Ɛfɛsikalu 3 - Ala Ya Salatikan Kula Kitabu

Pɔli ya baale siboloma gbɛlɛ mɔɔlu yɛ

¹ Wo le n'a kɛla, ǹe Pɔli yi Ala dalila ài yɛ, ǹe min kɛnin Masa Tɔɔmasenin Isa ya kasoden ne àilu siboloma gbɛlɛ mɔɔlu ya ko lɔ.

² Ǹ lanin a la ài v'a mɛn Ala na baale min kalifala ǹ na teme aa nɛɛma lɔ ka bɛn ài ma.

³ A na aa gbonoko lankɛnɛmayala ǹ yɛ, iwo ǹ n'a sɛvɛla ài ma teme kuma lɔsulunya boloma.

⁴ Ni ài ka wo kalan, ǹ na lɔnni min sɔlɔnna ka bɛn Masa Tɔɔmasenin ya gbonoko ma, ài yi wo ɲayene.

⁵ Wo do la ma nkɛnɛmaya adamaden timinninu yɛ, iwo a la vɛ lankɛnɛmaya teme butu aa lɔhɔlɔma keladennu ni kelalu yɛ Nii Sɛnɛyanin sabu la.

⁶ Wo gbonoko le min ne: Ka bɛn Samakan Kein ma, Ala yi balayi minu ladalola aa mɔɔlu yɛ, Jahudiyalu ni siboloma gbɛlɛ mɔɔlu kɛtɔ wolu sɔlɔnna kelen ne, k'ai kɛ falikolo kelen ɲɔɔma le, ani k'ai dɛn lahedi la Masa Tɔɔmasenin Isa ya kafonɲɔɔya lɔ.

⁷ M̀'ɛ kɛ Samakan Kein min ya bɔiden ne ka bɛn Ala ya nɛɛma ma, min dinin m̀ ma aa foniseleya baale fɛ.

⁸ Hali ǹ ka kɛ muminin bɛ lɔ dɔɔmandani le, Ala na baale min kalifala ǹ na aa nɛɛma lɔ, fɔsa ǹ'i siboloma gbɛlɛ mɔɔlu kawani ka bɛn Masa Tɔɔmasenin ya nafolo banbalilu ma.

⁹ Ado Dannimasa Ala tɛɛ vɛ jatesiili min doon ka ta waate jaan timinninu ma, ko ǹ'i gbonoko wo lankɛnɛmaya bɛ yɛ,

¹⁰ fɔsa tandainɔ yi ne limaniyajama sabu la, sangbololɔ kuntiilu ni fangatii yenbalilu la yi lɔnni Ala ya hangilimaya suu bɛ la.

¹¹ Wo bɛ ka kɛ ka bɛn aa habadan kolatɛɛnin ne ma, a na min mafala mɔ Tii Masa Tɔɔmasenin Isa fɛ.

¹² Komi mɔ vɛ limaniya a ma ka kafon a kɔkan, a see yi mɔ yɛ ka mɔ madon Ala la wakali ni lanaya boloma.

¹³ Wo lɔ, ǹ'ài madiyala, ài falilɔ kà teeya ka bɛn ǹa tɔlɔyalu ma, ǹ'i minu masɔlɔnna àiya ko lɔ, kamasɔlɔn wolu le kɛtɔ kɛla magbiliyali le ài yɛ.

Isa ya kanundeya

¹⁴ Wo le n'a kɛla, ǹ'i ǹ kumɛlɛni bilala duu ma mɔ Fa Ala kɔlɔ,

¹⁵ kabila bɛ tɔɔ lanin min bolo haijɛnɛ ni duukolo kɔkan.

¹⁶ Ǹ'i Ala dalila a ài sɛmɛdon a Nii Sɛnɛyanin sabu la, ka bɛn aa magbiliyali nɔɔlɔnilu ma,

¹⁷ fɔsa Masa Tɔɔmasenin yi sawati ài josokun nɔ ka bɛn limaniya ma. Ǹ'i Ala dalila kɔtunun, ǹ ko, àiya kanundeya lilen yi don ka bama,

¹⁸ wo vɛ kɛla, àilu ni mumininnu bɛ kɛtɔ fanga sɔlɔnna ka Masa Tɔɔmasenin ya kanundeya buɲa jate lɔn,

¹⁹ ani ka aa kanundeya wo lɔn, min timinnin lɔnni bɛ la, fɔsa àiya ko bɛ da yi fa ka bɛn Ala ya kojatesiininnu dafaɲa bɛ ma.

²⁰ Tanuli yi Ala yɛ, a see yi min yɛ ka ko bɛ kɛ mɔ yɛ ka timin maa daili ni mɔ miliya bɛ la, ka bɛn aa foniseleya ma min yi baalela mɔ lɔ.

²¹ Tanuli y'a yɛ limaniyajama lɔ, ani Masa Tɔɔmasenin Isa ya kafonɲɔɔya lɔ, waate bɛ ani habadan. Amiina!