Filipikalu 4 - Ala Ya Salatikan Kula Kitabu

Lailikannu

¹ Wo lɔ saa, ǹ diyanan badenmalu, minu yenlɔɔ yi ǹ na, àilu minu yi ǹ lasawala ka ǹ ɲalɔkɛnɛya, ǹ diyananmɔɔlu, ài lɔgbeleyanin yi to mɔ Tii ya kafonɲɔɔya lɔ.

² Ǹ'i Ewodi ni Sɛndiki madiyala fɔsa ài yi bɛn a lɔ iwo badenmamoso fila mɔ Tii ya kafonɲɔɔya lɔ.

³ Ile fana m̀ baalekɛɲɔɔ sɔvɛ, ǹ'i madiyala, i y'ai madɛmɛn fɔsa ai yi bɛn a lɔ. Kamasɔlɔn moso fila minu vɛ sɛyɛ ǹ fɛ Samakan Kein lasenko lɔ, iwo Kilɛmɛn ni m̀ baalekɛɲɔɔ tɔlu n'a kɛla teme, minu tɔɔ sɛvɛnin niimaya kitabu kɔnɔ.

⁴ Ài yi sawa mɔ Tii ya kafonɲɔɔya lɔ. Ǹ'a fɔla yi ne kɔtunun, ài yi sawa!

⁵ Mɔɔ bɛ y'a lɔn ko ài sɔniyayine, kamasɔlɔn mɔ Tii nalon ma vɛ sulunya.

⁶ Ài do sɔn kà ja ko ko si lɔ, mafɔ ài mako vɛ kɛla ko ko la, ài yi wo dali Ala la, k'a madiya, ani ka balika bɔ a yɛ.

⁷ Wo vɛ kɛla, Ala ya josolajii min timinnin adamadennu ya koɲaye bɛ la, wo kɛtɔ ài josokun ni ài miliya ladalola Masa Tɔɔmasenin Isa ya kafonɲɔɔya lɔ.

⁸ Ka ǹa kuma laban m̀ badenmalu, ǹ'a fɛ ài yi kɛ ài milila ko minu ma, wolu le ne: ko minu yi tuɲa le, magbiliyalikolu, kotelenninu, kosɛnɛyaninnu, kokeinnu, kobɛnninu, ani ko minu ni matɔɔli kaannin.

⁹ Ài na minu kalanna ǹ fɛ, ani ài na minu sɔlɔnna ǹ fɛ, ani ài na ǹ yena minu kɛla, ài y'ài lɔja ka wolu bɛ kɛ. Ado Ala min yi josolajii dila, wo kɛtɔ tola ài fɛ.

Pɔli ya balikabɔ Filipikalu yɛ ka bɛn aiya niilifen ma

¹⁰ Ǹ na sawala bubale mɔ Tii ya kafonɲɔɔya lɔ, kamasɔlɔn ài v'a jiya kɔtunun ko ài gbalayine ǹa ko le. Tuɲa le, bikoma ài gbala ǹa ko le, kɛɛ a see le tɛɛ tɛ ài yɛ bene.

¹¹ Ǹ tɛ min fɔla yi ne k'a fɔ ko m̀ gbalayine, kamasɔlɔn m̀'ɛ a ɲaye ko m̀'ɛ ǹ jɛlɛ yena ko min dakɔlɔ, wo le yi m̀ wasala.

¹² Ǹ ka fandanya ni fentiiya bɛ le lɔn. M̀'ɛ gbonoko min lɔnni bɛ sɔlɔn ka m̀ wasa dingila bɛ ni waate bɛ lɔ, ǹ fanin ka kɛ o, ǹ kɔɔntɔ ka kɛ o, ǹ ka kɛ fentii le o, ǹ ka kɛ bolokolon ne o.

¹³ Ǹ'i sene ko bɛ dɔ kɛla mɔ Tii sabu la min yi fanga dila m̀ ma.

¹⁴ Wo bɛ n'a kɛ, ài gbu n'a kɛ yi la kobɛn, ài na m̀ madɛmɛn mingɛla ǹa tɔlɔya waate lɔ.

¹⁵ Àilu Filipikalu gbu k'a lɔn ne ko ka ta ǹ ka Samakan Kein lase damina m̀ bɔ waate lɔ Masaduwani koovi lɔ, ka bɔ àilu kelenpesa kɔ, limaniyajama dɔgbɛlɛ ma kafon ǹ kɔkan ka ǹa baale nafa sɔlɔn, ani ka m̀ madɛmɛn ai bolofen ne.

¹⁶ Hali ǹ tɛɛ Tɛsalonika so kɔnɔ waate min nɔ, ài ka m̀ makolaɲiafen lana m̀ ma siɲa dana le.

¹⁷ A tɛ k'a fɔ ko ǹ'i samalifen le ɲininna yi ne, mafɔ ǹ'a fɛ a dɔ le yi la àiya koɲuma sala kɔkan.

¹⁸ Ài na fen fen si lanala m̀ ma, ǹ na wo bɛ le yena. Ài na samalifen min donna Ɛpafolodite bolo, wo le na ǹ ɲɛnɛla ka m̀ mako laɲia bubale. Wo kɛyine iwo salaka min suma diyanin, Ala a bolo siila a ladiyanan salaka suu min kɔlɔ.

¹⁹ Ado ǹ Tii Ala kɛtɔ ài mako bɛ laɲiala ka bɛn aa nafolotiiya dafanin ma Masa Tɔɔmasenin Isa ya kafonɲɔɔya lɔ.

²⁰ Tanuli yi mɔ Fa Ala yɛ waate bɛ ani habadan. Amiina.

Folikan labannu

²¹ Ài yi mumininnu bɛ fo ǹ yɛ minu yi Masa Tɔɔmasenin Isa ya kafonɲɔɔya lɔ. M̀ badenma minu yi ǹ dafɛ jan, wolu fana y'ài fola.

²² Jan mumininnu bɛ y'ài fola, masakɛba Sezale ya bon dongolu bɛlɛbɛlɛ le.

²³ Mɔ Tii Masa Tɔɔmasenin Isa ya nɛɛma yi kɛ ài bɛ yɛ.