Hebululu 1 - Ala Ya Salatikan Kula Kitabu

Ala vɛ kuma mɔ yɛ a Denkɛ le lɔ

¹ Kɔlɔkɔlɔ le, Ala ka kuma mɔ bemanu yɛ kelalu lɔ boloɲa siyama ma ani siɲa siyama le.

² Kɛɛ waate laban min nɔ, a vɛ kuma mɔ yɛ a Denkɛ le lɔ, a na kuntiiya latɛɛla min ma aa dannifen bɛ kunna, a do na dunuɲa ladanna min sabu la.

³ Ale le Ala ya magbiliyali nɔɔlɔ le, ani a kɛɲa jiyaba bɛlɛbɛlɛ, ado dunuɲa kɔnɔlɔfen bɛ y'ai nɔ lɔ ka bɛn a kumakan fangama le ma. A ka ban mɔɔlu lasɛnɛyala k'ai julumbulu bɔ ai ma mingɛ, a ka t'i sii Masa Kɔlɔtaninba bolokini fannɔ haijɛnɛ.

Masa Tɔɔmasenin kɔlɔtanin vɛ mɛlɛkalu le

⁴ Ala Denkɛ kɔlɔ ka ta ka timin mɛlɛkalu la, iwo a na tɔɔ min sɔlɔnna, wo kɔlɔtanin ai ta le teme.

⁵ Kamasɔlɔn Ala m'a fɔ aa mɛlɛka suu suu yɛ, ko: «Ǹ Denkɛ le i le, m̀'ɛ kɛ i Fa le bi.» Niwotɛ, a ma kuma a dɔ ya ko lɔ k'a fɔ ko: «Ǹ kɛtɔ a Fa le, a do kɛtɔ ǹ denkɛ le.»

⁶ Kɛɛ Ala tɛɛ a Denkɛ kunfɔlɔ lanala dunuɲa waate min nɔ, a vɛɛ: «Fɔ Ala ya mɛlɛkalu bɛ y'a bato.»

⁷ Ala do na min ne fɔla ka bɛn mɛlɛkalu ma, a vɛɛ: «A aa mɛlɛkalu kɛla fɔɲɛ le, ani ka aa bɔidennu kɛ taamɛnɛn ne.»

⁸ Kɛɛ a na min ne fɔla ka bɛn a Denkɛ ma, a vɛɛ: «Ile Ala, i totɔ iya masayasiifen nɔ kudein, i iya masayabele minala telenmandeya bolo le ma.

⁹ I na telenmandeya le ladiyaɲɛla ka koyon lagbeyaɲɛ, wo le y'a kɛla, Ala, i Tii Ala v'i ta ka kɔnɔlɔdiya tulu kɛ i kun nɔ, k'i kɔlɔta ka timin i bilankɔɲɔɔlu la.»

¹⁰ A do k'a fɔ kɔtunun, ko: «Ǹ Tii, ile le na duukolo jusiila a damina lɔ, ado sangbolo y'i bolonɔ le le.

¹¹ Wolu bɛ kɛtɔ banna, kɛɛ ile totɔle je kudein. Ai bɛ kɔlɔyatɔle iwo faaniba yi kɔlɔyala teme.

¹² I kɛtɔ ai mamɔlɔmɔlɔla iwo pipɔ, ai do ma kɛtɔ falinna iwo faani, kɛɛ ile koni kɛtɔ tola i suu le la kudein, ani iya simaya tɛnala banna.»

¹³ Ado mɛlɛka mindɛ le yi je, Ala n'a fɔla min yɛ, ko: «Na i sii m̀ bolokini fannɔ, haan fɔɔ m̀'ɛ banna i juulu lala i sen kɔlɔ»?

¹⁴ Wo lɔ saa, mɛlɛkalu bɛ tɛ fɔɲɛ le le ani Ala ya bɔidennu, minu kelayanin mɔɔ lakisininnu madɛmɛnko lɔ?