Galatiyakalu 5 - Ala Ya Salatikan Kula Kitabu

Ài y'ài bolo kɛ àiya lafɛlɛ la

¹ Masa Tɔɔmasenin vɛ mɔ lafɛlɛ fɔsa m'i to lafɛlɛ lɔ. Wo le y'a ma, ài y'ài lɔgbeleya. Ài do k'ài jɛlɛ bila jɔnya lɔ kɔtunun.

² Ài y'ài tolomalɔ! Ǹe Pɔli y'a fɔla ài yɛ, ni ài ka diɲa ài makɛnɛkɛko ma, wo vɛ kɛla, Masa Tɔɔmasenin na min kɛla ài yɛ, wo tɛnala ài nafala feu.

³ Ǹ'a fɔla kɔtunun k'a magbeleya, ni kɛ́ min ka diɲa a makɛnɛkɛko ma, fɔ wo tii yi Nabi Musa ya seliya lakunnin latelen diyanigbeya boloma.

⁴ Àilu minu yi telenmandeya ɲininna ka bɛn seliya latelenko ma, ài vɛ falan Masa Tɔɔmasenin na k'ài fo Ala ya nɛɛma la.

⁵ Ǹu koni jei siinin k'a fɔ ko Ala kɛtɔ mɔ jatela telenmande le, ado Nii Sɛnɛyanin yi mɔ madɛmɛnna ka wo le makɔnɔ limaniya boloma.

⁶ Damanda mɔɔ yi Masa Tɔɔmasenin Isa ya kafonɲɔɔya lɔ, i ka kɛnɛkɛ o, i ma kɛnɛkɛ o, wo foi tɛ jatela. Min yi jatela, wo le limaniya le, min yi mɔɔ lɔla koɲuma kɛla kanundeya boloma.

⁷ Ài tɛɛ bɔlila limaniya siya kɔkan kobɛn. Jene n'ài lalɔla, k'ài lakoli tuɲa labatoko ma?

⁸ Ài lakoliko wo ma bɔ Ala bolo, min n'ài kilila.

⁹ A kɛyine iwo mɔɔlu y'a fɔla teme, ko: «Sɛɛ pitinin ne yi dɛɛ lakunnin lafununna.»

¹⁰ Ǹ lanin ài la mɔ Tii ya kafonɲɔɔya lɔ ko ài tɛnala miliya gbɛlɛ tala. Ado mɔɔ min y'ài hangili ɲaamina, wo tii la kɛtɔ tɔnna, a ka kɛ mɔɔ suu suu le.

¹¹ M̀ badenmalu, ni a ka talan ǹ'i mɔɔlu kawanila hali bi ko ai y'ai makɛnɛkɛ, mindɛ lɔ ǹ'i jangata masɔlɔnna bene? Ni wo le, ǹ'i kawanili min na ka bɛn Masa Tɔɔmasenin gbaanko ma kɔlɔman ma, wo tɛɛ tɛnala kɛla mɔɔ foi kunnɔtɛɛko sabu le.

¹² Mɔɔ minu y'ài hangili ɲaamina, a tɛɛ bɛnne ǹ ɲana ni wolu tɛɛ ai jɛlɛ kɛ kɛ́ tɛnninu le!

¹³ Àilu koni m̀ badenmalu, Ala n'ài kilila ài lafɛlɛko le lɔ. Kɛɛ àiya lafɛlɛ wo kà kɛ sabu le k'ài bila ài falikolo ladiyanankolu kɔ, mafɔ ài ɲɔɔ madɛmɛn kanundeya boloma.

¹⁴ Kamasɔlɔn Ala ya seliya bɛ lakunnin yi kuma kelen min ne lɔ, ko: «I i siiɲɔɔ kanu iwo ile gbu.»

¹⁵ Kɛɛ do, ni ài ka kɛ i ɲɔɔ kinna k'i ɲɔɔ lɔfalafala, ài y'alama ài kana ài ɲɔɔ siyasa.

Ài yi taama ka bɛn Nii Sɛnɛyanin sawo ma

¹⁶ Ǹ'a fɔ ài yɛ, ài yi taama ka bɛn Nii Sɛnɛyanin sawo ma. Wo vɛ kɛla, ài tɛnala ài falikolo ladiyanankolu kɛla.

¹⁷ Kamasɔlɔn mɔ falikolo ladiyanankolu ni Nii Sɛnɛyanin diyanankolu tɛ bɛnna i ɲɔɔ ma. Ai do y'i ɲɔɔ kɛlɛla. Wo le y'a kɛla, ko min kɛ lɔɔ ài la, wo kɛ see tɛ ài yɛ.

¹⁸ Kɛɛ ni ài taamaɲa ka bɛn Nii Sɛnɛyanin sawo ma, wo vɛ kɛla, ài tɛ seliya fanga kɔlɔ butu.

¹⁹ Adamaden falikolo ladiyanankolu lankɛnɛmayanin gbesekele: kanukɛko, kokɔsɔnin, malobaliya,

²⁰ joosɔko, subaya, lagbeyaɲɛ, sɔsɔyali, keleya, josobaya, ɲangbeya, bɛnbaliya, falanɲɔɔya,

²¹ natabaya, gbɛtɔya, dannatimin tolonnu, ani wolu ɲɔɔzii gbɛlɛlu. Ǹ'ài lalila yi ne iwo ǹ n'a kɛla teme sɔ, mɔɔ minu deinin ko suu wolu kɛla, wolu tɛnala donna Ala ya masaya lɔ.

²² Kɛɛ Nii Sɛnɛyanin y'a den minu kɛla mɔɔ josokun nɔ, wolu le ne: kanundeya, josoladiya, josolajii, sawali, henandeya, ɲumaya, lanandeya,

²³ sɔniyali, ani jɛlɛlɔmina. Seliya pa tɛ je ko suu wolu kanma.

²⁴ Mɔɔ minu yi Masa Tɔɔmasenin Isa ta le, wolu vɛ ai falikolo gbaan kɔlɔman ma, wo ni a niikanukolu ani a natalu.

²⁵ Ni m'i maa dunuɲalɔtɛɛ kɛla Nii Sɛnɛyanin ne fɛ, fɔ m'i taama ka bɛn a sawo ma.

²⁶ Mɔ kà fannɔbaya kɛ, ka baa i ɲɔɔ ma, ani k'i ɲɔɔ ɲangbeya.