Kɔlɔsikalu 3 - Ala Ya Salatikan Kula Kitabu

¹ Ni àilu ni Masa Tɔɔmasenin la vɛ wuli ka bɔ saya lɔ kelen ne, wo lɔ, ài yi haijɛnɛkolu ɲaɲinin, Masa Tɔɔmasenin siinin tɛɛminja Ala bolokini fannɔ.

² Ài k'ài mili dunuɲakolu ma, mafɔ haijɛnɛkolu,

³ kamasɔlɔn ài vɛ sa, ado àiya niimaya ladalonin Masa Tɔɔmasenin ne fɛ Ala ya foniseleya lɔ.

⁴ Masa Tɔɔmasenin min kɛnin àiya niimaya le, wo la vɛ nkɛnɛmayala lon min na, àilu fana nɔɔlɔnin lankɛnɛmayatɔ a fɛ.

Dajoo kɔlɔ ni a kula

⁵ Wo ma, àiya dunuɲa dajoo kɔlɔlu minu y'ài lɔsunna koyonkɛ kanma, ài yi wolu lɔsa: kanukɛko, kokɔsɔninnu, niikanuko, miliya yon, ani natabaya (min taanin kɛla joo batoko suu dɔ le).

⁶ Ko wolu le do kɛtɔ a kɛla, Ala ya mɔnɛya natɔ a kumakan labatobalilu kanma.

⁷ Waate lɔ, àilu gbu tɛɛ taamana wo boloɲa le ma, ài tɛɛ àiya dunuɲalɔtɛɛ kɛla julumbulu lɔ waate min nɔ.

⁸ Kɛɛ tandainɔ yi ne, fɔ ài yi ko minu bɛ dabila butu: josobɔ, mɔnɛ, kɔnɔlɔgbeya, tɔɔtiɲali, ado malobaliya kuma kà bɔ ài da.

⁹ Ài kà faɲa fɔ i ɲɔɔ yɛ, kamasɔlɔn ài vɛ ài dajoo kɔlɔ ni a kɛko kɔlɔlu bɛ to ài kɔ.

¹⁰ Ài do vɛ dajoo kula ta, min ma yi falinna kudein ka kɛ a kula le, fɔsa ài yi wo lɔn bɛlɛbɛlɛ kɛ min na a ladanna a jɛlɛkanu sawula lɔ.

¹¹ Wo le y'a ma, wotɛbɔli tɛ butu Gɛlɛkika ni Jahudiyalu wotɛ, niwotɛ mɔɔ makɛnɛkɛnin ani mɔɔ makɛnɛkɛbalilu, niwotɛ tuukɔlɔmɔɔ ni siboloma ɲamakabalilu, niwotɛ jɔn ani hɔlɔlu, wo foi tɛ jatela. Min yi jatela, wo le Masa Tɔɔmasenin ne dein, a do yi bɛ le josokun nɔ.

¹² Komi Ala n'ài tala k'ài kɛ a diyananmɔɔ sɛnɛyaninnu le, wo lɔ, ài yi dajoo kula ta ka kɛ maɲumande le, ani mɔɔ ɲuma, ani mɔɔ fanmajiinin, ani mɔɔ mafanin, ani mɔɔ sawalinin.

¹³ Ài do sɔn yi kun i ɲɔɔ nɔ, k'i ɲɔɔ makoto. Ni a dɔ ka hakɛ ta a dɔ la, ài ɲɔɔ makoto iwo mɔ Tii n'ài makotola teme.

¹⁴ Kɛɛ min timinnin wo bɛ la, wo le kanundeya le, min kɛtɔ àiya ko bɛ silila i ɲɔɔ ma ka dafa.

¹⁵ Masa Tɔɔmasenin ya josolajii yi sawati ài josokun nɔ, kamasɔlɔn Ala n'ài kilila wo le kanma, k'ài kɛ falikolo kelen ne, ado ài yi kɛ koɲumalɔnba le.

¹⁶ Masa Tɔɔmasenin kumakan yi sawati ài tɛma boloɲa bɛ ma, ài v'i ɲɔɔ kalanna k'i ɲɔɔ lali hangilimaya bɛ la, ani ka Zabuli kitabu dɔngililu la, ani baiti ni dɔngililu Nii Sɛnɛyanin yi minu dila, ka balika bɔ Ala yɛ ài josokun bɛ le.

¹⁷ Ài vɛ ko ko si kɛla, ani ài vɛ kuma suu suu fɔla, ài yi wo bɛ kɛ mɔ Tii Isa tɔɔ lɔ ka balika bɔ mɔ Fa Ala yɛ ale Isa fɛ.

Lailikan ka bɛn bonnakolu ma

¹⁸ Mosolu, ài yi kolo ài kɛ́nu yɛ iwo a bɛnnin teme mɔ Tii ɲakɔlɔ.

¹⁹ Kɛ́lu, ài y'ài mosolu kanu. Ài do kà ko gbɛlɛn sii ài la.

²⁰ Dennilu, ài y'ài wolobalu kumakan labato ko bɛ lɔ, kamasɔlɔn wo le diyanin mɔ Tii yɛ.

²¹ Falu, ài k'ài dennu lamɔnɛ fɔsa ai falilɔ kana teeya.

²² Jɔnnu, ài yi kolo àiya jɔnfalu yɛ ko bɛ lɔ minu y'ài kunna dunuɲa. Ài kà baale kɛ ka bɛn ai ɲakɔlɔla ma dein, fɔsa àiya ko yi diya ai yɛ teme, mafɔ ài yi baale josolɔgbɛya lɔ ka bɛn mɔ Tii ɲasiyanɲɛ ma.

²³ Ài vɛ baale suu suu kɛla, ài y'a kɛ ài josokun bɛ le, iwo ài y'a kɛla mɔ Tii yɛ teme, mɔɔlu ya ko tɛ.

²⁴ Kamasɔlɔn ài k'a lɔn ne ko mɔ Tii yi balayi minu ladalola a jɛlɛkanu mɔɔlu yɛ, ài kɛtɔ wolu le sɔlɔnna ka kɛ ài sala le. Ài do yi mɔ Tii Masa Tɔɔmasenin Isa ya bɔidenya le la.

²⁵ Kɛɛ ni mɔɔ min ka koyon kɛ, wo tii kɛtɔ aa koyon sala le sɔlɔnna, kamasɔlɔn Ala tɛ lafisayali kɛla.