Ɛfɛsikalu 5 - Ala Ya Salatikan Kula Kitabu

Ài yi taama kanundeya boloma

¹ Komi Ala diyanan den ne ài le, wo lɔ, ài yi suma a ma,

² ka taama kanundeya boloma iwo Masa Tɔɔmasenin na mɔ kanula teme, k'a jɛlɛ di maa ko lɔ, iwo salaka sumadiyanin min lasenin Ala ma.

³ Kɛɛ kanukɛko, ni kokɔsɔnin suu suu, ni natabaya, wolu foi tɔɔ kà fɔ ài tɛma, kamasɔlɔn ko wolu bɛnnin tɛ mumininnu ma.

⁴ Ài do kà malobaliya kumalu fɔ, ani kundanya kumalu, ani jɛlɛmako kɔsɔninnu, wolu foi bɛnnin tɛ. Kɛɛ min bɛnnin, wo le ka to balika bɔla Ala yɛ.

⁵ Ài yi gbɛ a ma ko mɔɔ minu yi kanu kɛla, ani kokɔsɔninnu, ani natakolu (min ni joosɔko kaannin), wolu dɔ pa fɛ tɛ Ala ni Masa Tɔɔmasenin ya masaya la.

⁶ Ài kà diɲa mɔɔ mɔɔ y'ài lafili kuma kolonnu le, kamasɔlɔn ko suu wolu le y'a kɛla, Ala ya mɔnɛya yi nala a kumakan labatobalilu kanma.

⁷ Wo lɔ, ài kà la wolu kɔkan feu.

⁸ Kamasɔlɔn waate lɔ, àilu tɛɛ divi le lɔ, kɛɛ tandainɔ ài yi mɔ Tii ya kɛnɛya le lɔ gbesekele. Wo le y'a ma, ài yi taama iwo kɛnɛyalɔ dennu.

⁹ Kamasɔlɔn ɲumaya ni telenmandeya ni tuɲandeya suu bɛ yi nala kɛnɛya le fɛ.

¹⁰ Ài y'ài lɔja ka mɔ Tii ladiyanankolu lɔn.

¹¹ Ko kolon minu yi kɛla divi lɔ, ài fɛ kà kɛ wo foi la, mafɔ ài yi wolu labɔ gbɛ la.

¹² Kamasɔlɔn ai yi ko minu kɛla doon nɔ, wo fɔko gbu yi maloya le le.

¹³ Kɛɛ ko ko vɛ bɔla gbɛ la, wo kɛɲa yi yene.

¹⁴ Ado ko ko la vɛ bɔla gbesekele, wo yi kɛnɛya le lɔ. Wo le y'a kɛla, ai y'a fɔla, ko: «Ile sunɔɔbatɔ, kunun! I wuli, i yi bɔ fulenilu tɛma, ado Masa Tɔɔmasenin kɛtɔ aa kɛnɛya labɔla i yɛ.»

¹⁵ Wo lɔ, ài y'ài jando ài taamaɲa lɔ. Ài do kà taama iwo hangilindannu, mafɔ hangilimalu.

¹⁶ Ala yi waate min dila ài ma, ài y'ài lɔja ka kobɛlɛ kɛ wo waate lɔ, kamasɔlɔn bi lonnu kɛwonyayine.

¹⁷ Wo ma, ài kà kɛ hangilindan ne, mafɔ ài y'ài lɔja ka mɔ Tii sawo lɔn.

¹⁸ Ài k'i fa gbɛ la, kamasɔlɔn wo yi mɔɔ bilala koɲaamininnu le lɔ, kɛɛ ài josola yi fa Nii Sɛnɛyanin la.

¹⁹ Ài i ɲɔɔ sɛmɛdon Zabuli kitabu dɔngililu le, ani baitilu, ani dɔngililu Nii Sɛnɛyanin yi minu dila. Ài yi dɔngililu la ka mɔ Tii tanu ài josokun bɛ le!

²⁰ Ài yi kɛ balika bɔla mɔ Fa Ala yɛ waate bɛ ni ko bɛ lɔ, mɔ Tii Masa Tɔɔmasenin Isa tɔɔ lɔ.

Mosolu ni ai kɛ́nu wotɛko

²¹ Ài fanmajii i ɲɔɔ yɛ Masa Tɔɔmasenin ɲasiyanɲɛ boloma.

²² Mosolu, ài y'ài fanmajii ài kɛ́nu yɛ iwo ài fanmajiinin mɔ Tii yɛ teme.

²³ Kamasɔlɔn kɛ́ yi kuntii le le a moso ma iwo Masa Tɔɔmasenin yi kuntii le aa limaniyajama ma teme, min taanin kɛla a falikolo le, ale gbu le wo Lakisiba le.

²⁴ Wo ma, fɔ mosolu y'ai fanmajii ai kɛ́nu yɛ ko bɛ lɔ, iwo Masa Tɔɔmasenin ya limaniyajama fanmajiinin a yɛ teme.

²⁵ Kɛ́lu, ài y'ài mosolu kanu iwo Masa Tɔɔmasenin na limaniyajama kanula teme, k'a jɛlɛ di aa ko lɔ,

²⁶ fɔsa a aa limaniyajama bila a ta fan a jɛlɛ yɛ, a ban kɔ wo lasɛnɛyala ji le ka bɛn a kumakan ma.

²⁷ A na wo bɛ kɛla fɔsa limaniyajama nɔɔlɔnin yi lɔ a ɲakɔlɔ sɛnɛya ni jalakibaliya boloma, kɔsɔ tɛ min ma, kumatɛ fɛɛ suu suu ma.

²⁸ Wo boloɲa kelen ma, kɛ́lu ka kan k'ai mosolu kanu iwo ai jɛlɛkanu falikolo. Kɛ́ min v'a moso kanula, wo tii n'a jɛlɛ le kanula.

²⁹ Mɔɔ mɔɔ m'a jɛlɛkanu falikolo lagbeyaɲɛ ba bene, mafɔ a v'a balola k'a jando a lɔ iwo Masa Tɔɔmasenin y'a kɛla limaniyajama yɛ teme.

³⁰ Kamasɔlɔn mɔ kelenkelenna bɛ y'a falikolo fan dɔ le le.

³¹ A do sɛvɛnin kitabu kɔnɔ, ko: «Wo le y'a ma, kɛ́ bɔtɔle a fa ni a ba fɛ ka ale ni a moso dɛn, fɔsa ai mɔɔ fila yi kɛ falikolo kelen ne.»

³² Gbonoko ba le min ne, kɛɛ ǹ'i kumala ka bɛn Masa Tɔɔmasenin ni aa limaniyajama le ma.

³³ Wo le y'a ma, àilu kɛ́ kelenkelenna bɛ y'a moso kanu iwo ale gbu, ado moso fana y'a kɛ́ buɲa.