Filipikalu 2 - Ala Ya Salatikan Kula Kitabu

Masa Tɔɔmasenin ya fanmajii ni aa magbiliyali

¹ Damanda ài sɛmɛdonnin Masa Tɔɔmasenin ya kafonɲɔɔya lɔ, ani ài josolajiinin ka bɛn aa kanundeya ma, ani ài ka kɛ kafonɲɔɔya lɔ Nii Sɛnɛyanin fɛ, ani diyaɲɛ ni henandeya ka kɛ ài wotɛ,

² wo vɛ kɛla, ài yi ǹa sawa dafa butu k'ài bɛn a lɔ, ka kanundeya kelen kɛ ài wotɛ, ani k'ài josokun ni ài miliya kɛ kelen ne.

³ Ài kà ko ko si kɛ jɛlɛlafisaya boloma niwotɛ fannɔbaya, mafɔ ài y'ài fanmajii ka dɔlu ta iwo ai fisayanin vɛ ài le.

⁴ Ài kà gbala ài jɛlɛkanu nafakolu le dein, mafɔ ài y'ài mili dɔlu fana ma.

⁵ Miliya min tɛɛ Masa Tɔɔmasenin Isa la, wo suu yi kɛ àilu fana la:

⁶ Ala kɛɲa tɛɛ ale le lɔ, kɛɛ a m'a bolo la wo ma k'a mili ko ale ni Ala lɔkaannin yi to.

⁷ A do k'a kɛɲa wo bɛ to je, k'a jɛlɛ kɛ iwo bɔiden, ka sɔlɔn adamadenya boloma. A ka kɛ mɔɔnivin sawula le mingɛ,

⁸ a k'a fanmajii ka kolo haan fɔɔ ka diɲa saya ma, hali a gbaankɔlɔman gbu ma.

⁹ Wo le n'a kɛla, Ala n'a dalaya kɔlɔtala fen bɛ kunna, ka tɔɔ di a ma min buɲanin tɔɔ bɛ le,

¹⁰ fɔsa ni Isa tɔɔ ka fɔ, dannifen minu bɛ yi sangbolo lɔ, ani duukolo kɔkan, ani duu kɔlɔ, wolu bɛ y'ai kumɛlɛni bila duu ma a kɔlɔ.

¹¹ Ado ai bɛ kɛtɔ ai lɔla a la k'a fɔ ko Masa Tɔɔmasenin Isa le yi Tii le, fɔsa magbiliyali yi kɛ mɔ Fa Ala yɛ.

Limaniyamɔɔlu taamaɲa

¹² Wo lɔ saa, ǹ diyananmɔɔlu, iwo ài deinin tɛɛ Ala kumakan labatola teme ǹ ɲakɔlɔ, wo boloɲa kelen ma, hali m̀ ma kɛ ài fɛlɔ yi ne, ài y'a labato kɔtunun k'a timin a kunfɔlɔ ta la, ka to aiya kisiko dafa ɲaɲininna siyan ni buɲali boloma.

¹³ Kamasɔlɔn Ala gbu yi baalela ài josokun nɔ waate bɛ k'ài ladiɲa a diyanankolu ma, ani ka wolu kɛ see di ài ma.

¹⁴ Ài vɛ ko ko si kɛla, ài kà a kɛ dakɔlɔkuma le niwotɛ sɔsɔyali,

¹⁵ fɔsa ài yi kɛ mɔɔ sɛnɛyanin ni jalakibali le, ani Ala dennu, fɛɛ tɛ minu la, minu siinin bi mɔɔ filinin ni kɔnɔlɔgbolu tɛma. Ài yi kɛ dunuɲamɔɔlu tɛma iwo lolonilu yi mɛnɛnna teme divi lɔ,

¹⁶ k'ài bolo kɛnin to kpekpe niimaya kuma la. Wo vɛ kɛla, Masa Tɔɔmasenin nalon vɛ sena, ǹ ɲalɔ yi kɛnɛyale àiya ko lɔ, kamasɔlɔn ǹa baale ni ǹa sɛyɛ tɛnala kɛla kofuun ne.

¹⁷ Ài limaniyanin teme Ala ma k'àiya ko bɛ di a ma, wo kɛyine iwo salaka min la yi sena Ala ma. Tumadɔ fɔ ǹe gbu jeli yi bɔn àiya salaka kɔkan, iwo fen min yi niila. Wo vɛ kɛla, ǹ kɔnɔ kɛtɔ diyala, ado ǹ'i sawale ài fɛ.

¹⁸ Àilu fana y'ài kɔnɔlɔdiya ka sawa ǹ fɛ.

Timote ni Ɛpafolodite

¹⁹ Ni mɔ Tii Isa ka diɲa a ma, ǹ'a fɛ ka Timote lataa ài ma jona, fɔsa a v'a kɔseila k'ài mangan fɔ ǹ yɛ, ǹ josola yi diya.

²⁰ Kamasɔlɔn mɔɔ gbɛlɛ tɛ m̀ bolo jan min gbalanin àiya ko le bɛlɛbɛlɛ kɛ ka se ale lɔ.

²¹ Dɔ wolu gbalanin ai jɛlɛkanu nafakolu le le. Ai gbalanin tɛ Masa Tɔɔmasenin Isa ya kolu le.

²² Kɛɛ àilu gbu k'a lɔn Timote vɛ aa mɔɔsɔvɛya jiya, ka bɛn a baalekɛɲa ma ǹ fɛ Samakan Kein lasenko lɔ, iwo den ni a fa.

²³ M̀'ɛ ǹa kolu ɲayena kobɛn feeya, ǹ'a fɛ k'a lataa ài ma.

²⁴ Ǹ layine mɔ Tii la k'a fɔ ko a lɔ tɛnala mɛnna butu, ǹe gbu natɔ ài ma.

²⁵ M̀'ɛ m̀ mili ǹ ka kan ka Ɛpafolodite laseikɔ ài ma, ale min yi m̀ badenma le, ani m̀ baalekɛɲɔɔ, ani ǹ kɛlɛkɛdenɲɔɔ, ani àiya keladen fana ka bɛn m̀ mako laɲiako ma.

²⁶ Ài bɛ yenlɔɔ a la, ani a josoladiyanin tɛ kamasɔlɔn ài na aa jangaloko mɛnna.

²⁷ Tuɲa le, a na jangalola bubale. A do tɛɛ sa bolo le ma, kɛɛ Ala ka hena a la ani ǹe gbu, fɔsa a dɔ kana la ǹa josomakasi kɔkan.

²⁸ Wo le y'a ma, ǹ kɔlɔtɔyine a lataako lɔ ài ma, fɔsa ài y'a ye ka sawa, ani ǹe gbu josola yi jii dɔni ne.

²⁹ Wo lɔ, a vɛ sena ài fɛlɔ, ài y'ài bolo sii a kɔlɔ sawa ba boloma mɔ Tii tɔɔ lɔ. A bɛnyine ài yi mɔɔ min suu buɲa,

³⁰ kamasɔlɔn a tɛɛ vɛ to dɔni a tɛɛ sala Masa Tɔɔmasenin ya baaleko lɔ. A do na diɲala saya ma, fɔsa ài dɛsɛnin tɛɛ ǹa baale lɔ tɛɛminja, a tɛɛ wo dafa.