Hebululu 11 - Ala Ya Salatikan Kula Kitabu

Limaniya

¹ Limaniya kɔlɔ le ko ka gbɛ ko ma, mɔ jei siinin min na, ani ka la ko la, mɔ tɛ min yena.

² Fɔlɔbalu ya limaniya le na kɛla sabu le, ai ka tanuli sɔlɔn.

³ Maa limaniya le kɛnin sabu le, mɔ v'a ɲaye ko Ala ka dunuɲa ladan a kumakan ne le. Wo le n'a kɛla, fen yentalu ladannin ka bɔ fen yenbalilu le lɔ.

⁴ Habila ya limaniya le na kɛla sabu le, a ka salaka bɔ min ka diya Ala yɛ ka timin Kabila ta la. Aa limaniya ka kɛ sabu le, a ka tanuli sɔlɔn k'a jate telenmande le, kamasɔlɔn Ala k'a bolo sii aa salaka kɔlɔ. Ado ka bɛn aa limaniya ma, hali a sanin ka kɛ, a yi kumala hali bi.

⁵ Enɔki ya limaniya le na kɛla sabu le, a la ka jɛlɛ sanma, fɔsa a kana saya masɔlɔn. A do ma ye butu, kamasɔlɔn Ala le na a tala ka jɛlɛ a le. Jani a la tɛɛ jɛlɛ sanma, a ka tanuli sɔlɔn ko aa ko vɛ diya Ala yɛ.

⁶ Ka bɔ limaniya kɔ, mɔɔ tɛ se diyala Ala yɛ feu. Ni mɔɔ min y'a fɛ k'i masulunya Ala la, fɔ wo tii yi limaniya k'a fɔ ko Ala yi je, ani a yi mɔɔlu balayila minu y'a ɲininna.

⁷ Sedina Nuho ya limaniya le na kɛla sabu le, a la ka sovi mingɛ ka bɛn ko natɔlu ma minu tɛɛ ma ye ba, a ka kulunba ladan Alaɲasiyanɲɛ boloma aa bonnamɔɔlu lakisiko lɔ. Aa limaniya ka kɛ dunuɲa jobaliya sabu le, a do ka telenmandeya wo sɔlɔn min yi nala limaniya fɛ.

⁸ Nabi Ibulahima ya limaniya le na kɛla sabu le, Ala k'a kili waate min nɔ ko a yi taa jamana dɔ lɔ min natɔ kɛla a kɛɛ le kɔfɛ, a ka Ala kumakan labato. A do ka siya mina ka taa, k'a talan a tɛɛ ma a taaya lɔn.

⁹ Aa limaniya le na kɛla sabu le, a ka taa a sii lonaya la lahedi duu wo lɔ, a v'a makɛla gbaalu kɔlɔ, ale ni Isiyaka ni Janguba minu tɛɛ a kɛɛta ɲɔɔmalu le ka bɛn lahedi kelen wo ma.

¹⁰ Kamasɔlɔn Ibulahima tɛɛ so dɔ le makɔnɔna, min jusiinin kobɛn, Ala gbu na min jatesiila, ani k'a lɔ.

¹¹ Limaniya le na kɛla sabu le fana, densɔlɔn see ka di Salan ma, k'a talan a malɔnin tɛɛ ani a tɛɛ vɛ kɔlɔya, kamasɔlɔn min na lahedi tala a yɛ, a ka wo jate lanande le le.

¹² Wo boloɲa ma, ka bɔ kɛ́ kelen wo lɔ min masulunyanin tɛɛ saya la, a bɔzɔn siyama ka sɔlɔn haan fɔɔ ka wala iwo loloni minu yi sanma, ani kɔɔji kawunna kiɲɛ minu dan tɛ se lɔnna.

¹³ Mɔɔ wolu bɛ ka sa limaniya le lɔ, k'a talan ai ma fen wolu sɔlɔn minu lahedi tanin. Ai do ka to poon ka wolu ye ka sawa, ai v'i lɔla a la ko lona ni timintiminkɛba le ai le duukolo kɔkan.

¹⁴ Mɔɔ minu yi kuma suu wo fɔla, wolu y'a jiyala k'a lagbɛ ko ai yi faso le ɲininna ai jɛlɛ yɛ.

¹⁵ Ni ai tɛɛ kɛ ai milila ai bɔya ma, ai tɛɛ ɲa sɔlɔnne ka seikɔ duu wo lɔ.

¹⁶ Kɛɛ duu fisayanin dɔ lɔɔ y'ai la, min yi haijɛnɛ ta le. Wo le n'a kɛla, Ala tɛ maloyala a fɔko lɔ a ma ko ai Tii, kamasɔlɔn a na so lɔbɛnna ai yɛ.

¹⁷ Ibulahima lɔ ka suma Ala bolo waate min nɔ, aa limaniya le ka kɛ sabu le, a ka diɲa Isiyaka bɔko ma salaka le. Lahedi tanin ale min yɛ, a tɛɛ a denkɛ kelenpesa bɔ bolo le ma salaka le,

¹⁸ k'a talan Ala tɛɛ v'a fɔ a yɛ, a vɛɛ: «A fɔtɔ minu ma ko i bɔzɔn, wolu bɔtɔ Isiyaka le lɔ.»

¹⁹ Ibulahima tɛɛ kɔndɛ le bɔla ko a see yi Ala yɛ ka fulenilu lawuli ka bɔ saya lɔ. A do kɛyine iwo a na a den sɔlɔn ne la kɔtunun ka bɔ saya lɔ.

