Kɔlɔsikalu 2 - Ala Ya Salatikan Kula Kitabu

¹ Ǹ'a fɛ ài y'a lɔn ko ǹ'i sɛɛ ba min kɛla yi ne àiya ko le lɔ, ani Layodiseyakalu, ani mɔɔ minu bɛ ma ǹ ye ba ai ɲa la bene.

² Ǹ'i wo sɛɛ le la fɔsa ai sɛmɛ yi don, ani ai yi bɛn a lɔ kanundeya boloma, ka lɔnni dafanin sɔlɔn hangilimaya boloma fɔsa ai yi Ala ya gbonoko lɔn, min taanin kɛla Masa Tɔɔmasenin gbu le,

³ hangilimaya ni lɔnni nafololu bɛ doonnin ale le lɔ.

⁴ Ǹ'i min fɔla ài yɛ yi ne fɔsa mɔɔ mɔɔ kana ài majuwaya kuma madiyaninnu le.

⁵ Hali m̀ ma kɛ ài tɛma yi ne, ǹ hangili y'ài kɔ, ado ǹ sawayine kamasɔlɔn m̀'ɛ a ye ko ài bɛnyine a lɔ k'ài limaniyanin to Masa Tɔɔmasenin ma kosɛvɛ.

Niimaya yi sɔlɔnna Masa Tɔɔmasenin ne fɛ

⁶ Komi ài vɛ ài bolo sii Masa Tɔɔmasenin Isa kɔlɔ k'a kɛ ài Tii le, wo ma, ài yi kɛ taamana aa kafonɲɔɔya lɔ,

⁷ k'ài lilen don k'ài bama aa ko lɔ, ani k'ài sawati limaniya lɔ iwo ài kalannin a la teme, ài vɛ balika bɔla Ala yɛ kudein.

⁸ Ài y'ài jando ài jɛlɛ lɔ alako mɔɔ suu suu kana ài kun mina a jɛlɛkanu ya hangilimaya le, k'ài lafili faɲafɔkolu le, minu jusiinin adamadennu ya laanalu kɔkan, ani dunuɲa fangatii yenbalilu, minu tɛ Masa Tɔɔmasenin ta le feu.

⁹ Kamasɔlɔn Ala kɛɲa dafanin sawatinin Masa Tɔɔmasenin falikolo le lɔ.

¹⁰ Àilu fana ya ko bɛ vɛ dafa aa kafonɲɔɔya lɔ, ale min yi kuntii ni fangatii bɛ ya kuntii le.

¹¹ Ài vɛ jii kɛnɛ lɔ aa kafonɲɔɔya lɔ, kɛɛ ài makɛnɛkɛko tɛ mɔɔnivin bolonɔ le, mafɔ Masa Tɔɔmasenin nɔ, min n'ài lafɛlɛla k'ài bɔ ài falikolo ladiyanankolu ya fanga kɔlɔ.

¹² Àilu ni Masa Tɔɔmasenin le sudoonnin kelen ne ka bɛn àiya makoli ma, ado àilu ni ale la ka wuli kelen ne fana ka bɛn àiya limaniya ma Ala ya foniseleya ma, min n'a lawulila ka bɔ saya lɔ.

¹³ Waate lɔ, ài sayine tɛɛ ka bɛn àiya julumbulu ma, ani ài dajoo kɔlɔlu, ài tɛɛ minu la àiya kɛnɛkɛbaliya waate lɔ. Kɛɛ tandainɔ, Ala vɛ niimaya di àilu ni Masa Tɔɔmasenin ma kelen ne, ka maa julumbulu lɔkoto.

¹⁴ Kamasɔlɔn jalaki sɛvɛ min ladannin tɛɛ mɔ kanma ka bɛn maa seliya tiɲako ma, Ala ka wo bɛ laben k'a bɔ je, ka sɛvɛ wo gbaan Masa Tɔɔmasenin gbaankɔlɔman ma.

¹⁵ Wo boloɲa ma, a ka fangatii ni kuntii yenbalilu ya seetiiya tiɲa, k'ai lamaloya bala lɔ iwo kɛlɛkɔlɔdennu, a vɛ seesɔlɔntaama kɛla ai ɲa ka bɛn a gbaankɔlɔman ma.

¹⁶ Wo lɔ, ài kà diɲa mɔɔ suu suu y'ài kiti ka bɛn dɔnnifen ni minnifen ya ko ma, niwotɛ selilon dɔ, niwotɛ kalo kula selilon, niwotɛ Nɔningɛlon ya ko.

¹⁷ Wo bɛ yi ko natɔlu maduulen ne le dein, kɛɛ a bɛlɛbɛlɛ yi Masa Tɔɔmasenin ne le.

¹⁸ Ài kà diɲa mɔɔ suu suu y'ài jobaliya, minu yi faɲafɔ fanmajii kɛla ani ka mɛlɛkalu bato. Mɔɔ wolu yi ko siyama le ɲafɔla, ai vɛɛ ko Ala le na wolu lajɛlɛla ai ɲa ma, k'ai fannɔbuɲa fuun ka bɛn aiya adamadenya miliya ma dein.

¹⁹ Ai tɛ diɲala k'ai fasanin to Masa Tɔɔmasenin ma min yi falikolo kun ne, falikolo bɛ yi balola ka bɛn min ma, ani a fan bɛ dɛnnin min na ka kɛ kelen ne a tuunɲa ni a fasalu fɛ, k'ai to buɲala iwo a diyanin Ala yɛ teme.

Mɔ vɛ sa ka niimaya kula sɔlɔn Masa Tɔɔmasenin ne sabu la

²⁰ Ni àilu ni Masa Tɔɔmasenin vɛ sa kelen ne, ani ài la vɛ fɛlɛ ka bɔ dunuɲa fangatii yenbalilu ya seetiiya kɔlɔ, wo lɔ, mindɛ lɔ ài y'a kɛla iwo dunuɲa ta le ài le, k'ài fanmajii tɔn minu yɛ hali bi, ko:

²¹ «Ài kà min mina! Ài kà min dɔ dɔn! Ài k'ài bolo tuu min na!»?

²² Tɔn wolu yi ko le le minu yi tununna ka ban, ai la vɛ baalela waate min nɔ, kamasɔlɔn tɔn wolu jusiinin adamadennu ya laanalu ni kalannu le kɔkan.

²³ Tuɲa le, tɔn suu wolu bɔnin hangilimaya le la mɔɔlu ɲana ka bɛn ai jɛlɛkanu diina batokɛɲa ma, ani aiya faɲafɔ fanmajiiko, ani ai falikolo minaɲa gbɛlɛn, kɛɛ nafa pa tɛ wolu la falikolo niikanukolu dansiiko lɔ.