Hebululu 2 - Ala Ya Salatikan Kula Kitabu

Kisiko makawanin

¹ Wo le y'a ma, mɔ na mɔ tolomalɔla tuɲa kuma min na, fɔ m'i mɔ bolo kɛ wo la kpekpe, alako mɔ kana fili.

² Kamasɔlɔn kumakan min lasenin mɛlɛkalu bolo, ni wo la vɛ sawati haan fɔɔ a labatobalilu ni kolobalilu bɛ la vɛ tɔn iwo a bɛnnin ai ma teme,

³ ǹu do kɛtɔ mɔ gbanna di vɛ kolatɔn kunna, ni mɔ ka jɔ kisiko makawanin min suu ma? Kisiko min la ka se mɔ Tii bolo kunfɔlɔ le, wo do lamɛnbalu k'a lasawati mɔ yɛ,

⁴ k'a talan Ala gbu tɛɛ aiya seleyakan mabamala ka bɛn tɔɔmaselu ni dalajakolu ni kawanankolu ma, ani Nii Sɛnɛyanin ya senkolu, a tɛɛ minu lɔtalala iwo a ka diya a yɛ teme.

Mɔɔlu yi kisila Masa Tɔɔmasenin ne sabu la

⁵ Wo lɔ, mɔ kan yi dunuɲa kula natɔ min ma, Ala ma wo kuntiiya di mɛlɛkalu ma.

⁶ Kɛɛ mɔɔ dɔ ka seleyakan min di kitabu dingila dɔ lɔ, ko: «Mindɛ le mɔɔnivin ne k'a fɔ ko i hangili yi to a lɔ, ado adamaden yi fen suu mindɛ le k'a fɔ ko i i jando a lɔ?

⁷ I n'a lɔya dɔɔyala ka timin mɛlɛkalu ta la waateni kɔlɔ, wo kɔ, ka magbiliyali ni buɲali di a ma iwo masayafula,

⁸ ka fen bɛ bila a fanga kɔlɔ.» Ala ka fen bɛ bila mɔɔnivin fanga kɔlɔ mingɛ, a ma fen fen si to je min tɛ a fanga kɔlɔ. Wo bɛ n'a kɛ, tandainɔ mɔ tɛ fen bɛ yena a fanga kɔlɔ bene.

⁹ Kɛɛ mɔ do yi ale le yena, min lɔya ka dɔɔya ka timin mɛlɛkalu ta la waateni kɔlɔ, Isa koni, magbiliyali ni buɲali dinin a ma iwo masayafula ka bɛn aa saya tɔlɔya ma, fɔsa a tɛɛ sa bɛ yɛ ka bɛn Ala ya nɛɛma ma.

¹⁰ Fen bɛ bɔnin Ala min nɔ, ani fen bɛ yi je ale min yɛ, a tɛɛ a fɛ ka den siyama fɛ bila aa magbiliyali la. A ka bɛn a ma ka Isa ya ko dafa tɔlɔyalu lɔ, min kɛnin ɲabila le aiya kisiko lɔ.

¹¹ Isa min yi mɔɔlu lasɛnɛyala k'ai bɔ aiya julumbulu lɔ, a tɛ maloyala a fɔko le mɔɔ lasɛnɛyaninnu ma ko a badenmalu, kamasɔlɔn ai bɛ yi Fa kelen ne ma.

¹² A a fɔla Ala yɛ kitabu kɔnɔ, a vɛɛ: «Ǹ kɛtɔ iya ko fɔla m̀ badenmalu yɛ, ka baiti la i yɛ jama tɛma.»

¹³ A do vɛɛ kɔtunun: «Ǹ kɛtɔ ǹ jei siila Ala la.» A k'a fɔ kɔtunun, a vɛɛ: «Ǹe ni dennu yi jan, Ala na minu kalifala ǹ na.»

¹⁴ Komi den wolu yi mɔɔnivin ne le, wo lɔ, Isa gbu k'a fɛ bila aiya mɔɔnivinya la, fɔsa ka bɛn aa saya ma, a tɛɛ Soitana fanga tiɲa, saya fanga yi min bolo,

¹⁵ ani ka mɔɔlu lafɛlɛ minu tɛɛ vɛ aiya dunuɲalɔtɛɛ bɛ kɛ jɔnya lɔ ka bɛn saya ɲasiyanɲɛ ma.

¹⁶ A lagbɛnin ko Isa ma na mɛlɛkalu madɛmɛnko lɔ, mafɔ Ibulahima bɔzɔnnu.

¹⁷ Wo le n'a kɛla, fɔ a tɛɛ kɛ a badenmalu ɲɔɔzii le ko bɛ lɔ, fɔsa a yi kɛ salakalase kuntiiba lanande ni henande le Ala ya baale lɔ, ani ka kɛ mɔɔlu ya julumbulu lɔkotoko sabu le.

¹⁸ Komi ale gbu ka tɔlɔya aa manɛɛli waate, wo lɔ, a yi sene mɔɔlu madɛmɛnna minu bilanin manɛɛli lɔ.