Ɛfɛsikalu 2 - Ala Ya Salatikan Kula Kitabu

Mɔ vɛ bɔ saya lɔ ka don niimaya lɔ

¹ Waate lɔ, mɔɔ sanin ne tɛɛ ài le ka bɛn àiya hakɛlu ni àiya julumbulu ma,

² ài tɛɛ taamana minu ya siya kɔkan. Wo waate lɔ, ài tɛɛ kuntii kɛwon kɔ, min yi sanfɛ fangatiilu lamalala, ado nii kɛwon kelen wo le yi mɔɔlu labaalela minu tɛ Ala kumakan labatola.

³ Tuɲa le, mɔ bɛ tɛɛ taamana siya kelen wo le kɔkan kɔlɔman ne, mɔ vɛ kolu kɛla ka bɛn mɔ falikolo niikanukolu ma. Ko min lɔɔ tɛɛ vɛ kɛla mɔ falikolo ni mɔ miliya la, mɔ tɛɛ wo le kɛla. Ka bɛn mɔ dajoo minu ma, mɔ tɛɛ vɛ don Ala ya mɔnɛya kɔlɔ, iwo adamaden tɔlu.

⁴ Kɛɛ wo bɛ n'a kɛ, Ala min ya henandeya walanin, a na kanundeya ba le jiyala mɔ la.

⁵ Wo ma, hali mɔ sanin tɛɛ kɛ ka bɛn maa hakɛlu ma, Ala na niimaya dila mɔ ni Masa Tɔɔmasenin ma kelen ne. Ài do kisinin ka bɛn Ala ya nɛɛma le ma.

⁶ Komi m'i Masa Tɔɔmasenin ya kafonɲɔɔya lɔ, wo lɔ, Ala na ǹu ni Isa lawulila kelen ne ka mɔ lasii a fɛ haijɛnɛ dingilalu lɔ.

⁷ A vɛ ɲumaya min jiya mɔ la Masa Tɔɔmasenin Isa fɛ, fɔsa waate natɔlu lɔ mɔɔlu y'a lɔn ko aa nɛɛma buɲayine bubale.

⁸ Kamasɔlɔn ài na kisila Ala ya nɛɛma lɔ limaniya le fɛ. Àilu gbu senko tɛ wo le dɛ, mafɔ Ala ya sɔli.

⁹ A do ma kɛ ài kɛkolu sabu la, fɔsa mɔɔ foi kana se a jɛlɛ matɔɔla.

¹⁰ Kamasɔlɔn Ala baalenɔ le mɔ le, a na minu ladanna Masa Tɔɔmasenin Isa sabu la koɲumakɛko lɔ, fɔsa Ala gbu na koɲuma minu lɔbɛnna mɔ yɛ kɔlɔkɔlɔ le, m'i kɛ wolu kɛba le.

Limaniyamɔɔlu bɛ vɛ kɛ kelen ne

¹¹ Àilu minu sɔlɔnnin siboloma gbɛlɛ falikolo lɔ, ài tɛɛ teme sɔ, ài kà ɲina wo lɔ. Jahudiyalu tɛɛ a fɔla ài ma ko kɛnɛkɛbalilu, k'a talan wolu makɛnɛkɛnin ai falikolo le ma dein.

¹² Wo waate lɔ, àilu ni Masa Tɔɔmasenin wotɛ falanyine tɛɛ. Lona le tɛɛ ài le, minu fɛ tɛɛ tɛ Bani Isilankalu la. Ala na ko minu lahedi tala aa mɔɔlu yɛ aa salatikannu lɔ, ài sen tɛɛ tɛ wo dɔ lɔ. Ài tɛɛ ten ne dunuɲa, jeisii foi tɛɛ tɛ ài la, ado Ala tɛɛ tɛ ài fɛ.

¹³ Kɛɛ komi ài yi Masa Tɔɔmasenin Isa ya kafonɲɔɔya lɔ butu, wo lɔ, àilu minu majaannin tɛɛ Ala la sɔ, ài ma vɛ sulunya a la ka bɛn Masa Tɔɔmasenin jeli bɔnko le ma.

¹⁴ Kamasɔlɔn ale gbu le maa josolajii le, min na mɔ bɛ kɛla kelen ne. A ka lagbeyaɲɛ jiin tiɲa min tɛɛ Jahudiyalu ni siboloma gbɛlɛ mɔɔlu wotɛbɔla. Ka bɛn ale gbu falikolo diko ma,

¹⁵ a ka Jahudiyalu ya seliya ni aa jamali ni kolatɛɛninnu bɛ laben, fɔsa aa kafonɲɔɔya lɔ, siboloma fila yi kɛ mɔɔ kula kelen ne, ka josolajii don ai tɛma.

¹⁶ Aa saya fɛ kɔlɔman ma, a ka siboloma fila ni Ala wotɛbɛn, k'ai kɛ falikolo kelen ne, ka lagbeyaɲɛ ban ai wotɛ.

¹⁷ A do ka na dunuɲa k'ài kawani josolajii la, àilu minu majaannin tɛɛ Ala la, ani ka Jahudiyalu fana kawani josolajii la, minu masulunyanin tɛɛ Ala la.

¹⁸ Kamasɔlɔn Isa sabu la, ǹu mɔɔ suu fila bɛ yi sena mɔ madonna mɔ Fa Ala la ka bɛn Nii Sɛnɛyanin kelen wo le ma.

¹⁹ Wo lɔ saa, àilu siboloma gbɛlɛ mɔɔlu tɛ lona ni kɔɔkanmɔɔ le butu, mafɔ ài vɛ kɛ duulen ne mumininnu fɛ, ani Ala ya bon dongolu.

²⁰ Ala k'ài lɔ k'ài kɛ bon ne min jusiinin keladennu ni kelalu kɔkan, ado Masa Tɔɔmasenin Isa gbu le yi bon wo tungun kawakulun ne.

²¹ Ka bɛn ale le ma, bon wo kawakulunnu yi tuuntuunna i ɲɔɔ na, ka to buɲala, ka kɛ lɔhɔlɔmabonba le, min bilanin a ta fan mɔ Tii Ala yɛ.

²² Isa ya kafonɲɔɔya lɔ, Ala y'àilu fana tuuntuunna bon wo la ten ne, ka kɛ a jɛlɛkanu makɛya le Nii Sɛnɛyanin sabu la.