlɔla lasaala duwalen nɔ,

²⁴ a ban kɔ a jɛlɛ lasaala, a vɛ taala ka ɲina a kɛɲa lɔ telemanin.

²⁵ Kɛɛ Ala ya seliya dafanin min yi lafɛlɛ dila, ni mɔɔ min ka wo lasaa kobɛn k'i lɔja a latelenko ma, ni a do m'a tolomalɔ a la dein ka ban ka ɲina a lɔ, wo vɛ kɛla, wo tii lasawatitɔ a kɛkolu bɛ le lɔ.

²⁶ Ni mɔɔ dɔ k'a jɛlɛ jate diinamɔɔ le, k'a talan a tɛ a nɛɛ kunmafɛlɛnna, wo tii y'a jɛlɛ le manɛɛla, ado aa diinako yi kofuun ne le.

²⁷ Diina siya min sɛnɛyanin mɔ Fa Ala ɲakɔlɔ, fɛɛ pa tɛ min na, wo le k'i jando failanilu ni kɛsamosolu lɔ aiya tɔlɔya waate lɔ, ani k'i jɛlɛ matanga dunuɲa kokɔsɔnin bɛ ma.