Hebululu 12 - Ala Ya Salatikan Kula Kitabu

Limaniyamɔɔlu ka kan ka tɔlɔya mina ai ma teme

¹ Komi mɔ lamininnin sele jama ba suu min ne, wo le y'a ma, ài m'i ko bɛ to je min yi mɔ lasumayala ani julumbu minu ta diyanin mɔ bolo, fɔsa m'i se bɔli manɔla min latɛɛnin mɔ ma,

² mɔ ɲa lɔnin vɛ Isa lɔ, maa limaniya jusiiba ni a dafaba yi min ne. Ka bɛn sawako wo ma min latɛɛnin tɛɛ a ma, a k'a gbaanko manɔ kɔlɔman ma, ka jɔ maloyako wo ma, a do siinin butu Ala ya masayasiifen bolokini fannɔ.

³ Ale min ka lagbeyaɲɛ wo suu manɔ julumbutɔlu bolo, ài y'ài mili a ma, fɔsa ài fali lɔ kana teeya k'ài jeitɛɛ.

⁴ Kamasɔlɔn ài m'ài lɔja ba ka julumbu kɛlɛ haan fɔɔ k'ài jeli bɔn.

⁵ Jalasa ài vɛ ɲina sɛmɛdon kuma wolu lɔ, Ala na minu fɔla ài yɛ iwo a dennu? A do vɛɛ: «Ǹ den, i kà jɔ i Tii ya makololi ma, i do falilɔ kà teeya ni a k'i makuma.

⁶ Kamasɔlɔn mɔ Tii yi mɔɔ min kanula, a yi wo tii le makolola. A do y'a bolo siila mɔɔ minu kɔlɔ iwo a dennu, a yi wolu bɛ le latɔnna.»

⁷ Wo le y'a ma, ài yi tɔlɔya mina ài ma, kamasɔlɔn Ala y'ài makolola iwo a dennu. Den mindɛ le yi je, min fa tɛ a makolola?

⁸ Ni ài do ma makololi masɔlɔn iwo a dennu bɛ deinin a masɔlɔnna teme, wo vɛ kɛla, jɛlɛwolo tɛ ài le, mafɔ ɲɔmɔden.

⁹ K'a dɔ la wo kɔkan, mɔ sɔlɔnfalu na mɔ makolola, ado mɔ n'ai buɲala. Ni wo le, mɔ Fa min yi Niitii le do? Jalasa mɔ man kan ka mɔ fanmajii ale le yɛ ka timin mɔ sɔlɔnfalu la, fɔsa m'i niimaya sɔlɔn?

¹⁰ Mɔ fanu tɛɛ mɔ makolola waateni le kɔlɔ iwo a bɛnnin tɛɛ ai ma teme. Kɛɛ Ala do yi mɔ makolola ka bɛn mɔ jɛlɛkanu nafako le ma, fɔsa mɔ fɛ yi kɛ aa sɛnɛyali la.

¹¹ Tuɲa le, makololi suu suu tɛ diyala mɔɔ yɛ a kɛ waate, a do yi kɛla a bolo niilafin ne le. Kɛɛ kɔfɛ, wo tii yi makololi wo tɔnɔ sɔlɔnne, min kɛnin josolajii ni telenmadeya le.

¹² Wo lɔ saa, ài bolo minu lɔkumunin, ani ài sen minu lɔ yi jaajaala, ài yi wolu lɔja,

¹³ ka siya telenninu ladan ài sennu yɛ, fɔsa minu yi jiila ai tɔɔ ma, wolu sen kana mua, mafɔ ka basi.

¹⁴ Ài y'ài lɔja josolajii yi kɛ àilu ni mɔɔ bɛ wotɛ, ani k'i lɔja ka taama sɛnɛyali boloma, mɔ Tii tɛ se yena min kɔ.

¹⁵ Ài y'ài jando ài jɛlɛ lɔ, fɔsa mɔɔ suu suu kana fo Ala ya nɛɛma la. Lilen yon kà fɛlɛn ài josokun nɔ min yi kɛ sabu le ka fitina lawuli mɔɔlu wotɛ ka mɔɔ siyama lakɔsɔ.

