Galatiyakalu 4 - Ala Ya Salatikan Kula Kitabu

¹ Ǹ'a fɛ k'a dɔ la ǹ kumakan kɔkan, ǹ ko, damanda kɛɛtaba yi denni ne bene, wotɛbɔli tɛ ale ni jɔn wotɛ, k'a talan fen bɛ y'a ta le le.

² A fanmajiiyine a kunmafɛlɛnba ni aa koɲabɔbalu yɛ haan fɔɔ a fa ya waate latɛɛnin yi se.

³ Wo boloɲa kelen ma, ǹu fana ya denniya waate lɔ, mɔ tɛɛ jɔnya le lɔ dunuɲa fangatii yenbalilu bolo.

⁴ Kɛɛ Ala ya waate latɛɛnin ka se mingɛ, a ka a Denkɛ lana dunuɲa ka kɛ moso woloden ne, ka sɔlɔn seliya kɔlɔ,

⁵ fɔsa a tɛɛ mɔɔlu kunmaka minu tɛɛ seliya kɔlɔ, ka mɔ kɛ a jɛlɛkanu dennu le.

⁶ Komi Ala den ne ài le, wo lɔ, a na a Denkɛ Nii lajiila ka don mɔ josokun nɔ. Nii wo le y'a kɛla, m'i Ala kilila, mɔ vɛɛ: «Mɔ Fa!»

⁷ Wo lɔ saa, jɔn tɛ mɔ le butu, mafɔ Ala dennu. Ni mɔ vɛ kɛ Ala den ne, Ala yi ko minu ladalola a dennu yɛ, m'i mɔ ta sɔlɔnne wo lɔ.

Pɔli ya hamin ka bɛn Galatiyakalu ma

⁸ Waate lɔ, ài tɛɛ Alalɔnbaliya lɔ mingɛ, ài tɛɛ jɔnya lɔ tii dɔlu bolo, minu tɛ tii bɛlɛbɛlɛlu le.

⁹ Ài do vɛ Ala lɔn butu, niwotɛ Ala gbu vɛ ài lɔn aa mɔɔlu le. Mindɛ lɔ ài y'a fɛ k'ài kɔsei dunuɲa niimani fangandan kundannu ma k'ài kɛ wolu ya jɔnnu le kɔtunun?

¹⁰ Ài yi lon dɔlu buɲala ka timin a dɔlu la, ani kalo dɔlu ani waate dɔlu ani san dɔlu.

¹¹ M̀'ɛ siyan k'a fɔ ko ǹ na baale min kɛla ài tɛma, wo bɛ kana kɛ kofuun ne.

¹² M̀ badenmalu, ài jon jaani le, ài yi kɛ iwo ǹe, kamasɔlɔn ǹ tɛɛ ài tɛma waate min nɔ, ǹ na ǹ jɛlɛ kɛla iwo àilu. Ài do ma koyon foi kɛ ǹ na.

¹³ Ài k'a lɔn ǹa jangaloko le ka kɛ sabu le kunfɔlɔ le, ǹ ka se ài fɛlɔ ka Samakan Kein lase ài ma.

¹⁴ Hali ǹa jangaloko gbeleyanin ka kɛ ài ma, kɛɛ ài ma ǹ lafeya, niwotɛ k'ài ban ǹ nɔ. Ài do k'ài bolo sii ǹ kɔlɔ iwo Ala ya mɛlɛka dɔ, niwotɛ iwo Masa Tɔɔmasenin Isa gbu.

¹⁵ Mindɛ kɛnin ài sawanin tɛ butu iwo ài tɛɛ teme wo waate? Kamasɔlɔn ǹ'i seleya min dila k'a fɔ ko ài tɛɛ ài ɲadennu bɔle a lɔ k'ai di m̀ ma, ni wo see tɛɛ kɛ ài yɛ.

