Galatiyakalu 6 - Ala Ya Salatikan Kula Kitabu

Ài ɲɔɔ madɛmɛn ài kunkolu ma

¹ M̀ badenmalu, ni mɔɔ dɔ ka mina hakɛ dɔ la, àilu minu yi taamana ka bɛn Nii Sɛnɛyanin sawo ma, ài yi wo tii laseikɔ siya bɛlɛ kɔkan sɔniyali boloma. Kɛɛ ài jando ài jɛlɛ lɔ, àilu gbu ma kana nɛɛ ka wo ɲɔɔzii kɛ.

² Ài ɲɔɔ madɛmɛn ài kunkolu ma, wo vɛ kɛla, Masa Tɔɔmasenin ya seliya da yi fale.

³ Ni mɔɔ min k'a jɛlɛ ye mɔɔba le k'a talan a tɛ foi le, wo tii y'a jɛlɛ le manɛɛla.

⁴ Kɛɛ fɔ mɔɔ kelenkelenna bɛ y'a jɛlɛkanu kɛkolu lakɔlɔsi. Ni ai bɛnnin ka kɛ, a yi sene a jɛlɛ buɲala ka bɛn a jɛlɛkanu kɛkolu ma, a do tɛnala a jɛlɛ sumala mɔɔ gbɛlɛ ma.

⁵ Kamasɔlɔn mɔɔ kelenkelenna bɛ ka kan k'a jɛlɛkanu kunko le ta.

⁶ Mɔɔ min yi kalannadenya la ka bɛn Ala kumakan ma, wo tii ka kan ka aa kalanmɔɔ sɔ fen ɲuma suu bɛ dɔ la.

⁷ Ài k'ài jɛlɛ manɛɛ. Mɔɔ tɛ se jɛlɛbɔla Ala lɔ. Mɔɔ vɛ sɛnɛfen min sɛnɛna, i yi wo le kalila.

⁸ Ni mɔɔ min k'a falikolo ladiyanankolu sɛnɛ, wo tii kɛtɔ a halakiko le kalila. Kɛɛ do, ni mɔɔ min ka Nii Sɛnɛyanin diyanankolu sɛnɛ, wo tii kɛtɔ niimaya banbali le kalila Nii Sɛnɛyanin fɛ.

⁹ Mɔ kà sɛyɛ koɲumakɛko lɔ, kamasɔlɔn ni mɔ falilɔ ma teeya k'a dabila, mɔ kɛtɔ maa koɲuma sala sɔlɔnna a waate bɛlɛ le lɔ.

¹⁰ Wo le y'a ma, ni koɲumakɛ see ka kɛ mɔ yɛ waate min nɔ, ài m'i koɲuma kɛ bɛ yɛ, mɔ badenma limaniyamɔɔlu bɛlɛbɛlɛ le.

Lailikan ni folikan laban

¹¹ Ài yi sɛvɛli kolo baba minu lasaa, ǹ'i minu sɛvɛla ǹe gbu bolo le.

¹² Mɔɔ minu yi buɲali ɲininna mɔɔlu bolo, wolu y'a fɛ ka diyanigbeya la ài kɔkan kɛnɛkɛko lɔ. Ai do yi wo la dein fɔsa ai kana jangata masɔlɔn ka bɛn Masa Tɔɔmasenin gbaankɔlɔman ma.

¹³ Hali mɔɔ makɛnɛkɛnin wolu gbu tɛ seliya latelenna, kɛɛ ai y'a fɛ ài makɛnɛ yi kɛ, alako ai yi se ai jɛlɛ matɔɔla k'a fɔ ko ài vɛ tɔɔmase bila ài falikolo ma.

¹⁴ Ǹe koni, ǹ tɛnala ǹ jɛlɛ matɔɔla ko ko si lɔ, mafɔ mɔ Tii Masa Tɔɔmasenin Isa gbaanko kɔlɔman ma dein. Ka bɛn wo ma, dunuɲa kɛnin ǹ ɲana fen sanin ne le, ado ǹe fana yi fen sanin ne le dunuɲa ɲana.

¹⁵ Kɛnɛkɛko ni kɛnɛkɛbaliya do tɛ jatela ko le. Min yi jatela ko le, wo le ka kɛ dannifen kula le Ala bolo.

¹⁶ Hɛlɛ ni hena yi kɛ mɔɔ bɛ yɛ minu yi siya min lataamana, ani Ala ya Bani Isilankalu.

¹⁷ Ka ta bi ma, mɔɔ mɔɔ kà ǹ tɔlɔya butu, kamasɔlɔn daafɔɔ minu yi ǹ falikolo ma, wolu le y'a jiyala ko Isa ya bɔiden ne ǹ ne.

¹⁸ M̀ badenmalu, mɔ Tii Masa Tɔɔmasenin Isa ya nɛɛma yi kɛ ài yɛ. Amiina.