Hebululu 6 - Ala Ya Salatikan Kula Kitabu

¹ Wo le y'a ma, ài m'i taa ɲafɛ ka timin kalan kunfɔlɔlu la ka bɛn Masa Tɔɔmasenin ma, fɔsa m'i kɛ mɔɔ dafanin ne. Mɔ do man kan ka maa limaniya jusii kɔtunun, iwo mɔ ka kan ka mɔ dajoo mafalin teme ka bɔ mɔ kɛkolu ma, minu yi saya lasena mɔ ma, ka limaniya Ala ma,

² ani kalan ka bɛn maa makoliko laanalu ma, ani bololankanko, ani fulenilu lawuliko, ani habadan kiti.

³ Mɔ do kɛtɔ wo le kɛla, ni Ala ka diɲa a ma.

⁴ Ài m'i mindɛ fɔ ka bɛn mɔɔ suu wolu ma minu v'ai kɔsei ai kɛko kɔlɔlu ma kɔtunun? Mɔɔ minu vɛ bɔ divi lɔ, ka Ala ya sɔli diyaya lɔn, k'ai ta nii sɔlɔn Nii Sɛnɛyanin lɔ,

⁵ ka Ala kumakan diyaya lɔn, ani ka dunuɲa natɔ fangakolu mafɛlɛn,

⁶ ado wo bɛ n'a kɛ, ai k'ai kɔsei ai kɛko kɔlɔlu ma ka limaniya siya bila. Mɔɔ suu wolu la tɛ se seikɔla limaniya siya kɔkan kɔtunun, kamasɔlɔn ai yi Ala Denkɛ le gbaanna kɔlɔman ma kɔtunun, k'a lamaloya bala lɔ.

⁷ Ni duu min vɛ ɲiinna sanji bolo siɲa siyama le, sɛnɛfen nafatalu kɛtɔ fɛlɛnna duu wo kɔkan sɛnɛkɛbalu yɛ, kamasɔlɔn Ala vɛ balaka don duu wo lɔ.

⁸ Ni do bin woninma ni tazan gbaanzan ka fɛlɛn duu wo kɔkan, nafa tɛ kɛ a la butu. Wo lɔ, a yi halaki bolo le ma, a laban ne k'a ɲɛnin.

⁹ Mɔ diyananmɔɔlu, hali ni mɔ ka kɛ kuma minu fɔla yi ne, mɔ gbɛyine a ma ko ài yi siya bɛlɛ le kɔkan, kisiko yi sɔlɔnna min fɛ.

¹⁰ Ala tɛ telenbali le k'a fɔ ko a yi jɔ àiya baale ni àiya kanundeya ma, ài na min jiyala ka bɛn a tɔɔ ma ka mumininnu makolu laɲia, iwo ài deinin a kɛla teme hali bi.

¹¹ M'a fɛ le ài kelenkelenna bɛ sɛmɛdonnin yi to wo boloɲa kelen ma, fɔsa ài bolo kɛnin yi to ài jeisii la haan fɔɔ a laban nɔ.

¹² Wo ma, ài kà kɛ saakɔlɔ le, mafɔ ài y'ài suma mɔɔ wolu ma, minu yi Ala ya lahedi taninnu sɔlɔnna ka bɛn aiya limaniya ni aiya sawali ma.

Ala ya lahedi min ma tɛ se falinna

¹³ Ala ka lahedi ta Nabi Ibulahima yɛ waate min nɔ, komi tɔɔ gbɛlɛ tɛɛ tɛ je min buɲanin a ta le, wo le n'a kɛla, a k'i kalin a jɛlɛkanu tɔɔ la.

¹⁴ A do vɛɛ: «I yi la a la ko ǹ kɛtɔ balaka donna i lɔ, k'i bɔzɔnnu siyaya kosɛvɛ.»

¹⁵ Ibulahima do k'a sawali haan fɔɔ a ka lahedi tanin sɔlɔn.

¹⁶ Kamasɔlɔn mɔɔlu y'ai kalinna tɔɔ le la min buɲanin ka timin ai ta la, ado kalinni wo yi salatikan ne le k'a jiya ko kuma wo yi tuɲa le le, ka sɔsɔyali bɛ ban ai wotɛ.

¹⁷ Kamasɔlɔn Ala tɛɛ a fɛ le k'a lagbɛ aa lahedi sɔlɔnbalu yɛ ko a tɛnala a kolatɛɛnin mafalinna tuun, wo le k'a kɛ, a ka wo laseleya kalinni le lɔ.

¹⁸ Ka bɛn ko fila minu ma, minu ma tɛ se falinna feu, Ala do tɛ se faɲa fɔla minu lɔ, ko wolu le sabu la, ǹu minu kun kalifanin a la, mɔ sɛmɛ vɛ don kosɛvɛ, ka mɔ bolo kɛ jeisii la kpekpe, min lamalanin mɔ ɲa.

¹⁹ Jeisii wo kɛnin mɔ bolo fen ne le, mɔ nii bamanin min kɔkan, min yi donna daladɛnfaani kɔma ka se lɔhɔlɔmabonba kɔnɔlɔbon ma,

²⁰ Isa kɛnin mɔɔ kunfɔlɔ le ka don tɛɛminja mɔ ɲa mɔ madɛmɛnko lɔ, ka kɛ salakalase kuntiiba le kudein iwo Mɛlikizɛdɛki tɛɛ teme.