Hebululu 10 - Ala Ya Salatikan Kula Kitabu

¹ Nabi Musa ya seliya kɛnin koɲuma natɔlu maduulen ne dein, kɛɛ a ma kɛ ai sawula bɛlɛbɛlɛ le. Wo le y'a ma, a tɛ se mɔɔlu ya ko dafala, minu y'ai madonna Ala la ka bɛn salaka suu kelen wolu ma, ai yi minu bɔla san o san.

² Ni wolu tɛɛ sene ka mɔɔlu ya ko dafa, ai tɛɛ sene ka salakabɔko lɔsa, kamasɔlɔn batokɛbalu la tɛɛ sɛnɛyale siɲa kelen ne ka ban, ai do tɛɛ tɛnala ai milila aiya julumbu taninnu ma kɔtunun.

³ Kɛɛ salaka wolu yi mɔɔlu hangili bilala aiya julumbulu lɔ san o san,

⁴ kamasɔlɔn tola jeli niwotɛ bani jeli tɛ se julumbulu banna feu!

⁵ Wo le y'a ma, Masa Tɔɔmasenin tɛɛ na boloma dunuɲa mingɛ, a k'a fɔ Ala yɛ, a vɛɛ: «I tɛ salaka ni niilifennu kɔ, mafɔ i na falikolo min lɔbɛnna ǹ yɛ.

⁶ Kolofen lakunnin minu vɛ ɲɛnin salaka le, wolu ma diya i yɛ, niwotɛ julumbu lɔkoto salakalu.

⁷ Wo lɔ, ǹ k'a fɔ: ‹Ala, ǹ'i jan, ǹ nanin i sawo kɛko le lɔ, iwo a sɛvɛnin teme kafa kɔnɔ ka bɛn m̀ ma.› »

⁸ Masa Tɔɔmasenin na ko kunfɔlɔ min ne fɔla, a vɛɛ: «I tɛ salaka ni niilifennu kɔ, ado kolofen lakunnin minu vɛ ɲɛnin salaka le, ani julumbu lɔkoto salakalu, wo suu suu ma diya i yɛ.» A ka wo fɔ hali salaka wolu bɛ tɛɛ bɔla ka bɛn Nabi Musa ya seliya le ma.

⁹ Wo kɔ, a k'a dɔ la wo kɔkan, a vɛɛ: «Ala, ǹ'i jan. Ǹ nanin i sawo kɛko le lɔ.» Wo boloɲa ma, a ka salatikan kɔlɔ lɔsa, fɔsa a a filana lasii.

¹⁰ Mɔ la vɛ sɛnɛya ka bɛn Ala sawonanko wo ma, kamasɔlɔn Masa Tɔɔmasenin Isa k'a falikolo bɔ salaka le siɲa kelen ne le ka ban.

¹¹ Salakalaseba bɛ y'i lɔla k'aiya baale kɛ tele o tele, ai vɛ salaka suu kelen wolu bɔla waate bɛ, k'a talan wolu tɛ se julumbulu banna feu.

¹² Kɛɛ Masa Tɔɔmasenin ban kɔ salaka kelenpesa bɔla ka bɛn julumbulu ma, a k'i sii Ala bolokini fannɔ habadan,

¹³ a yi makɔnɔlila tɛɛminja haan fɔɔ a juulu vɛ lala a sen kɔlɔ.

¹⁴ Salaka kelen wo na kɛla sabu le ka mɔɔlu ya ko dafa waate bɛ, a yi minu lasɛnɛyala.

¹⁵ Nii Sɛnɛyanin fana yi seleya wo le dila mɔ ma. A do k'a fɔ kunfɔlɔ le, a vɛɛ:

¹⁶ «Lon wolu vɛ timinna, ǹe ài Tii Ala vɛɛ ko, ǹ kɛtɔ salatikan min ne tala ai yɛ: Ǹ kɛtɔ ǹa seliyalu bilala ai hangili lɔ, ani k'ai sɛvɛ ai josokun nɔ.»

¹⁷ A do vɛɛ kɔtunun: «Ǹ hangili tɛnala tola aiya julumbulu ni ai kɛko yonnu lɔ butu.»

¹⁸ Wo lɔ saa, ni julumbu wolu lɔ vɛ koto, salakabɔko tɛnala kɛla julumbuko lɔ butu.

Ài m'i mɔ masulunya Ala la

¹⁹ Wo le y'a ma, m̀ badenmalu, mɔ lanin a la ko m'i sene donna Lɔhɔlɔma Dingila Bɛlɛbɛlɛ kɔnɔ lɔfɔlin boloma Isa jeli sabu la.

