Hebululu 13 - Ala Ya Salatikan Kula Kitabu

Lailikan labannu

¹ Ài yi to i ɲɔɔ kanula badenmaya boloma.

² Ài kà ɲina lonalu jiyako lɔ, kamasɔlɔn a dɔlu tonin wo le la, ai ka mɛlɛkalu jiya ai ɲina ma.

³ Ài y'ài hangili to kasodennu lɔ, k'a kɛ iwo àilu gbu le bilanin kaso la ai fɛ, ani mɔɔ jangataninnu fana iwo àilu ni wolu yi tɔlɔya kelen ne lɔ.

⁴ Fɔ bɛ yi fulu buɲa, ado fuluɲɔɔmalu ya lafen ma kà kɔsɔ, kamasɔlɔn Ala kɛtɔ jalon ni kanukɛbalu latɔnna.

⁵ Ài yi wɔliko nata bɔ àiya dunuɲalɔtɛɛ lɔ, ài sɔlɔnfennu y'ài ɲɛnɛ, kamasɔlɔn Ala n'a fɔla, a vɛɛ: «Ǹ tɛnala i bilala, kumatɛ ka m̀ ban i lɔ.»

⁶ Wo le y'a kɛla, m'i sena a fɔla lanaya boloma, ko: «Ǹ Tii le ǹ dɛmɛnba le, ǹ tɛnala siyanna foi ɲa. Adamaden yi se mindɛ kɛla ǹ na?»

⁷ Ài y'ài hangili to àiya ɲamɔɔ kɔlɔlu lɔ, minu na Ala kumakan lasena ài ma. Ài y'ài mili aiya dunuɲalɔtɛɛ labanɲa ma, ka bila ai kɔsiya kan limaniya lɔ.

⁸ Masa Tɔɔmasenin Isa tɛɛ min ne kunun, a yi wo le le bi, a do totɔ ten ne habadan.

⁹ Ài kà diɲa ài la yi fili ka bɛn kalan kaijakaija kulalu ma. A bɛnyine Ala ya nɛɛma y'ài josokun bama, jamali ko tɛ ka bɛn dɔnnifennu ma, minu tɛ ai latelenbalu wunafala tuun.

¹⁰ Salakagbalan yi mɔ bolo, ado mɔɔ minu yi baalela Alalabɛngbaa kɔlɔ, a ladaannin tɛ wolu yɛ k'a fɔ ko ai y'ai balo bɔ a kɔkan.

¹¹ Kamasɔlɔn salakalase kuntiiba yi donna kolofen minu jeli le Lɔhɔlɔma Dingila Bɛlɛbɛlɛ kɔnɔ ka bɛn julumbu lɔkoto salaka bɔko ma, soo gbutulu wolu yi ɲɛninna ai makɛya kɔɔkan.

¹² Wo le n'a kɛla, Isa fana ka tɔlɔya masɔlɔn so kɔɔkan, fɔsa a tɛɛ mɔɔlu lasɛnɛya a jɛlɛkanu jeli le.

¹³ Wo lɔ saa, ài m'i taa bɔ a ma so kɔɔkan ka aa lafeyali ɲɔɔzii sɔlɔn.

¹⁴ Kamasɔlɔn mɔ ma so sɔlɔn dunuɲa jan min totɔ je habadan, kɛɛ m'i so natɔ le ɲininna.

¹⁵ Wo lɔ saa, ài m'i tanuli kɛ salaka le min la yi sena Ala ma waate bɛ ka bɛn Isa ma, mɔ v'i lɔla a tɔɔ la bala lɔ.

¹⁶ Ài do kà ɲina koɲumakɛko lɔ, ani ka sɔniya i ɲɔɔ yɛ, kamasɔlɔn salaka suu wolu le diyanin Ala yɛ.

¹⁷ Ài y'ài ɲamɔɔlu kumakan labato k'ài fanmajii ai yɛ, kamasɔlɔn ai y'ai jandola ài nunakili lɔ, ai do kɛtɔ wo le dandɛɛli kɛla Ala yɛ. Wo le y'a ma, ài yi diɲa ɲamɔɔlu yi baale min kɛ sawa boloma. Ni ai do niila ka fin wo lɔ, wo tɛnala ài wunafala.

¹⁸ Ài yi to Ala dalila mɔ yɛ. Mɔ lanin a la k'a fɔ mɔ josolɔgbɛyine, kamasɔlɔn a lɔɔ yi mɔ la mɔ taamaɲa yi bɛn ko bɛ lɔ.

¹⁹ Ǹ'a fɔla ài yɛ k'a magbeleya, ài yi Ala dali fɔsa ǹ'i ǹ kɔsei ài ma jona.

Duwawu ni folikan laban

²⁰ Ala min yi josolajii dila, min na mɔ Tii Isa lawulila ka bɔ saya lɔ, wo min yi Saakunnasiiba Makawanin ne min na salatikan banbali lasilila a jeli bɔnko sabu la,

²¹ Ala wo yi koɲuma suu bɛ see di ài ma a sawonanko kɛko lɔ, a v'a ladiyanankolu labaalela mɔ josokun nɔ Masa Tɔɔmasenin Isa sabu la, magbiliyali yi min yɛ waate bɛ ani habadan! Amiina.

²² M̀ badenmalu, ǹ'ài madiyala, ài y'ài bolo sii ài sɛmɛdon kuma minu kɔlɔ, kamasɔlɔn ǹ na kuma dana le sɛvɛla ài ma dein.

²³ Ǹ'a fɛ ài y'a lɔn mɔ badenma Timote vɛ bɔ kaso la. Ni a ka na m̀ ma jona, ǹe ni ale kɛtɔ nala kelen ne ài fɛlɔ.

²⁴ Ài y'ài ɲamɔɔlu bɛ fo, ani mumininnu bɛ. Mɔ badenma minu bɔnin Itali jamana lɔ, wolu y'ài fola.

²⁵ Ala ya nɛɛma yi kɛ ài bɛ yɛ.