¹⁶ Ài y'ài jando ài jɛlɛ lɔ, fɔsa ài suu suu kana kɛ kanukɛba le, niwotɛ Alabuɲabali le iwo Esawu, min ka aa kɔlɔya fele kunan kelen ko lɔ.

¹⁷ Ài do k'a lɔn ne, wo timin kɔ, a tɛɛ a fɛ ka a fa ya duwawu sɔlɔn, kɛɛ a fa k'i ban. A do ma ɲa foi sɔlɔn a ma ka wo jɛlɛma, hali a tɛɛ a ɲininna ɲaji le lɔ.

¹⁸ Ài m'ài madon tini wo la, iwo Bani Isilankalu ka kɛ teme fuwa lɔ, mɔɔ yi se i bolo tuula min na, taa jamannin tɛɛ min kɔkan, ani divi fin mainmain, ani sanfɔɲɛ,

¹⁹ ani buulufɛkan, ani kumakan ba min mangan ka a lamɛnbalu lɔ madiyalila ko ai kà a dɔgbɛlɛ mɛn butu.

²⁰ Kamasɔlɔn ai tɛɛ ma se tɔn wo kɔlɔ min k'a fɔ ko: «Ni kolofen gbu ka tuu tini la, fɔ a ma yi bon kawa le k'a faa.»

²¹ Tuɲa le, ka bɛn ko wo yenko masiyan ba dɛgbɛ ma, Nabi Musa k'a fɔ, a vɛɛ: «M̀'ɛ siyan bubale haan fɔɔ ka ǹ lɔjaajaa!».

²² Kɛɛ àilu koni vɛ ài madon Ziyɔn tini la, min yi Ɲɛnɛmayatii Ala ya so le, ani Jelusalɛmu min yi haijɛnɛ, mɛlɛka waa jilika ladɛnnin tɛɛminja sawa boloma.

²³ Ài vɛ ài madon Ala den kunfɔlɔlu ya ladɛn na minu tɔɔ sɛvɛnin haijɛnɛ, ani k'i madon Ala gbu la, min yi mɔɔ bɛ ya kititɛɛba le, ani k'i madon mɔɔ telenninu niilu la minu ya ko bɛ da vɛ fa butu.

²⁴ Ài do vɛ ài madon Isa la, min yi mɔɔwotɛlɔbɛnba le salati kula lɔ, ani a jeli seinseinnin na, min yi kuma bɛlɛbɛlɛ fɔla ka timin Habila ta la.

²⁵ Wo le y'a ma, ài y'alama, ài k'i ban wo lɔ min yi kumala yi ne. Mɔɔ minu k'i ban ai laliba lɔ dunuɲa, ni kolatɔn ma polo wolu ma, wo vɛ kɛla, ǹu do? Jalasa kolatɔn yi polole mɔ ma, ni mɔ k'i ban wo lɔ min yi mɔ lalila ka bɔ haijɛnɛ?

²⁶ Wo waate lɔ, a kumakan ka duukolo lajaajaa, kɛɛ tandainɔ a vɛ lahedi ta, ko: «A vɛ to siɲa kelen, ǹ tɛnala danna duukolo lajaajaako ma dein, mafɔ sangbolo fana.»

²⁷ A n'a fɔ mingɛla ko: «A vɛ to siɲa kelen», wo v'a jiya ko dannifen bɛ lajaajaatɔ ka tunun, fɔsa fen minu la tɛ se jaajaala, wolu yi to ai nɔ lɔ kudein.

²⁸ Komi m'i masaya sɔlɔn bolo le ma min la tɛ se jaajaala, wo lɔ saa, ài m'i balika bɔ Ala yɛ k'a ladiyanan batoli kɛ buɲali ni siyan boloma.

²⁹ Kamasɔlɔn mɔ Tii Ala kɛyine iwo taa min yi fen bɛ halakila ka ban!