²⁰ A vɛ siya kula laka mɔ yɛ min y'a nii la, ka mɔ latimin Lɔhɔlɔma Dingila daladɛnfaani kɔma, siya min kɛnin ale gbu falikolo le.

²¹ Komi salakalase kuntiiba yi mɔ bolo min siinin Ala ya bon kunna,

²² wo le y'a ma, ài m'i mɔ masulunya Ala la josolɔgbɛya boloma, ani limaniya dafanin nɔ, mɔ josokun lasɛnɛyanin ne ka bɔ miliya yonnu ma, ani mɔ falikolo makonin ne ji sɛnɛyanin le.

²³ Ài m'i mɔ bolo kɛnin to mɔ jeisii la kpekpe, mɔ lɔnin min na, kamasɔlɔn min na lahedi tala mɔ yɛ, wo yi lanande le le.

²⁴ Ài m'i mɔ jando i ɲɔɔ nɔ, k'i ɲɔɔ lasawati kanundeya ni koɲumakɛko lɔ.

²⁵ Mɔ k'i nɔningɛ maa ladɛnko ma, iwo dɔlu deinin a kɛla teme, mafɔ k'i ɲɔɔ sɛmɛdon, k'a dɔ la wo kɔkan iwo ài yi mɔ Tii nalon masulunyatɔla yena teme.

²⁶ Kamasɔlɔn mɔ ban kɔ tuɲa lɔnna, ni mɔ ka lawulilama ka to julumbu tala, wo vɛ kɛla, salaka gbɛlɛ tɛ je butu ka bɛn maa julumbulu ma,

²⁷ mafɔ ka to kiti makɔnɔna siyan boloma, ani taa jamannin min kɛtɔ Ala juulu halakila.

²⁸ Ni mɔɔ mɔɔ tɛɛ a tewu Nabi Musa ya seliya labatoko la, ai tɛɛ wo tii faale henabaliya boloma ka bɛn sele fila niwotɛ sele sawa ya seleyakan dinin ma.

²⁹ Ni wo le, jangata suu mindɛ le kɛtɔ wo mɔɔ masɔlɔnna min na Ala Denkɛ lafeyala, ka jɔmaya kɛ Salatikan Kula jeli la min n'a lasɛnɛyala, ani ka Nii Sɛnɛyanin jɛvɛ, nɛɛma sɔlɔnnin min fɛ?

³⁰ Kamasɔlɔn mɔ ka wo lɔn ne min n'a fɔla, ko: «Tasalali yi ǹ ta le le, ǹ kɛtɔ tasalali kɛla.» A vɛɛ kɔtunun: «Mɔ Tii kɛtɔ aa mɔɔlu ya kiti tɛɛla.»

³¹ Wo yi ko masiyannin ba le le dɛ, k'a fɔ mɔɔ yi bila Ɲɛnɛmayatii Ala la!

³² Ài y'ài hangili to lon timinninu lɔ, ài bɔ kɔ divi lɔ, ài na sɛɛ gbɛlɛn ni tɔlɔya manɔla waate min nɔ.

³³ Waate dɔlu lɔ, ài tɛɛ jɛvɛli ni jangata masɔlɔnna jama ɲakɔlɔ, ado waate dɔlu lɔ fana, ài ka nɔya kɛ mɔɔ wolu yɛ minu tɛɛ wo ɲɔɔzii masɔlɔnna.

³⁴ Ài n'ài fɛ bilala kasodennu ya tɔlɔyalu la. Ai ka ài halala bɛ jaso ài tɛɛ la mingɛ, ài ka wo mina ài ma kɔnɔlɔdiya boloma, kamasɔlɔn ài tɛɛ k'a lɔn ne ko a fisamandeya ta le y'ài bolo, min tonin ài bolo.

³⁵ Wo lɔ saa, ài kà àiya lanaya sɔvɛ to je, kamasɔlɔn wo yi nala balayi ba le le.

³⁶ Ài mako yi sawali la, fɔsa ài vɛ banna Ala sawonanko kɛla, ài yi balayi sɔlɔn min lahedi tanin.

³⁷ A sɛvɛnin tan ne kitabu kɔnɔ, ko: «A vɛ to dɔni, ale min ka kan ka na, a yi na, a do ma tɛnala tamalala.

³⁸ Ǹa mɔɔ telennin kɛtɔ niimaya kɛla limaniya le boloma, kɛɛ ni a ka seikɔ a kɔma, ǹ nii la tɛnala sawala aa ko lɔ.»

³⁹ Ǹu do fɛ tɛ mɔɔ wolu la minu yi seikɔla ai kɔma ka halaki, mafɔ minu yi tola limaniya siya kɔkan ka kisi.