Hebululu 7 - Ala Ya Salatikan Kula Kitabu

Mɛlikizɛdɛki ya masaya ni aa salakalasebaya

¹ Mɛlikizɛdɛki min tɛɛ Salɛmu so masa le, ani Masa Taala ya salakalaseba, wo le ka taa Nabi Ibulahima labɛn ka duwawu kɛ a yɛ, a seikɔ waate ka bɔ masakɛlu siyasaya lɔ.

² Ibulahima ka aa kɛlɛkɔlɔfennu bɛ jaa bɔ k'a di a ma. Mɛlikizɛdɛki tɔɔ kɔlɔ le ko «Masa Telenmande.» A do yi «Josolajii Masa» le le fana, kamasɔlɔn Salɛmu kɔlɔ le ko: «josolajii».

³ A fa lɔnnin tɛ, a ba lɔnnin tɛ, kumatɛ a jilijaalu ma, ado foi lɔnnin tɛ ka bɛn a sɔlɔnko ma, niwotɛ a sako. A kɛyine iwo Ala Denkɛ, kamasɔlɔn a toyine salakalasebaya la kudein.

⁴ Ài y'a ye kɛ́ min tɛɛ mɔɔba le le, kamasɔlɔn mɔ bema Ibulahima gbu ka aa kɛlɛkɔlɔfennu jaa bɔ k'a di a ma!

⁵ Salakalasebaya yi Levi bɔzɔn minu bolo, a sɛvɛnin seliya kitabu kɔnɔ ko wolu le ka kan ka jaa mina Bani Isilankalu la, minu y'ai badenmalu le, k'a talan ai bɛ bɔnin Ibulahima le lɔ.

⁶ Mɛlikizɛdɛki tɛɛ tɛ Levi bɔzɔn dɔ le, wo bɛ n'a kɛ, a ka jaa mina Ibulahima la ka duwawu kɛ a yɛ, Ala tɛɛ vɛ lahedi ta min yɛ.

⁷ Sɔsɔyali pa tɛ min nɔ, dɔɔmamɔɔ le yi duwawu sɔlɔnna mɔɔbakɔlɔ la.

⁸ Salakalaseba minu yi jaa minala yi ne, mɔɔnivin sata le wolu le. Kɛɛ Mɛlikizɛdɛki min ka jaa mina, seleyakan dinin ka bɛn wo le ma ko a a nii la.

⁹ M'i sene a fɔla kɔtunun ko Levi bɔzɔn minu yi jaa minala, wolu fana ka jaa bɔ k'a di Mɛlikizɛdɛki ma Ibulahima fɛ.

¹⁰ Kamasɔlɔn hali Levi tɛɛ ma sɔlɔn ba, a tɛɛ a bema Ibulahima falikolo lɔ, wo k'i ɲɔɔmɛn Mɛlikizɛdɛki le waate min nɔ.

¹¹ Seliya min dinin Bani Isilankalu ma, wo jusiinin tɛɛ Levi bɔzɔnnu ya salakalasebaya le kɔkan. Ni wolu ya salakalase baale tɛɛ sene mɔɔlu ya ko bɛ dafala, mindɛ lɔ mɔɔlu mako tɛɛ kɛ salakalaseba gbɛlɛ la kɔtunun iwo Mɛlikizɛdɛki, min kɛnin tɛ iwo Sedina Haluna?

¹² Ni do salakalasebaya ma ka falin, fɔ seliya fana ma yi falin ka bɛn wo ma.

¹³ Ado m'i mɔɔ min ya ko fɔla yi ne, wo tɛɛ kabila gbɛlɛ mɔɔ le le, mɔɔ foi tɛɛ ma salakalase baale kɛ salakagbalan kɔkan ka bɔ kabila min nɔ.

¹⁴ A lagbɛyine ko mɔ Tii bɔnin Juda ya kabila le lɔ, k'a talan Nabi Musa ma foi fɔ ka bɛn salakalasebaya ma kabila wo ta fannɔ.

Salakalaseba dɔgbɛlɛ min kɛnin iwo Mɛlikizɛdɛki

¹⁵ Ko min la vɛ gbɛ ka timin a kunfɔlɔ ta la: Salakalaseba dɔgbɛlɛ ka na min kɛnin iwo Mɛlikizɛdɛki.

¹⁶ A ma kɛ salakalaseba le ka bɛn seliya dɔ ma, min y'a fɔla ko fɔ mɔɔ yi bɔ kabila dɔ lɔ, kɛɛ a ka kɛ salakalaseba le ka bɛn aa niimaya banbali fanga le ma.

¹⁷ Kamasɔlɔn seleya min dinin ka bɛn a ma kitabu kɔnɔ, ko: «I yi salakalaseba le le kudein iwo Mɛlikizɛdɛki tɛɛ teme.»

¹⁸ Wo boloɲa ma, jamali kɔlɔ vɛ bɔ je ka bɛn a fangandanya ni a nafandanya le ma,

¹⁹ kamasɔlɔn Nabi Musa ya seliya ma se ko ko si dafala, ado jeisii min fisayanin, wo vɛ bɔ gbɛ la butu, m'i mɔ madonna Ala la min sabu la.

²⁰ Wo do ma kɛ Ala ya kalinni kɔ. Dɔ wolu na kɛla salakalaseba le waate min nɔ, kalinni ma talan a lɔ.

²¹ Kɛɛ Isa ka kɛ salakalaseba le ka bɛn kalinnikan ma, Ala k'a fɔ a yɛ waate min nɔ, ko: «Ǹe i Tii Ala vɛ ǹ kalin, ǹe do tɛnala m̀ miliya mafalinna. ‹I yi salakalaseba le le kudein.› »

²² Wo le n'a kɛla, Isa vɛ kɛ salati le ka bɛn salatikan fisayanin ma.

²³ Ado dɔ salakalasebalu ka siyaya, kamasɔlɔn saya ma diɲa ai yi to baale wo la.

²⁴ Kɛɛ salakalasebaya tonin Isa bolo habadan, kamasɔlɔn a a nii la kudein.

²⁵ Wo le y'a ma, a yi sene mɔɔlu lakisila feu, minu yi timinna ale fɛ k'i madon Ala la, kamasɔlɔn a a nii la kudein k'ai masolonali mina Ala ma.

²⁶ Salakalase kuntiiba min ne bɛnnin mɔ ma feu! A sɛnɛyayine, fɛɛ suu suu tɛ a la, kumatɛ kɔsɔ ma. A majaanyine julumbutɔlu la, k'a kɔlɔta haan fɔɔ ka timin sangbolo dan bɛ la poon.

²⁷ A mako t'a la iwo dɔ salakalase kuntiibalu y'a kɛla teme, ka kolofen salaka bɔ tele o tele ka bɛn ai jɛlɛkanu ya julumbulu ma kunfɔlɔ le, jani ai y'a dɔ bɔ jama ya ko lɔ, kamasɔlɔn a na wo kɛla siɲa kelen ne le ka ban, a na a jɛlɛ bɔla salaka le waate min nɔ.

²⁸ Nabi Musa ya seliya yi adamadennu lasiila salakalase kuntiibaya la, ailu ni aiya fangandanya bɛ, kɛɛ Ala ya kalinnikan min fɔnin seliya wo kɔ, wo le k'a Denkɛ lasii salakalase kuntiibaya la, min ya ko vɛ dafa habadan!