Ɛfɛsikalu 1 - Ala Ya Salatikan Kula Kitabu

¹ Ǹe Pɔli min kɛnin Masa Tɔɔmasenin Isa ya keladen ne ka bɛn Ala sawo ma, ǹ'i lɛtɛlɛ min sɛvɛla mumininnu ma Ɛfɛsi so kɔnɔ, minu yi lanande le Masa Tɔɔmasenin Isa ya kafonɲɔɔya lɔ.

² Mɔ Fa Ala ni mɔ Tii Masa Tɔɔmasenin Isa ya nɛɛma yi kɛ ài yɛ, k'ài josolajii.

M'i balaka min sɔlɔnna Isa fɛ

³ Tanuli yi Ala yɛ, min kɛnin mɔ Tii Masa Tɔɔmasenin Isa Fa le. Komi mɔ kafonnin Isa kɔkan, Ala vɛ duwawu suu bɛ dɔ kɛ mɔ yɛ haijɛnɛ dingilalu lɔ.

⁴ Jani dunuɲa tɛɛ dan, Ala na mɔ tala ka mɔ ladon Isa ya kafonɲɔɔya lɔ fɔsa m'i kɛ mɔɔ sɛnɛyanin ne ani jalakibali le a ɲakɔlɔ. Kanundeya boloma,

⁵ Ala n'a latɛɛla ko m'i kɛ a jɛlɛkanu dennu le Masa Tɔɔmasenin Isa fɛ ka bɛn a diyanan kolatɛɛnin ma.

⁶ A na wo kɛla fɔsa m'i Ala tanu ka bɛn aa nɛɛma makawanin ma, a na mɔ sɔla min sɔ a diyanan Denkɛ sabu la.

⁷ Mɔ do kunmakanin a jeli bɔnko le fɛ, ani maa hakɛlu lɔ vɛ koto ka bɛn aa nɛɛma dafanin ne ma,

⁸ a na mɔ sɔla min sɔ bɛlɛbɛlɛ kɛ. Ala do vɛ lɔnni ni hangilimaya suu bɛ di mɔ ma,

⁹ ka mɔ lalɔnni aa kojatesii doonnin na, a tɛɛ vɛ min latɛɛ ka bɛn Masa Tɔɔmasenin ma kɔlɔkɔlɔ le.

¹⁰ Aa jatesii le min ne: Waate da vɛ fala, a kɛtɔ sangbolo ni duukolo kɔnɔfen bɛ lakunna, k'ai bɛ bila Masa Tɔɔmasenin ya kuntiiya kɔlɔ.

¹¹ Ala yi ko bɛ kɛla ka bɛn aa jatesiili ni aa kolatɛɛninnu le ma. Wo lɔ, a na mɔ tala ka mɔ kɛ a jɛlɛkanu mɔɔ le Masa Tɔɔmasenin ya kafonɲɔɔya lɔ, iwo a n'a latɛɛla teme kɔlɔkɔlɔ le,

¹² fɔsa ǹu minu na Masa Tɔɔmasenin kɛla mɔ jeisii le kunfɔlɔ le, m'i Ala tanu aa magbiliyali lɔ.

¹³ Àilu fana vɛ limaniya ale Isa ma, ài na tuɲa kuma mɛnna waate min nɔ, min taanin kɛla Samakan Kein ne ka bɛn àiya kisiko ma. Wo lɔ, Ala na Nii Sɛnɛyanin min ya lahedi tala, a na wo lajiila ài kɔkan ka wo kɛ tɔɔmase le,

¹⁴ wo min kɛnin tɔima le mɔ yɛ, haan fɔɔ Ala v'a jɛlɛkanu mɔɔlu kunmakala lon min na, ka balayi di mɔ ma, a na min ladalola mɔ yɛ, fɔsa m'a tanu aa magbiliyali lɔ.

Pɔli ya Aladali Ɛfɛsikalu yɛ

¹⁵ Wo le n'a kɛla, ka ta ǹ k'àiya limaniyako mɛn mɔ Tii Isa ma, ani ài yi kanundeya jiyala teme mumininnu bɛ la,

¹⁶ ǹ'i balika bɔla àiya ko lɔ kudein, m̀'ɛ kɛla Ala dalila ài yɛ.

¹⁷ Mɔ Fa Nɔɔlɔtii, min kɛnin mɔ Tii Masa Tɔɔmasenin Isa Tii Ala le, ǹ'i wo dalila, ǹ ko, a yi hangilimaya di ài ma, ka kolu lankɛnɛmaya ài yɛ fɔsa ài y'a lɔn a ɲa gbugbu ma.

¹⁸ Ala yi ài hangili laka, fɔsa a n'ài kilila jeisii min ya ko lɔ, ài yi wo lɔn, ani ka balayi wala jate lɔn, a yi minu ladalo mumininnu yɛ.

¹⁹ Ala yi ài lalɔnni aa foniseleya makawanin na, a yi min labaalela ǹu limaniyamɔɔlu yɛ. Foniseleya min la yi baalela mɔ lɔ,

²⁰ Ala ka foniseleya kelen wo le labaale, a ka Masa Tɔɔmasenin lawuli waate min nɔ ka bɔ saya lɔ, ka ban k'a lasii a bolokini fannɔ haijɛnɛ.

²¹ A ka a lasii fangatii yenbalilu ni kuntiilu ni seetiilu ni masalu bɛ kunna poon. A do tɔɔ buɲanin vɛ tɔɔ bɛ le minu yi fɔla dunuɲa jan ani kiyama.

²² Ala vɛ fen bɛ bila Isa sen kɔlɔ, k'a lasii limaniyajama kunna,

²³ a falikolo koni, aa ko bɛ dafanin min nɔ, k'a talan ale gbu yi ko bɛ dafala boloɲa bɛ ma.