Ɛfɛsikalu 6 - Ala Ya Salatikan Kula Kitabu

Dennilu ni ai wolobalu wotɛko

¹ Dennilu, ài y'ài wolobalu kumakan labato mɔ Tii ɲasiyanɲɛ boloma, kamasɔlɔn wo le bɛnnin.

² A sɛvɛnin kitabu kɔnɔ, ko: «I i fa ni i ba buɲa.» Ala ya seliya kunfɔlɔ le min ne lahedi lanin min kɔkan, ko:

³ «fɔsa i yi hɛlɛ ni sikunnɔjaan sɔlɔn duukolo kɔkan.»

⁴ Falu, ài k'ài dennu lamɔnɛ, mafɔ k'ai lason kobɛn mɔ Tii ya makololi ni kalannu la.

Jɔnnu ni jɔnfalu wotɛko

⁵ Jɔnnu, ài àiya jɔnfalu kumakan labato ɲasiyanɲɛ ni buɲali boloma, ka baale kɛ ai yɛ josolɔgbɛya boloma iwo ài y'a kɛla Masa Tɔɔmasenin gbu yɛ teme.

⁶ Ài kà baale kɛ ka bɛn ai ɲakɔlɔla ma fɔsa àiya ko yi diya ai yɛ teme, mafɔ ài yi Ala sawo le kɛ ài josokun bɛ le, iwo Masa Tɔɔmasenin ya jɔnnu.

⁷ Ài yi baale kɛ kɔnɔlɔdiya boloma, iwo ài yi baale kɛla mɔ Tii gbu yɛ teme, adamadennu ya ko tɛ.

⁸ Ài k'a lɔn ko mɔ Tii kɛtɔ mɔ kelenkelenna bɛ salala, jɔn ni hɔlɔlu bɛ, ka bɛn maa koɲumakɛko ma.

⁹ Jɔnfalu, àilu fana yi wo ɲɔɔzii kɛ àiya jɔnnu yɛ. Ài kà masiyannin kuma fɔ ai yɛ butu, kamasɔlɔn ài k'a lɔn ne ko àilu ni àiya jɔnnu bɛ yi Tii kelen ne kɔlɔ min yi haijɛnɛ. Wo do tɛ lafisayali kɛla.

Limaniyamɔɔlu ya kɛlɛkɛfennu

¹⁰ Ka ǹa kuma laban, ǹ'a fɔla ài yɛ, ài y'ài sɛmɛdon mɔ Tii ya kafonɲɔɔya lɔ ka bɛn aa seetiiya makawanin ma.

¹¹ Ài y'ài masili Ala ya kɛlɛkɛfennu bɛ le, fɔsa ài yi se ài lɔla Soitana ya ko lɔbɛnninu ɲa teme.

¹² Kamasɔlɔn maa kɛlɛ tɛ adamadennu kanma, kɛɛ a yi kuntiilu ni seetiilu le kanma, ani fanga yi minu bolo dunuɲa divi min nɔ, ani fangatii yenbali minu siinin sangbolo dingilalu lɔ koyonkɛ kanma.

¹³ Wo le y'a ma, ài y'ài masili Ala ya kɛlɛkɛfennu bɛ le, fɔsa lon yon vɛ sena, ài yi se k'ài lɔ ài juulu ɲa. Ài do vɛ banna ko bɛ lɔtiminna, ài lɔnin yi to kili.

¹⁴ Wo lɔ, ài y'ài lɔ, ài tɛsilinin vɛ tuɲandeya le, ka telenmandeya kɛ ài sisimakalanfen ne.

¹⁵ Ài lɔbɛnnin yi kɛ Samakan Kein lasenko lɔ min yi josolajii dila, wo yi kɛ ài sennasamala le.

¹⁶ Waate bɛ, àiya limaniya yi kɛ iwo kɛlɛkɛgbɔn. Wo vɛ kɛla Soitana vɛ aa biɲɛ taalamaalu lafilila ài ma, ài yi sene ka wolu bɛ lasa.

¹⁷ Ài yi kisiko kɛ nɛɛ fula le, ka wo bilin ài kunna. Ài yi Nii Sɛnɛyanin ya siyamifan ta, min yi Ala kumakan ne.

¹⁸ Ài yi Ala dali waate bɛ iwo Nii Sɛnɛyanin y'ài lɔla a la teme ka madiyalikan ni dailikan suu bɛ lase a ma. Wo ma, ài y'ài lɔgbeleya k'ài to ài ɲana ka kɛ Ala dalila mumininnu bɛ yɛ.

¹⁹ Ài yi Ala dali ǹe fana yɛ, fɔsa m̀'ɛ m̀ wulila kuma kɛko lɔ, Ala yi kuma don ǹ da fɔsa ǹ'i Samakan Kein gbonoko lase josolagbeleya boloma,

²⁰ ǹe min kɛnin keladen ne ka bɛn wo ma, hali ǹ silinin ka kɛ jɔlɔkɔ la yi ne. Wo lɔ, ài yi Ala dali ǹ yɛ, fɔsa ǹ'i se ka wo lase josolagbeleya boloma iwo ǹ ka kan k'a kɛ teme.

Folikan labannu

²¹ Mɔ diyanan badenma Tisiki, min kɛnin mɔ Tii ya bɔiden sɔvɛ le, ale le kɛtɔ ko bɛ dandɛɛli kɛla ài yɛ, fɔsa ài y'a lɔn ǹa ko yi teme.

²² Wo le y'a ma, ǹ'a lataala ài ma, fɔsa ài yi kɛ maa kolu kalama, ani ài josola yi jii.

²³ Josolajii yi kɛ mɔ badenma bɛ yɛ, ani kanundeya ni limaniya, ka bɔ mɔ Fa Ala ni mɔ Tii Masa Tɔɔmasenin Isa bolo.

²⁴ Mɔɔ minu yi mɔ Tii Masa Tɔɔmasenin Isa kanula kanundeya banbali le, Ala ya nɛɛma yi kɛ wolu bɛ yɛ.