Hebululu 8 - Ala Ya Salatikan Kula Kitabu

Isa le mɔɔwotɛlɔbɛnba le salatikan kula lɔ

¹ Maa kuma bɛ kun yi min ne, wo le ne: Salakalase kuntiiba wo suu yi mɔ bolo, min siinin Masa Kɔlɔtaninba ya masayasiifen bolokini fannɔ haijɛnɛ,

² a vɛ baale kɛla lɔhɔlɔma dingilalu lɔ, Lɔhɔlɔma Gbaa bɛlɛbɛlɛ kɔlɔ, mɔ Tii gbu na min lɔla, adamadennu ma min lɔ.

³ Komi salakalase kuntiiba kelenkelenna bɛ la yi siila niilifen ni kolofen salakabɔko le lɔ, wo lɔ, ale fana tɛɛ ka kan ka fen dɔ sɔlɔn, a yi min bɔ salaka le.

⁴ Ni a tɛɛ kɛ dunuɲa, a tɛɛ tɛnala kɛla salakalaseba le feu, kamasɔlɔn a dɔlu yi je, minu yi salaka bɔla ka bɛn Nabi Musa ya seliya ma.

⁵ Wolu ya salakalase baale yi haijɛnɛ kɔnɔlɔkolu misali ni ai maduulen ne le dein. Kamasɔlɔn Nabi Musa tɛɛ Lɔhɔlɔma Gbaa ladan boloma waate min nɔ, Ala k'a fɔ a yɛ, a vɛɛ: «I y'alama, i yi fen bɛ ladan iwo ǹ n'a jatesiila i yɛ teme tini kɔkan.»

⁶ Kɛɛ tandainɔ, salakalase baale vɛ di Isa ma min kɔlɔtanin ka timin dɔ wolu ta la, kamasɔlɔn ale le mɔɔwotɛlɔbɛnba le salatikan kula min nɔ, wo kɔlɔtayine ka timin a kunfɔlɔ ta la, a do jusiinin lahedi fisayaninnu le kɔkan.

⁷ Tuɲa le, ni fɛɛ tɛɛ ma kɛ salatikan kunfɔlɔ la, mɔ mako tɛɛ tɛnala kɛla a filana la butu.

⁸ Kɛɛ Ala na fɛɛ le yena aa mɔɔlu la ka bɛn salatikan kɔlɔ ma, kamasɔlɔn a n'a fɔla kitabu kɔnɔ, a vɛɛ: «Ǹe ài Tii vɛɛ ko, lon dɔlu sentɔ, ǹ kɛtɔ salatikan kula tala Isilan ni Juda bonnamɔɔlu yɛ.

⁹ A do tɛnala kɛla iwo salatikan kunfɔlɔ, ǹ na min tala ai bemanu yɛ, ǹ k'ai bolo mina ka bɔ ai le Misilan jamana lɔ lon min na, kamasɔlɔn ai ma ǹa salatikan siya lataama. Wo le n'a kɛla, ǹ n'ai tola je, ǹe ài Tii y'a fɔla tan.

¹⁰ Kɛɛ lon wolu vɛ timinna, ǹe ài Tii vɛɛ ko, ǹ kɛtɔ salatikan min ne tala Bani Isilankalu yɛ: Ǹ kɛtɔ ǹa seliyalu bilala ai hangili lɔ, ani k'ai sɛvɛ ai josokun nɔ. Ǹ kɛtɔ ai Tii Ala le le, ai do kɛtɔ ǹa mɔɔlu le le.

¹¹ Ai suu suu tɛnala a siiɲɔɔma kalanna niwotɛ a badenma k'a fɔ ko: ‹I i lɔja, i yi mɔ Tii Ala lɔn,› kamasɔlɔn ai bɛ le kɛtɔ ǹ lɔnna, ka damina fandannilu ma ka taa sii seetiilu la.

¹² Ǹ kɛtɔ aiya koyonnu lɔkotola, ado ǹ hangili tɛnala tola aiya julumbulu lɔ butu.»

¹³ Ala na kumala mingɛ ka bɛn salatikan kula ma, wo ka salatikan kunfɔlɔ kɛ a kɔlɔ le, ado min vɛ kɔlɔyala, a tɛ mɔɔlu mako laɲiala butu, wo yi tunun bolo le ma.