Hebululu 9 - Ala Ya Salatikan Kula Kitabu

Ala batoko duukolo kɔkan ani haijɛnɛ kɔnɔ

¹ Salatikan kunfɔlɔ lɔ, jamali dɔlu tɛɛ je ka bɛn Ala batokɛɲa ma, ani aa lɔhɔlɔma batokɛya duukolo kɔkan.

² Wo ma, ai ka Lɔhɔlɔma Gbaa ladan, k'a kɔnɔla lɔtala fila le. Ai y'a fɔla a kɔnɔla kunfɔlɔ ma ko Lɔhɔlɔma Dingila. Fitinasiiya tɛɛ je, ani tabali, ani bulu minu lasenin tɛɛ Ala ma.

³ Ado daladɛnfaani filana kɔma, wo tɛɛ a kɔnɔla filana le le, ai y'a fɔla min ma ko Lɔhɔlɔma Dingila Bɛlɛbɛlɛ.

⁴ Wusulan salakagbalan sanulamaa tɛɛ je ani salatikan kesu, sanu tɛɛ a fan bɛ ma. Sanu daa dɔ tɛɛ kesu wo kɔnɔ, mana tɛɛ min kɔnɔ, ani Sedina Haluna ya taamabele min tɛɛ v'a feelelu labɔ, ani kawa fɛlɛn fila, salatikan kumalu sɛvɛnin tɛɛ minu kɔkan.

⁵ Mɛlɛka sawula nɔɔlɔnilu, ai y'a fɔla minu ma ko Selubɛn, wolu tɛɛ kesu wo kɔkan k'ai kawa bilin kesu datuun kunma, julumbulu lɔ tɛɛ kotola tɛɛminja. Kɛɛ mɔ tɛ se ko min bɛ ɲafɔla yi ne butu.

⁶ Lɔhɔlɔma Gbaa ni a kɔnɔlɔfennu lɔ ka bɛn ten ne, ado salakalasebalu le tɛɛ donna a kɔnɔla kunfɔlɔ lɔ waate bɛ k'aiya baale kɛ.

⁷ Kɛɛ salakalase kuntiiba kelenpesa le tɛɛ donna a kɔnɔla filana lɔ siɲa kelen ne san kɔlɔ. A do tɛɛ tɛ donna je ni a ma na kolofen jeli le, fɔsa a tɛɛ wo bɔ salaka le ka bɛn a jɛlɛkanu ya julumbulu ma, ani jama talu, ai na minu tala k'a talan ai m'a lawulilama.

⁸ Nii Sɛnɛyanin y'a lagbɛla ko minu fɛ, ko siya tɛɛ ma jiya ba ka don Lɔhɔlɔma Dingila Bɛlɛbɛlɛ kɔnɔ, damanda Lɔhɔlɔma Gbaa kunfɔlɔ tɛɛ lɔnin bene.

⁹ Min yi bi kolu misali le le, k'a jiya ko batokɛba josokun la tɛɛ tɛ se sɛnɛyala ka bɛn niilifen ni kolofen salakabɔko ma,

¹⁰ kamasɔlɔn wolu yi dɔnnifen ni minnifen ni jɛlɛ lasɛnɛya ko suu dɔlu le le dein. Falikolo ta tɔnnu le tɛɛ wolu le, minu lanin tɛɛ mɔɔlu kɔkan haan fɔɔ ai mafalin lon tɛɛ se.

¹¹ Kɛɛ Masa Tɔɔmasenin vɛ ban nala ka kɛ salakalase kuntiiba le ka bɛn koɲumalu ma minu yi je butu. A na timinna Lɔhɔlɔma Gbaa kɔlɔtanin kɔlɔ min dafanin bɛlɛbɛlɛ kɛ, adamadennu ma min lɔ, ado a fɛ tɛ dunuɲa dannifennu la.

¹² Masa Tɔɔmasenin ma don Lɔhɔlɔma Dingila Bɛlɛbɛlɛ kɔnɔ ka bɛn bani ni nisi bolan jeli bɔnko ma, mafɔ a jɛlɛkanu jeli bɔnko ma, a na min kɛla siɲa kelenpesa le ka ban, ka wo kɛ mɔ kunmaka le kudein.

¹³ Salakalasebalu yi bani ni tola jeli ani nisimoso buuli le seinseinna mɔɔ lakɔsɔninnu kɔkan k'ai falikolo lasɛnɛya.

