Galatiyakalu 1 - Ala Ya Salatikan Kula Kitabu

¹ Ǹe Keladen Pɔli le yi lɛtɛlɛ min sɛvɛla, ǹe min kelayanin tɛ adamadennu bolo, kumatɛ mɔɔlu ya seetiiya ma, mafɔ Masa Tɔɔmasenin Isa ani mɔ Fa Ala min na a lawulila ka bɔ saya lɔ.

² Mɔ badenma minu yi ǹ fɛ jan, wolu bɛ vɛ kafon ǹ kɔkan ka lɛtɛlɛ min lataa limaniyajamalu ma minu yi Galatiya koovi lɔ.

³ Mɔ Fa Ala ani mɔ Tii Masa Tɔɔmasenin Isa ya nɛɛma yi kɛ ài yɛ, k'ài josolajii.

⁴ Ka bɛn mɔ Fa Ala sawo ma, Isa k'a jɛlɛ di salaka le ka mɔ lakisi maa julumbulu ma, ani ka mɔ lafɛlɛ ka mɔ bɔ dunuɲa yon min fanga kɔlɔ.

⁵ Magbiliyali yi Ala yɛ waate bɛ ani habadan. Amiina!

Samakan Kein kelenpesa le yi je

⁶ M̀'ɛ tɛɛnɛ àiya ko la, kamasɔlɔn Ala min n'ài kilila ka bɛn Masa Tɔɔmasenin ya nɛɛma ma, ài vɛ ài kɔdon a la jona ka bila ko gbɛlɛ kɔ, ai y'a fɔla min ma ko samakan kein.

⁷ A tɛ k'a fɔ ko Samakan Kein dɔgbɛlɛ le yi je, kɛɛ mɔɔ dɔlu y'ài tɛma minu y'ài hangili ɲaamina k'ai lɔja ka Masa Tɔɔmasenin ya Samakan Kein mafalin.

⁸ Kɛɛ hali ǹu gbu niwotɛ mɛlɛka dɔ ka bɔ haijɛnɛ ka na samakan kein dɔgbɛlɛ lase ài ma, min bɔnin mɔ ta fɔnin kunfɔlɔ ma, wo vɛ kɛla, daan yi kɛ wo tii kɔ!

⁹ Mɔ vɛ ban a fɔla, ǹe do y'a fɔla yi ne kɔtunun: Ni mɔɔ mɔɔ ka samakan kein dɔgbɛlɛ lase ài ma, min bɔnin mɔ ta ma, ài n'ài bolo siila min kɔlɔ, wo vɛ kɛla, daan yi kɛ wo tii kɔ!

¹⁰ Jalasa ǹ'i adamadennu ya matɔɔli le ɲininna yi ne, baa Ala ta? Jalasa ǹ'a fɛ ǹa ko yi diya mɔɔlu le yɛ? Ni ǹ tɛɛ a fɛ ǹa ko yi diya mɔɔlu yɛ kɔtunun, ǹ tɛɛ tɛnala kɛla Masa Tɔɔmasenin ya bɔiden ne.

Pɔli ka kɛ Isa ya keladen ne teme

¹¹ M̀ badenmalu, ǹ'a fɛ ài y'a lɔn ko ǹ na Samakan Kein min lasena ài ma, wo ma bɔ adamaden bolo.

¹² M̀ m'a sɔlɔn mɔɔ suu suu la, ado mɔɔ mɔɔ ma ǹ kalan a la, kɛɛ Masa Tɔɔmasenin Isa gbu le na a lankɛnɛmayala ǹ yɛ.

¹³ Ài ka m̀ mangan mɛn ǹ tɛɛ taamana teme Jahudiya diina siya kɔkan, m̀'ɛ Ala ya limaniyajama jangatala henabaliya boloma, ka ǹ lɔja ai halakiko lɔ.

¹⁴ Ado ǹ tɛɛ vɛ timin ǹ kaɲa siyama la Jahudiya diina lɔ, kamasɔlɔn ǹ tɛsilinin tɛɛ m̀ bemanu ya laanalu lakanako la kosɛvɛ.

¹⁵ Kɛɛ jani m̀ woloba ɲuma tɛɛ jii ǹ ne, Ala na m̀ bilala ǹ ta fan ka ǹ kili aa bɔidenya kanma ka bɛn aa nɛɛma ma. Waate lɔ, a ka diya Ala yɛ

¹⁶ ka a Denkɛ lankɛnɛmaya ǹ yɛ, fɔsa ǹ'aa ko lase siboloma gbɛlɛ mɔɔlu ma. Wo ka kɛ mingɛ, m̀ ma hangili ɲinin mɔɔ foi la.

¹⁷ Ǹe do ma taa keladennu fɛlɔ Jelusalɛmu minu kɛnin keladen ne ǹ ɲa, mafɔ ǹ ka taa Alabu jamana le lɔ bene. Wo kɔ, ǹ ka ǹ kɔsei Damase so kɔnɔ.

¹⁸ San sawa timinnin, ǹ ka taa bɔ Piyɛli ma Jelusalɛmu fɔsa m'i ɲɔɔ lɔn. Ado ǹ ka tele tan ni loolu (15) kɛ a fɛ.

¹⁹ Kɛɛ m̀ ma ǹ ɲa la keladen dɔgbɛlɛ kɔkan, mafɔ mɔ Tii Isa dɔɔni Janguba.

²⁰ Ǹ'i min sɛvɛla ài ma yi ne, Ala le ǹ sele le k'a fɔ ko faɲa tɛ wo le.

²¹ Wo kɔ, ǹ ka taa Siliya ni Silisiya koovilu lɔ.

²² Kɛɛ Masa Tɔɔmasenin ya limaniyajama minu yi Jude koovi lɔ, wolu tɛɛ ma ǹ lɔn.

²³ Kɛɛ ai k'a mɛn ne dein ko: «Kɛ́ min tɛɛ mɔ jangatala kɔlɔman ne, wo le yi kawanili kɛla butu ka bɛn limaniya ma, a tɛɛ a lɔjala ka min halaki.»

²⁴ Ai do ka Ala tanu ka bɛn ǹa ko ma.