Galatiyakalu 2 - Ala Ya Salatikan Kula Kitabu

Keladen tɔlu k'ai bolo sii Pɔli kɔlɔ

¹ San tan ni naani (14) timinnin, ǹe ni Baanabasi ka taa Jelusalɛmu kɔtunun, ado ǹ ka Tite fana bila mɔ fɛ.

² Ǹ ka taa je kamasɔlɔn Ala gbu tɛɛ v'a jiya ǹ na ko ǹ'i taa. Ǹ tɛɛ Samakan Kein min lasena siboloma gbɛlɛ mɔɔlu ma, ǹ ka wo dandɛɛli kɛ jama ɲamɔɔlu yɛ ai ta fan, fɔsa ǹ'i baale min na, ani ǹ tɛɛ min na kɔlɔman ne, wo kana kɛ kofuun ne.

³ Kɛɛ hali ǹ taamaɲɔɔ Tite min yi Gɛlɛkika le, ai ma diyanigbeya la a kɔkan a makɛnɛkɛko lɔ.

⁴ Wo ko tɛɛ vɛ wuli kamasɔlɔn faɲafɔ badenma dɔlu tɛɛ vɛ kafon mɔ kɔkan doon nɔ mɔ ɲina ma. Ai tɛɛ a fɛ ka maa lafɛlɛ lakɔlɔsi min sɔlɔnnin Masa Tɔɔmasenin ya kafonɲɔɔya lɔ, fɔsa ai yi mɔ bila jɔnya lɔ kɔtunun.

⁵ Kɛɛ mɔ ma mɔ tolomalɔ ai la hali dɔni ne, fɔsa tuɲa ka bɛn Samakan Kein ma, wo yi to a nɔ lɔ ài yɛ.

⁶ Kɛɛ mɔɔ minu kɛnin tɛɛ iwo jama ɲamɔɔlu, wolu ma foi la ǹ kun wo kɔ. Ni do mɔɔlu tɛɛ ai jatela ɲamɔɔlu le le, ǹa ko pa tɛ wo lɔ, kamasɔlɔn Ala tɛ mɔɔ lɔtɔmɔnna.

⁷ Kɛɛ ailu gbu k'a ɲaye ko Ala le na baale kalifala ǹ na ko ǹ'i Samakan Kein lase siboloma gbɛlɛ mɔɔlu ma, iwo a na baale kalifala Piyɛli la teme ko k'a lase Jahudiyalu ma.

⁸ Kamasɔlɔn Ala min na Piyɛli kɛla keladen ne Jahudiyalu tɛma, ale Ala kelen ne na ǹe fana kɛla keladen ne siboloma gbɛlɛ mɔɔlu tɛma.

⁹ Janguba ni Piyɛli ni Yohana, ai tɛɛ minu yena ɲamɔɔ balu le koni, wolu k'a ɲaye ko Ala le na ǹ kilila keladenya kanma aa nɛɛma lɔ. Wo le k'a kɛ, ai k'ai bolo la ǹe ni Baanabasi tɛɛ la, k'a jiya ko mɔ bɛ yi baalekɛɲɔɔma le le. Mɔ do ka bɛn a ma ko m'i taa siboloma gbɛlɛlu fɛlɔ, ailu yi taa Jahudiyalu fɛlɔ.

¹⁰ Ai do k'a fɔ le mɔ yɛ dein ko m'i mɔ hangili to fandannilu lɔ mɔ tɛma, ǹe gbu sɛmɛdonnin tɛɛ wo le ma.

Pɔli ni Piyɛli ya sɔsɔyali Antiyɔsi

¹¹ Kɛɛ Piyɛli ka na Antiyɔsi so kɔnɔ waate min nɔ, ǹ k'a sɔsɔ jama ɲakɔlɔ, kamasɔlɔn a lagbɛyine tɛɛ ko jo tɛɛ tɛ a bolo.