²⁰ Sedina Isiyaka ya limaniya le na kɛla sabu le, a ka duwawu kɛ Janguba ni Esawu yɛ ka bɛn sinin kolu ma.

²¹ Sedina Janguba tɛɛ sa boloma waate min nɔ, aa limaniya ka kɛ sabu le, a ka duwawu kɛ Jusufu denkɛlu yɛ kelen kelen ne, k'a bilinnin to aa taamabele kunna Ala bato boloma.

²² Sedina Jusufu sa waate ma ka sulunya mingɛ, aa limaniya le ka kɛ sabu le, a ka Bani Isilankalu bɔko fɔ Misilan jamana lɔ, ko ai vɛ kɛla taala, ai yi taa a kololu le.

²³ Nabi Musa wolobalu ya limaniya le na kɛla sabu le, a sɔlɔn kɔ, ai k'a doon kalo sawa kɔlɔ, kamasɔlɔn ai k'a ye ko denkɛ kein ne a le. Ai do ma siyan masakɛ ya jamali ɲa.

²⁴ Nabi Musa ya limaniya le na kɛla sabu le, a buɲa kɔ, a ma diɲa ai y'a fɔ a ma ko Filawuna denmoso den.

²⁵ A ka diya a yɛ a yi tɔlɔya masɔlɔn Ala ya mɔɔlu fɛ, jani a a jɛlɛ diyabɔ julumbu lɔ waateni kɔlɔ.

²⁶ A k'a ye ko ka Masa Tɔɔmasenin ya lafeyali suu masɔlɔn, wo nafa buɲayine ka timin Misilan nafolo bɛ la, kamasɔlɔn a ɲa tɛɛ balayi natɔ le la.

²⁷ Nabi Musa ya limaniya le na kɛla sabu le, a ka bɔ Misilan, a do ma siyan masakɛ ya mɔnɛ ɲa. A k'i lɔja sawali boloma iwo a ɲa lɔnin vɛ Ala lɔ, mɔɔ tɛ se min yena.

²⁸ Aa limaniya le na kɛla sabu le, a ka Timinkunna Seli kɛ, ka Bani Isilankalu lɔ jeli seinseinna, fɔsa niitamɛlɛka kana se ai denkɛ kunfɔlɔ suu suu ma.

²⁹ Bani Isilankalu ya limaniya le na kɛla sabu le, ai ka Kɔɔji Wulɛn tɛɛ iwo ai vɛ taamana duu jalan kɔkan. Misilankalu do ka wo masuma mingɛ, ai bɛ ka to kɔɔ lɔ.

³⁰ Bani Isilankalu ya limaniya le na kɛla sabu le, Jɛliko so laminin jiinnu ka ben, ai ban kɔ so mamilimilila tele wolowulan kɔlɔ.

³¹ Sungulunbamoso Lahabu ya limaniya le na kɛla sabu le, a ma halaki Alaɲasiyanɲɛbalilu fɛ, kamasɔlɔn a n'a bolo siila duu lakɔlɔsibalu kɔlɔ kobɛn.

³² Ǹ'i mindɛ fɔ butu k'a la wo kɔkan? Waate jaan tɛ m̀ bolo ka Gideyɔn ya ko fɔ, ani Balaki, ani Samawuna, ani Jefeta, ani Dawuda, ani Samuyɛli, ani kela tɔlu.

³³ Aiya limaniya le na kɛla sabu le, ai ka see sɔlɔn jamanalu ma, ka kuntiiya kɛ telenmandeya boloma, ka fennu sɔlɔn minu lahedi tanin Ala bolo, ka jalalu da latuun,

³⁴ ka taa jamanninu lasa, ka kisi siyamifan ma, ka fanga sɔlɔn aiya fangandanya lɔ, ka kɛ kɛlɛkuluba falilu le, ani ka jamana gbɛlɛ kɛlɛkɛjamalu gbɛn.

³⁵ Moso dɔlu ya limaniya le na kɛla sabu le, aiya fulenilu la ka wuli ka bɔ saya lɔ. Limaniyamɔɔ dɔlu ka tɔlɔya ba masɔlɔn mɔɔlu bolo, kɛɛ ai k'i ban ai lafɛlɛko ma, fɔsa ai la yi wuli ka niimaya bɛlɛbɛlɛ sɔlɔn.

³⁶ A dɔlu ka jɛlɛbɔnɔ ni gbusan masɔlɔn, ani jɔlɔkɔlabila ni kasolabila fana.

³⁷ A dɔlu ma ka bon kawa la, k'a dɔlu lɔtɛɛtɛɛ si le, ani k'a dɔlu faa siyamifan ne. Ai do tɛɛ timintiminna, saa gbolo ni bani gbolo vɛ ai kanna, ai bolo latɛnin vɛ, ai magbolonin vɛ, ai jangatanin vɛ.

³⁸ Dunuɲa bɛnnin tɛɛ tɛ ai ma! Ai tɛɛ timintiminna fuwalu le lɔ ani tinima dingilalu lɔ, ka kawawoo ni diɲalu kɛ ai makɛyalu le.

³⁹ Mɔɔ wolu bɛ ka tanuli sɔlɔn ka bɛn aiya limaniya le ma, k'a talan ai suu suu ma fennu sɔlɔn minu lahedi tanin.

⁴⁰ Kamasɔlɔn Ala tɛɛ vɛ ko jatesii mɔ yɛ min fisayanin, fɔsa mɔɔ wolu ya ko da kana fa ni mɔ fɛ t'a la.