Hebululu 4 - Ala Ya Salatikan Kula Kitabu

¹ Komi Ala vɛ ban lahedi wo tala ko m'i sene donna aa nɔningɛ lɔ, wo le y'a ma, ài m'i jando mɔ jɛlɛ lɔ, alako mɔ suu suu kana koli a sɔlɔnko la.

² Tuɲa le, Samakan Kein la ka se mɔ ma, iwo a la ka se Bani Isilankalu ma teme fuwa lɔ. Kɛɛ ai ka samakan min mɛn, wo ma foi ɲia ai ma, kamasɔlɔn ai m'ai bolo sii a kɔlɔ limaniya boloma.

³ Ǹu minu do vɛ limaniya, mɔ kɛtɔ donna nɔningɛ wo lɔ, iwo Ala n'a fɔla teme, ko: «Ǹ ka ǹ kalin mɔnɛya boloma, ǹ ko: ‹Ai tɛnala donna ǹa nɔningɛ lɔ tuun!› » A ka kuma min fɔ k'a talan aa baale tɛɛ vɛ dafa ka ta dunuɲa ladan waate ma.

⁴ Kamasɔlɔn a n'a fɔla kitabu dingila dɔ lɔ ka bɛn tele wolowulanna lon ma, ko: «A tele wolowulanna lon, Ala k'i nɔningɛ aa baale bɛ ma.»

⁵ A fɔnin dingila wo lɔ kɔtunun, ko: «‹Ai tɛnala donna ǹa nɔningɛ lɔ tuun!› »

⁶ Wo le y'a ma, a dɔlu yi je minu kɛtɔ donna nɔningɛ wo lɔ, kɛɛ Samakan Kein la ka se mɔɔ minu ma kɔlɔman ne, wolu ma don ka bɛn aiya kolobaliya le ma.

⁷ Wo le n'a kɛla, waate jaan timinnin kɔ, Ala ka lon dɔ latɛɛ kula kɛ k'a fɔ a ma ko: «bi», ka wo lase Masakɛ Dawuda fɛ iwo a sɛvɛnin teme kɔlɔman ne, ko: «Ni ài ka Ala kumakan mɛn bi, ài k'ài josokun ja.»

⁸ Kamasɔlɔn ni Sedina Josuwa tɛɛ vɛ nɔningɛ dila Bani Isilankalu ma, Ala tɛɛ tɛnala kumala wo kɔ ka bɛn lon dɔgbɛlɛ ma.

⁹ Wo lɔ saa, nɔningɛlon dɔ yi je Ala ya mɔɔlu yɛ, iwo Ala k'i nɔningɛ teme tele wolowulanna lon na.

¹⁰ Kamasɔlɔn mɔɔ min yi donna Ala ya nɔningɛ lɔ, wo tii i nɔningɛla aa baalelu ma, iwo Ala k'i nɔningɛ teme aa baalelu ma.

¹¹ Wo ma, ài m'i lɔja ka don nɔningɛ wo lɔ, fɔsa mɔ suu suu kana koli ka bɛn kolobaliya wo suu ma.

¹² Kamasɔlɔn Ala kumakan y'a nii la, a do fanga buɲanin. A damaayine ka timin siyamifan da fila bɛ la. A do yi mɔɔ sɔɔ le la ka taa se a nunakili ni a josokun dan ma, ani a kolotuunya ni a kologbɔlɔ dan ma. A yi mɔɔ miliyalu ni a josokunnɔkolu bɛ lakɔlɔsila k'ai lɔn.

¹³ Dannifen suu suu doonnin tɛ Ala ma, mafɔ ai bɛ makolonyine ani k'ai labɔ gbɛ la a ɲakɔlɔ, mɔ kɛtɔ mɔ dandɛɛla ale min yɛ.

Isa le salakalase kuntiiba le

¹⁴ Komi salakalase kuntiiba yi mɔ bolo min vɛ jɛlɛ haan fɔɔ sangbolo dingilalu lɔ, min kɛnin Ala Denkɛ Isa le, wo lɔ, ài m'i mɔ bolo kɛ maa limaniya la kpekpe, mɔ lɔnin min na.

¹⁵ Kamasɔlɔn salakalase kuntiiba min tɛ se henala mɔ la maa fangandanya lɔ, wo suu tɛ mɔ bolo, mafɔ maa salakalase kuntiiba fana ma vɛ nɛɛ boloɲa suu bɛ dɔ ma iwo ǹu, kɛɛ a do ma julumbu ta.

¹⁶ Wo le y'a ma, ài m'i madon Nɛɛmatii Ala ya masayasiifen na lanaya boloma, fɔsa a yi hena mɔ la, ka nɛɛma kɛ mɔ yɛ, ani ka mɔ madɛmɛn a waate bɛlɛ lɔ.