¹² Kamasɔlɔn jani mɔɔ dɔlu tɛɛ na ka bɔ Janguba fɛlɔ, Piyɛli tɛɛ dɔnni kɛla siboloma gbɛlɛ mɔɔlu le fɛ. Kɛɛ mɔɔ wolu ka na feeya, a ka wo dabila k'a jɛlɛ mataa siboloma gbɛlɛ mɔɔ wolu la, kamasɔlɔn a tɛɛ siyanna Jahudiyalu ɲa minu fasanin kɛnɛkɛko ma.

¹³ Ado Jahudiya limaniyamɔɔ tɔlu ka kafon Piyɛli kɔkan aa filangafoya lɔ. Hali Baanabasi gbu ka kafon ai kɔkan aiya filangafoya wo lɔ.

¹⁴ Ǹ k'a ye mingɛ ko ai tɛɛ tɛ tuɲa lataamana ka bɛn Samakan Kein ma, ǹ k'a fɔ Piyɛli yɛ ai bɛ ɲakɔlɔ, ǹ ko: «Hali i ka kɛ Jahudiya le, kɛɛ i v'i jɛlɛ kɛ iwo siboloma gbɛlɛ mɔɔ ka Jahudiyalu ya laanalu to je. A yi di vɛ? Mindɛ lɔ i y'a fɛ siboloma gbɛlɛ mɔɔlu yi Jahudiyalu ya laanalu lataama diyanigbeya boloma?»

Mɔɔ yi kisila limaniya le fɛ

¹⁵ Ǹu koni yi Jahudiya jɛlɛwolo le le. Mɔ kɛnin tɛ iwo siboloma gbɛlɛ julumbutɔlu.

¹⁶ Kɛɛ wo bɛ n'a kɛ, mɔ k'a lɔn ne ko mɔɔ tɛ se jatela telenmande le Ala ɲakɔlɔ ka bɛn seliya latelenko ma, kɛɛ wo yi kɛla ka bɛn limaniya le ma Masa Tɔɔmasenin Isa ma. Wo le y'a kɛla, ǹu fana vɛ limaniya Masa Tɔɔmasenin Isa ma, fɔsa m'i kɛ telenmande le Ala ɲakɔlɔ ka bɛn maa limaniya ma, kɛɛ seliya latelenko tɛ. Kamasɔlɔn mɔɔ mɔɔ tɛnala kɛla telenmande le Ala ɲakɔlɔ ka bɛn seliya latelenko ma.

¹⁷ Kɛɛ ni ǹu y'a fɛ ka telenmandeya ɲinin Masa Tɔɔmasenin sabu la, ni wo ka talan ǹu Jahudiyalu fana vɛ ye julumbutɔ le, jalasa wo y'a jiyale k'a fɔ ko Masa Tɔɔmasenin le na mɔ lɔla julumbu tala? Wo tɛ dɛ!

¹⁸ Kamasɔlɔn ni ǹ ka seliyako lasawati, ǹ na min lɔtiɲala, wo vɛ kɛla, m̀'ɛ ǹ jɛlɛ kɛ seliya tiɲaba le.

¹⁹ Ǹe koni, seliya ta fannɔ, ǹ sayine seliya gbu sabu la, fɔsa ǹ'i niimaya kɛ Ala yɛ.

²⁰ M̀'ɛ gbaan Masa Tɔɔmasenin fɛ kɔlɔman ma. Wo lɔ, ǹe gbu tɛ ǹ nii la butu, mafɔ Masa Tɔɔmasenin le a nii la ǹ nɔ. Ǹ'i ǹa dunuɲalɔtɛɛ min kɛla ǹ falikolo lɔ yi ne, ǹ'i wo kɛla ka bɛn limaniya le ma Ala Denkɛ ma, min na ǹ kanula k'a jɛlɛ di ǹa ko lɔ.

²¹ Ǹ tɛ m̀ banna Ala ya nɛɛma lɔ, kamasɔlɔn ni mɔɔ tɛɛ sene ka kɛ telenmande le Ala ɲakɔlɔ seliya latelenko fɛ, wo vɛ kɛla, Masa Tɔɔmasenin sayine fuun!