Hebululu 3 - Ala Ya Salatikan Kula Kitabu

Isa kɔlɔtanin vɛ Nabi Musa le

¹ Wo lɔ saa, m̀ badenma sɛnɛyaninnu, minu kilinin Ala bolo iwo ǹu, ài m'i mili Isa ma, mɔ lɔnin a la ko Ala na min kelayala k'a lasii salakalase kuntiibaya la.

² A ka kɛ lanande le a kelaba yɛ, iwo Nabi Musa tɛɛ teme aa baale bɛ lɔ Ala ya bon na.

³ Iwo bonlɔba yi buɲali sɔlɔnna teme ka timin bon gbu la, wo boloɲa kelen ma, Isa ka kan ka buɲali ba sɔlɔn ka timin Nabi Musa la.

⁴ Kamasɔlɔn bon kelenkelenna bɛ lɔnin mɔɔ le bolo, kɛɛ fen bɛ ladanba le Ala le.

⁵ Nabi Musa do ka kɛ lanande le aa baale bɛ lɔ Ala ya bon na iwo bɔiden, a vɛ seleya dila ka bɛn kolu ma minu fɔtɔ Ala bolo sinin.

⁶ Kɛɛ Masa Tɔɔmasenin ka kɛ lanande le iwo denkɛ min siinin Ala ya bon kunna. Mɔ do kɛnin aa bon ne le, ni mɔ bolo ka to maa lanaya la kpekpe, ani maa ɲalɔkɛnɛya jeisii la.

Nɔningɛ min lɔbɛnnin Ala ya mɔɔlu yɛ

⁷ Wo ma, a kɛyine iwo Nii Sɛnɛyanin n'a fɔla kitabu kɔnɔ teme, ko: «Ni ài ka Ala kumakan mɛn bi,

⁸ ài k'ài josokun ja iwo ài bemanu ka kɛ teme ai mulutu waate lɔ, ai ka ǹ lɔsuma lon min na fuwa lɔ.

⁹ Hali ài bemanu tɛɛ vɛ ǹ kɛkolu ye san binaani (40) kɔlɔ, ai ka ǹ lɔsuma tɛɛminja.

¹⁰ Wo lɔ, ǹ ka ǹ josolakuna mɔɔ wolu ma, ǹ ko: ‹Ai josokun lafilinin waate bɛ, ai do ma ǹa siyalu lɔn.›

¹¹ Wo ma, ǹ ka ǹ kalin mɔnɛya boloma, ǹ ko: ‹Ai tɛnala donna ǹa nɔningɛ lɔ tuun!› »

¹² M̀ badenmalu, ài y'ài jando ài jɛlɛ lɔ, alako miliya yon ni limaniyabaliya kana don ài suu suu josokun nɔ, min yi kɛ sabu le k'ài mataa Ɲɛnɛmayatii Ala la.

¹³ Kɛɛ do, ài yi to i ɲɔɔ sɛmɛdonna lon bɛ, damanda mɔɔ yi se a fɔla «bi», fɔsa julumbu kana ài suu suu manɛɛ k'ài josokun ja.

¹⁴ Kamasɔlɔn mɔ vɛ kɛ Masa Tɔɔmasenin lankan ne, ni mɔ bolo ka to maa lanaya kunfɔlɔ la kpekpe haan fɔɔ a laban nɔ.

¹⁵ A sɛvɛnin kitabu kɔnɔ tan ne, ko: «Ni ài ka Ala kumakan mɛn bi, ài k'ài josokun ja, iwo ài bemanu ka kɛ teme ai mulutu waate lɔ.»

¹⁶ Jenelu ka Ala kumakan mɛn ka mulutu a ma? Mɔɔ minu bɛ ka bila Nabi Musa kɔ ka bɔ Misilan, kɛlɛ?

¹⁷ Ala k'a josolakuna jenelu ma san binaani (40) kɔlɔ? Mɔɔ minu ka julumbu ta k'ai sulu to fuwa lɔ, kɛlɛ?

¹⁸ Ala kan tɛɛ jenelu ma a tɛɛ a kalinna waate min nɔ ko ai tɛnala donna aa nɔningɛ lɔ? Mɔɔ minu ka mulutu a ma, kɛlɛ?

¹⁹ Wo lɔ saa, mɔ v'a ɲaye ko ai ma se donna duu wo lɔ ka nɔningɛ sɔlɔn ka bɛn aiya limaniyabaliya le ma.