Hebululu 5 - Ala Ya Salatikan Kula Kitabu

¹ Salakalase kuntiiba suu suu tanin ka bɔ mɔɔlu tɛma, wo lasiiyine ka kɛ mɔɔlu ɲa le Ala ya baaleko lɔ, a vɛ niilifennu ni salakalu bɔla ka bɛn julumbulu ma.

² A do yi sene ka kolɔnbalilu ni mɔɔ filininnu lɔmina sɔniyali boloma, kamasɔlɔn ale gbu y'ai ɲɔɔzii fangandan ne le.

³ Wo le y'a ma, fɔ a yi salaka bɔ ka bɛn a jɛlɛkanu ya julumbulu ma, iwo a yi salakalu bɔla ka bɛn jama talu ma teme.

⁴ Mɔɔ tɛ se buɲa suu wo tala k'a di i jɛlɛ ma, mafɔ Ala vɛ mɔɔ min kilila, iwo a ka Sedina Haluna kili teme.

⁵ Wo boloɲa kelen ma, Masa Tɔɔmasenin ma buɲa di a jɛlɛ ma ka kɛ salakalase kuntiiba le, mafɔ Ala ka min ne fɔ a yɛ, a vɛɛ: «Ǹ Denkɛ le i le, m̀'ɛ kɛ i Fa le bi.»

⁶ Ala k'a fɔ dingila gbɛlɛ lɔ fana, ko: «I yi salakalaseba le le kudein, iwo Mɛlikizɛdɛki tɛɛ teme.»

⁷ Isa ya dunuɲalɔtɛɛ lɔ, a ka madaili ni madiyali kɛ Ala yɛ kasikan ba ni ɲaji lɔ, a see tɛɛ min yɛ k'a lakisi saya ma. Ado Ala ka aa madailikan javi ka bɛn a ɲasiyanɲɛ le ma.

⁸ Hali Ala Denkɛ le tɛɛ a le, a ka kannabatoli makalan ka bɛn aa tɔlɔyalu ma.

⁹ Aa ko da ka fa mingɛ boloɲa min ma, a ka kɛ habadan kisiko sabu le a kannabatobalu bɛ yɛ,

¹⁰ ado Ala k'a jiya ka kɛ salakalase kuntiiba le, iwo Mɛlikizɛdɛki tɛɛ teme.

Ài y'a kɛ kobɛn, ài k'i ban limaniya lɔ

¹¹ Ko siyama yi mɔ kɔnɔ ka bɛn ko min ma, kɛɛ a ɲafɔko gbeleyayine, kamasɔlɔn ài kunsumayine kolu ɲayena.

¹² Ài tɛɛ ka kan ka kɛ kalanmɔɔlu le butu waate min nɔ, kɛɛ hali bi ài mako yi kalanmɔɔ la, min y'ài kalan Ala ya kojiyanin kunfɔlɔlu la kɔtunun. Ài mako yi sinji le la, dɔnnifen lɔjanin tɛ!

¹³ Mɔɔ min yi balola sinji la, wo tii yi denɲanin ne le bene, min ma lɔnni sɔlɔn ba ka bɛn telenmandeya ma.

¹⁴ Kɛɛ dɔnnifen lɔjanin yi kɛmɔbalu ta le le, minu vɛ ai jɛlɛ kalan koɲuma ni koyon wotɛbɔ ko la.