Ɛfɛsikalu 4 - Ala Ya Salatikan Kula Kitabu

Limaniyajama yi bɛn a lɔ iwo falikolo kelen

¹ Ǹe min kɛnin kasoden ne mɔ Tii ya ko lɔ, ǹ'a fɔla ài yɛ k'a magbeleya, ǹ ko, Ala n'ài kilila min kanma, ài taamaɲa yi bɛn wo ma.

² Ko bɛ lɔ, ài y'ài fanmajii, k'ài sɔniya, ani k'ài sawali. Àiya kolu yi kun i ɲɔɔ nɔ kanundeya boloma.

³ Nii Sɛnɛyanin n'ài bɛnna a lɔ teme, ài y'ài lɔja fɔsa bɛn wo yi to ài tɛma ka bɛn josolajii ma min y'ài lakafonna.

⁴ Mɔ bɛ dɛnnin falikolo kelen ne la, ani Nii Sɛnɛyanin kelen, iwo ài kilinin teme jeisii kelen kanma.

⁵ Mɔ Tii kelen ne yi je, limaniya siya kelen yi mɔ bolo ka taa min ma, ado mɔ bɛ makonin ji kɔlɔ tɔɔ kelen wo le le.

⁶ Ala kelen ne yi je, min yi mɔ bɛ Fa le. Ale le yi bɛ kunna, ani ale le yi bɛ fɛ, a do yi bɛ le josokun nɔ.

⁷ Kɛɛ mɔ kelenkelenna bɛ vɛ aa senko sɔli dɔ sɔlɔn ka bɛn aa nɛɛma ma, iwo Masa Tɔɔmasenin n'a jatesiila teme.

⁸ A sɛvɛnin tan ne kitabu kɔnɔ, ko: «A jɛlɛnin sanfɛ ka taa kɛlɛkɔlɔden siyama le, ka sɔlifennu di adamadennu ma.»

⁹ K'a fɔ ko: «A jɛlɛnin,» wo kɔlɔ yi mindɛ le? Wo le, a na jiila fana ka taa duu gboon fannu lɔ.

¹⁰ Wo lɔ, ale min na jiila, ale kelen ne vɛ jɛlɛ haan fɔɔ ka timin sangbolo dan bɛ la poon, fɔsa aa ko yi dunuɲa fan bɛ lafa.

¹¹ Ale le na dɔlu kɛla keladen ne, k'a dɔlu kɛ kela le, k'a dɔlu kɛ Samakan Kein lasenba le, ani k'a dɔlu kɛ limaniyajama kunmafɛlɛnba ni kalanmɔɔlu le.

¹² A na wo kɛla fɔsa a yi mumininnu lɔbɛn Ala ya baaleko lɔ ani ka limaniyajama lasawati, min taanin kɛla Masa Tɔɔmasenin falikolo le.

¹³ Wo do kɛtɔ tola i lɔ haan fɔɔ mɔ bɛ vɛ bɛnna a lɔ ka bɛn limaniya ma, ani ka bɛn Ala Denkɛ ya lɔnni ma, ka mɔ kɛ kɛmɔbalu le, ka se Masa Tɔɔmasenin gbu dafaɲa jate ma.

¹⁴ Wo ma, mɔ tɛnala kɛla dennilu le butu, kɔɔ kilinkilin yi minu lamaamaala, ani fɔɲɛ yi minu lafilinfilinna ka bɛn mɔɔ jateeyaninnu ya lafilikolu ma ani aiya faɲafɔ kalan kaijakaijalu.

¹⁵ Ado mɔ vɛ kɛla tuɲa fɔla kanundeya boloma, mɔ buɲatɔ boloɲa suu bɛ ma Masa Tɔɔmasenin ya kafonɲɔɔya lɔ, ale min yi limaniyajama Kuntii le.

¹⁶ Aa kuntiiya lɔ, falikolo fan bɛ la yi dɛnna k'ai tuun i ɲɔɔ na a tuunɲa bɛ le. Wo lɔ, falikolo fan kelenkelenna bɛ vɛ kɛla a ta baale kɛla a ɲa ma, falikolo lakunnin la yi sawatile kanundeya boloma.

Dajoo kula limaniya lɔ

¹⁷ Ǹ'i min fɔla yi ne mɔ Tii tɔɔ lɔ k'a magbeleya, ǹ ko, ài kà kɛ taamana butu iwo Alalɔnbalilu y'a kɛla teme ai miliya fuun ne.

¹⁸ Aiya koɲaye lɔdiviyine, k'ai majaan Ala ya niimaya la, ka bɛn aiya kolɔnbaliya ni aiya josokunja ma.

¹⁹ Maloya den kelen tɛ ai la butu. Ai do vɛ ai jɛlɛ bila manamanakolu lɔ, ka kokɔsɔnin suu bɛ dɔ kɛ dannatimin boloma.

²⁰ Kɛɛ àilu koni ma Masa Tɔɔmasenin lɔnko kalan wo boloɲa ma!

²¹ Ǹ jii y'a ma le k'a fɔ ko ài na Isa ya ko mɛnna k'ài kalan aa tuɲa la,

²² ko ài y'ài dajoo kɔlɔ dabila, ài tɛɛ min ya siya lataamana kɔlɔkɔlɔ le, min lɔ yi tiɲala ka bɛn a mɔɔmanɛɛ nata yonnu ma.

²³ Kɛɛ fɔ ài nii ni ài hangili ma yi falin ka kɛ a kula le,

²⁴ ani ka dajoo kula ta, Ala na min ladanna a jɛlɛkanu sawula lɔ telenmandeya ni sɛnɛya boloma, minu yi sɔlɔnna tuɲa sabu la.

²⁵ Wo ma yi ne, ài yi faɲafɔ dabila. Ài kelenkelenna bɛ yi tuɲa fɔ ài mɔɔɲɔɔlu yɛ, kamasɔlɔn mɔ bɛ yi falikolo kelen ɲɔɔmalu le le.

²⁶ Ài vɛ mɔnɛla, ài y'alama ài kana julumbu ta. Ài do kà mɔnɛya ladalo haan fɔɔ tele yi ben,

²⁷ niwotɛ ài yi siya dile Soitana ma.

²⁸ Ni mɔɔ mɔɔ ka kɛ son ne, a yi suɲali dabila. A do yi baale nafata kɛ a bolo la, fɔsa fen yi kɛ a bolo dɛsɛbatɔ sɔko lɔ.

²⁹ Ado ài kà diɲa kuma kɛwonnu yi bɔ ài da, mafɔ kuma minu yi se mɔɔlu lasawatila ani k'ai mako laɲia boloɲa dɔ ma, fɔsa ài lamɛnbalu yi nafa sɔlɔn.

³⁰ Ài kà Ala Nii Sɛnɛyanin josomakasi, ale min yi tɔɔmase le ài ma ka bɛn ài kunmaka lon ma.

³¹ Wo lɔ, ài yi josolakuna dabila, ani josobɔ, ani mɔnɛ, ani wɔyɔ, ani tɔɔtiɲali, ani kɔnɔlɔgbeya suu bɛ.

³² Kɛɛ ài yi ɲumaya ni henandeya jiya i ɲɔɔ na, k'ài ɲɔɔ makoto iwo Ala n'ài makotola teme Masa Tɔɔmasenin fɛ.