Filipikalu 3 - Ala Ya Salatikan Kula Kitabu

Telenmandeya min bɔnin Ala fɛ

¹ Ka ǹa kuma laban m̀ badenmalu, ài yi sawa mɔ Tii ya kafonɲɔɔya lɔ. Ǹ tɛɛ vɛ kuma minu sɛvɛ ài ma sɔ, ka seikɔ wolu ma, wo tɛ ǹ ɲana ko le. Wo do kɛtɔ ài matangala.

² Ài y'ài jando ài jɛlɛ lɔ kalanmɔɔ yon wolu kanma, minu faiyanin iwo wulunilu. Ai do yi kɛnɛkɛko kɛla diyanigbeyako le le, ka daafɔɔ bila mɔɔlu falikolo ma fuun.

³ Ǹu koni yi mɔɔ makɛnɛkɛnin bɛlɛbɛlɛ le le, ǹu minu yi Ala batola ka bɛn a Nii Sɛnɛyanin ma, ka mɔ ɲalɔkɛnɛya Masa Tɔɔmasenin Isa ya kafonɲɔɔya lɔ, ani ǹu minu bolomalanin tɛ mɔ jɛlɛkanu falikolo ya kolu ma.

⁴ Ni wo le, ǹ tɛɛ sene m̀ bolomalala ǹ jɛlɛkanu falikolo ya kolu ma feu. Ni mɔɔ mɔɔ v'i milila ko dailu y'a bolo k'a bolomala a jɛlɛkanu falikolo ya kolu ma, ǹ ta dailu walayine wo tii ma ta le.

⁵ Ai na m̀ makɛnɛkɛla ǹ sɔlɔn tele seinna le ma. Bani Isilanka le ǹ ne ka bɔ Bɛnjamin kabila lɔ. Ǹ jilijaa bɛ tɛɛ Hebulu le le. Nabi Musa ya seliya ta fannɔ, ǹ fɛ tɛɛ Falisilu le la.

⁶ Ǹ kunfayine tɛɛ wo la haan fɔɔ ǹ tɛɛ Isa ya limaniyajama jangatala. Ado ni mɔɔ tɛɛ sene ka kɛ telenmande le ka bɛn seliya latelenko ma, ǹ jalakibali tɛɛ tole.

⁷ Kɛɛ ǹ tɛɛ ko ko si yena ǹ nafako le kɔlɔman ne, ǹ'i wolu jatela m̀ bɔnɔko le le butu Masa Tɔɔmasenin ya ko lɔ.

⁸ Tuɲa le, ǹ'i ko bɛ jatela bɔnɔ le le, kamasɔlɔn ka ǹ Tii Masa Tɔɔmasenin Isa lɔn, wo kulugbeleyanin vɛ ko bɛ le. Ale ya ko lɔ, m̀'ɛ bɔnɔ ko bɛ la ka wo bɛ jate iwo ɲama, fɔsa ǹ'i Masa Tɔɔmasenin sɔlɔn,

⁹ ka ǹ kafonnin to a kɔkan. Ǹ tɛ m̀ bolomalala ǹe gbu ya telenmandeya ma min yi sɔlɔnna seliya latelenko fɛ, mafɔ m̀'ɛ a dɔgbɛlɛ sɔlɔn min yi nala limaniya fɛ Masa Tɔɔmasenin ma, wo le Ala ya telenmandeya le min jusiinin limaniya kɔkan.

¹⁰ Min lɔɔ yi ǹ na, wo le ka Masa Tɔɔmasenin gbu lɔn, ani ka seetiiya wo lɔn min na a lawulila ka bɔ saya lɔ, ani ka ǹ kɛ a lankan ne aa tɔlɔyalu lɔ, ka ǹ kɛ iwo ale aa saya lɔ,

¹¹ fɔsa ni a ka kɛ ɲa o ɲa ma, ǹe gbu la yi wuli ka bɔ saya lɔ.

Limaniyamɔɔlu ya bɔli kun

¹² A tɛ k'a fɔ m̀'ɛ se ko bɛ dan ma ka ǹ sala sɔlɔn, niwotɛ ka kɛ mɔɔ dafanin ne ka ban. Kɛɛ ǹ'i ǹ lɔjala ka taa ɲafɛ, fɔsa ǹ'i se kɛla mɔɔ dafanin ne, kamasɔlɔn Masa Tɔɔmasenin na ǹ kɛla a ta le wo le kanma.

¹³ Tuɲa le, m̀ badenmalu, ǹ tɛ m̀ milila k'a fɔ ko m̀'ɛ ban wo bɛ sɔlɔnna. Kɛɛ ǹe do yi ko kelen min ne kɛla: M̀'ɛ ɲina ko kɔlɔlu kɔ ǹ timinnin minu lɔ, ǹ'i ǹ lɔjala ǹ ɲafɛ kolu le ma.

¹⁴ Wo le y'a ma, ǹ'i ǹ lɔjala ka ǹ telen ka se bɔli dan ma, fɔsa Ala na ǹ kilila balayi min ya ko lɔ Masa Tɔɔmasenin Isa sabu la, ǹ'i wo sɔlɔn haijɛnɛ.

¹⁵ Ǹu minu kunkɔlɔ vɛ ta limaniya lɔ, fɔ m'i mili tan ne. Ado ni miliya suu gbɛlɛ ka kɛ ài dɔlu la, Ala kɛtɔ wo le lagbɛla ài yɛ.

¹⁶ Wo bɛ n'a kɛ, mɔ taamanin ka se tɛɛminja, fɔ ài m'i mɔ bolo kɛ wo la ka taa ɲafɛ.

¹⁷ M̀ badenmalu, ài yi kɛ ài sumala m̀ ma, ka mɔɔ wolu lakɔlɔsi minu yi taamana ka bɛn maa misali ma.

¹⁸ M̀'ɛ a fɔ ài yɛ siɲa siyama le, ado ǹ'a fɔla ǹ ɲaji le lɔ yi ne, ǹ ko, mɔɔ siyama le yi je, minu taamaɲa y'a jiyala ko ai vɛ ai jɛlɛ kɛ juulu le Masa Tɔɔmasenin gbaankɔlɔman kanma.

¹⁹ Mɔɔ wolu labantɔ halaki le ma. Aiya noomaya le ai tii le. Ai y'ai jɛlɛ matɔɔla ka bɛn ai lamaloyakolu le ma, ado ai nii lanin dunuɲakolu le kɔkan.

²⁰ Kɛɛ ǹu koni, maa duulenya yi haijɛnɛ le, ado m'i Lakisilikɛba le makɔnɔna ka bɔ je, min kɛnin mɔ Tii Masa Tɔɔmasenin Isa le.

²¹ Ale le kɛtɔ aa seetiiya labaalela, ka mɔ falikolo fangandan jɛlɛma, ka kɛ ale gbu falikolo nɔɔlɔnin suu le, ka bɛn wo seetiiya ma, a yi min labaalela ka fen bɛ kolo a yɛ.