¹⁴ Kɛɛ Masa Tɔɔmasenin min k'a jɛlɛ bɔ Ala yɛ salaka bɛlɛbɛlɛ le habadan Nii Sɛnɛyanin sabu la, a jeli fanga wo le yi mɔ josokun lasɛnɛyala feu, ka mɔ bɔ mɔ kɛkolu ma minu yi saya lasena mɔ ma, fɔsa m'i Ɲɛnɛmayatii Ala bato.

¹⁵ Wo le y'a ma, Isa le mɔɔwotɛlɔbɛnba le salatikan kula lɔ, fɔsa mɔɔ minu kilinin Ala bolo, wolu yi habadan balayi sɔlɔn min lahedi tanin. Kamasɔlɔn saya le kɛnin mɔɔlu kunmakako lɔ k'ai bɔ aiya hakɛlu lɔ, ai na minu tala salatikan kunfɔlɔ waate lɔ.

¹⁶ Ni kɛɛtasɛvɛ la ka dan, fɔ seleya yi kɛ je min y'a jiya ko mɔɔ min na sɛvɛ wo ladanna, wo tii vɛ sa.

¹⁷ Kamasɔlɔn nafa tɛ kɛɛtasɛvɛ la, fɔ a ladanba vɛ sala. A do tɛ foi ɲia damanda wo y'a nii la.

¹⁸ Wo le y'a ma, hali salatikan kunfɔlɔ gbu la tɛɛ tɛ sii ni jeli tɛɛ ma bɔn.

¹⁹ Nabi Musa wɔlinin seliya kɔnɔ jamali bɛ lasena jama ma, a ka nisi bolan ni bani jeli dɔ ta, ani ji, ka wo seinsein kitabu ni jama bɛ kɔkan hisope filabululu le, minu silinin saasi wulɛn ne.

²⁰ A do vɛɛ ai yɛ: «Salatikan jeli le ne, Ala n'ài jamalila min latelenko la.»

²¹ Wo boloɲa kelen ma, Nabi Musa ka jeli dɔ seinsein Lɔhɔlɔma Gbaa fana kɔkan, ani aa batoli mulannu bɛ.

²² Wo lɔ, ka bɛn seliya ma, faida fen bɛ la yi sɛnɛyala jeli le le, ado julumbu lɔ tɛ se kotola ni jeli ma bɔn.

Masa Tɔɔmasenin ya salaka le yi julumbu lɔkotola

²³ Fen wolu, minu yi haijɛnɛ kɔnɔ fennu sawula le, ai la tɛɛ ka kan ka sɛnɛya wo boloɲa le ma. Kɛɛ fɔ salaka fisayaninnu tɛɛ bɔ ka bɛn haijɛnɛ kɔnɔ fen bɛlɛbɛlɛlu ma.

²⁴ Kamasɔlɔn Masa Tɔɔmasenin ma don lɔhɔlɔma dingila kɔnɔ min lɔnin adamadennu bolo, min yi fen bɛlɛbɛlɛ sawula le dein. Kɛɛ a jɛlɛnin haijɛnɛ gbugbu le kɔnɔ, fɔsa a yi lɔ Ala ɲakɔlɔ mɔ yɛ.

²⁵ Ale ma don haijɛnɛ k'a fɔ a yi to a jɛlɛ bɔla salaka le siɲa siyama le, iwo salakalase kuntiiba yi donna lɔhɔlɔma dingila kɔnɔ teme san o san jeli dɔ le, min tɛ a jɛlɛkanu jeli le.

²⁶ Ni wo tɛ kɛ, a tɛɛ tɔlɔya masɔlɔnne siɲa siyama le ka ta dunuɲa dan waate ma. Kɛɛ dunuɲa laban waate min nɔ yi ne, a vɛ na siɲa kelen ne le ka ban, fɔsa a yi julumbu ban ka bɛn salaka ma, a na a jɛlɛ bɔla min ne.

²⁷ A latɛɛnin mɔɔlu ma teme ko ai yi sa siɲa kelen ne dein, wo kɔ, ka taa ai lɔ kititɛɛya lɔ,

²⁸ wo boloɲa kelen ne ma, Masa Tɔɔmasenin fana na kɛla salaka le siɲa kelen ne le dein, ka mɔɔ siyama ya julumbulu bɔ ai ma. A do natɔ a siɲa filana lɔ, kɛɛ wo tɛnala kɛla julumbu lɔkotoko le, mafɔ ka mɔɔlu lakisi minu y'a nalon makɔnɔna.