¹⁶ Jalasa m̀'ɛ kɛ ài juu le kamasɔlɔn ǹ'i tuɲa le fɔla ài yɛ?

¹⁷ Faɲafɔ kalanmɔɔ wolu fasanin ài ma, k'a talan ài nafako tɛ wo le. Ai y'a fɛ le dein k'ài mataa ǹ na, fɔsa ài yi fasa ai ma.

¹⁸ A bɛnyine ài y'ài fasa koɲuma ma waate bɛ. Wo do kà kɛ ǹ ɲakɔlɔko le dein.

¹⁹ Ǹ dennu, ǹ'i tɔlɔyala kɔtunun àiya ko le lɔ iwo moso min yi tin nɔ, haan fɔɔ Masa Tɔɔmasenin ya ko yi dafa ài josokun nɔ.

²⁰ A lɔɔ yi ǹ na ka kɛ ài tɛma ani ka ǹ kumaɲa mafalin, kamasɔlɔn ǹ kɔnɔlɔfiliyine àiya ko le bubale!

Misali ka bɛn Salan ni Hajala ma

²¹ Àilu minu y'a fɛ ka to Nabi Musa ya seliya kɔlɔ, ǹ'a fɛ k'ài maɲininga ko dɔ ma. Seliya kitabu yi min fɔla, ài tɛ wo mɛnna?

²² A sɛvɛnin ko denkɛ fila le tɛɛ Ibulahima bolo, a kelen tɛɛ jɔnmoso ta le, a tɔ kelen tɛɛ hɔlɔmoso ta le.

²³ Jɔnmoso ka denkɛ sɔlɔn iwo adamadennu yi den sɔlɔnna teme. Kɛɛ hɔlɔmoso ka denkɛ sɔlɔn ka bɛn Ala ya lahedi le ma.

²⁴ M'i sene ko minu yena misali le: Moso fila wolu yi Ala ya salatikan suu fila le jiyala. Ala na salatikan min tala Sinai tini kɔkan, Hajala yi wo le jiyala. Ai yi den minu sɔlɔnna, wolu bɛ yi jɔn ne le.

²⁵ Hajala kɛnin Sinai tini misali le le, min yi Alabu jamana lɔ. A do yi sene lala Jelusalɛmu ma bi, kamasɔlɔn ale ni a den bɛ yi jɔnya le lɔ.

²⁶ Kɛɛ Jelusalɛmu min yi haijɛnɛ, wo le hɔlɔyanin, ale le do yi mɔ woloba le.

²⁷ Kamasɔlɔn a sɛvɛnin kitabu kɔnɔ, ko: «I i kɔnɔlɔdiya, ile moso malɔnin min tɛ den sɔlɔnna! I i sawakan labɔ, ile min ma tin tɔlɔya masɔlɔn ba! Kamasɔlɔn ban kɛnin moso min nɔ, wo dennu walatɔle ka timin moso dɔ wo ta la, min yi kɛ́ kun.»

²⁸ Wo lɔ saa, m̀ badenmalu, ài sɔlɔnnin Ala ya lahedi mafako le lɔ, iwo Isiyaka.

²⁹ Wo waate lɔ, denkɛ min ka sɔlɔn iwo adamadennu yi den sɔlɔnna teme, wo tɛɛ dɔ denkɛ jangatala, min ka sɔlɔn ka bɛn Nii Sɛnɛyanin ma. A tɛɛ teme sɔ, a yi ten ne hali bi.

³⁰ Kɛɛ mindɛ sɛvɛnin kitabu kɔnɔ? A sɛvɛnin ko: «I yi jɔnmoso wo ni a denkɛ gbɛn, kamasɔlɔn jɔnmoso denkɛ ni hɔlɔmoso denkɛ tɛnala dɛnna kɛɛ kelen na.»

³¹ Wo lɔ saa, m̀ badenmalu, mɔ tɛ jɔnmoso dennu le, mafɔ hɔlɔmoso dennu.