Kɔlɔsikalu 4 - Ala Ya Salatikan Kula Kitabu

¹ Jɔnfalu, ài àiya jɔnnu lɔmina telenmandeya boloma k'ai ta hakɛ di ai ma. Ài do y'a lɔn ko Tii y'ài la haijɛnɛ.

Lailikan labannu

² Ài y'ài lɔgbeleya Aladaliko ma kudein, ka to ài ɲana, ka kɛ balika bɔla Ala yɛ.

³ Ài yi Ala dali ǹu fana yɛ, fɔsa Ala yi da laka mɔ yɛ a kumakan lasenko lɔ ka bɛn Masa Tɔɔmasenin ya gbonoko ma. Ǹe do yi kaso le la yi ne ka bɛn wo ma.

⁴ Ài yi Ala dali ǹ yɛ fɔsa ǹ'i se ka gbonoko wo lagbɛ iwo ǹ ka kan k'a lase teme.

⁵ Ài yi taama hangilimaya boloma limaniyabalilu tɛma ka waate tɔnɔ bɔ kobɛn.

⁶ Àiya kumafɔɲa yi bɛn ka diya mɔɔlu yɛ waate bɛ, fɔsa ài y'a lɔn ài ka kan ka mɔɔ kelenkelenna bɛ javi teme.

Folikan labannu

⁷ Tisiki, min yi mɔ diyanan badenma ani mɔ bɔidenɲɔɔ sɔvɛ le mɔ Tii ya baale lɔ, wo le kɛtɔ m̀ mangan bɛ fɔla ài yɛ.

⁸ Ǹ na a kelayala ài ma wo le lɔ, fɔsa ài yi kɛ maa kolu kalama, ani k'ài sɛmɛdon.

⁹ Ǹ na Onɛsimu lataala a fɛ fana, min yi mɔ diyanan badenma le ani mɔɔ sɔvɛ, min taanin kɛla ài dɔ le. Ailu le kɛtɔ ko bɛ ɲafɔla ài yɛ minu timinnin jan.

¹⁰ Alisitakusi min yi kaso la ǹ fɛ, wo y'ài fola ani Malɛkɛ, Baanabasi bainkɛ den koni. M̀'ɛ ban ài lɔla ka bɛn Malɛkɛ ya ko ma, ǹ ko, a vɛ nala ài fɛlɔ, ài y'ài bolo sii a kɔlɔ kobɛn.

¹¹ Josuwa, ai y'a fɔla min ma ko Jusitusi, wo fana y'ài fola. Ka bɔ jannɔ Jahudiyalu tɛma, kɛ́ minu kelen ne yi m̀ baaledenɲɔɔlu le Ala ya masaya lasenko lɔ. Ai do vɛ ǹ sɛmɛdon bubale.

¹² Ɛpafalasi, min y'ài dɔ le ani Masa Tɔɔmasenin Isa ya bɔiden, wo y'ài fola. A lɔgbeleyayine Aladaliko ma ài yɛ waate bɛ, fɔsa ài yi lɔjanin yi to, ka sawati, ani ka to hangililatɛɛ lɔ, ka dafa Ala sawo bɛ lɔ.

¹³ Ǹe gbu le sele le ka bɛn aa baale gbɛlɛn ma ài yɛ, ani limaniyajama minu yi Layodiseya ni Hilapolisi solu la.

¹⁴ Mɔ diyanan dɔtɔlɔ Luka y'ài fola, ani Demasi fana.

¹⁵ Ài yi mɔ badenmalu fo mɔ yɛ minu yi Layodiseya so kɔnɔ. Ài mɔ badenmamoso Nimifa fo fana, ani limaniyajama min yi ladɛn kɛla aa bon na.

¹⁶ Ai vɛ banna lɛtɛlɛ min kalanna ài yɛ, ài y'a lataa limaniyajama ma Layodiseya, ailu fana y'a kalan. Ado ǹ na lɛtɛlɛ min lataala limaniyajama ma Layodiseya, fɔ àilu fana yi wo kalan.

¹⁷ Ài y'a fɔ Alisipi yɛ, ài vɛɛ: «Mɔ Tii na baale min dila i ma, fɔ yi wo kɛ k'a dafa.»

¹⁸ Ǹe Pɔli gbu le yi folikan minu sɛvɛla m̀ bolo le. Ài kà ɲina k'a fɔ ko ǹ silinin jɔlɔkɔ le. Ala ya nɛɛma yi kɛ ài yɛ.