Kɔlɔsikalu 1 - Ala Ya Salatikan Kula Kitabu

¹ Ǹe Pɔli min kɛnin Masa Tɔɔmasenin Isa ya keladen ne ka bɛn Ala sawo ma, ǹe ni mɔ badenma Timote le yi lɛtɛlɛ min sɛvɛla,

² k'a lataa mumininnu ma Kɔlɔsi so kɔnɔ, àilu minu tanin kɛla mɔ badenma lanandelu le Masa Tɔɔmasenin ya kafonɲɔɔya lɔ. Mɔ Fa Ala ya nɛɛma yi kɛ ài yɛ, k'ài josolajii.

Tanuli ni duwawu

³ Mɔ vɛ kɛla Ala dalila ài yɛ, ale min kɛnin mɔ Tii Masa Tɔɔmasenin Isa Fa le, m'i balika bɔla a yɛ waate bɛ ka bɛn ài ma.

⁴ Kamasɔlɔn mɔ v'a mɛn ko ài limaniyanin Masa Tɔɔmasenin Isa ma teme ani àiya kanundeya, ài yi min jiyala mumininnu bɛ la.

⁵ Ài yi wo bɛ kɛla ka bɛn ài jeisii le ma, min ladalonin ài yɛ haijɛnɛ. Ài do jii tɛɛ wo le ma ka ta ài na tuɲandeya kuma mɛnna waate min nɔ kunfɔlɔ le, min taanin kɛla Samakan Kein ne.

⁶ Samakan Kein min yi jɛzɛn kan ka jili dunuɲa fan bɛ lɔ, iwo a na kɛla ài tɛma teme, ka ta ài na wo mɛnna lon min na kunfɔlɔ le ka Ala ya nɛɛma ko ɲaye bɛlɛbɛlɛ kɛ.

⁷ Ko wolu kalannin ài bolo mɔ diyanan bɔidenɲɔɔ Ɛpafalasi le bolo. Masa Tɔɔmasenin ya bɔiden lanande le a le, min yi baale kɛla àiya ko lɔ.

⁸ Ale le na mɔ lalɔnnila àiya kanundeya la, Nii Sɛnɛyanin na min donna ài josokun nɔ.

⁹ Wo le n'a kɛla, ka ta mɔ na àiya ko mɛnna lon min na, mɔ ma mɔ nɔningɛ Ala dalila ka bɛn ài ma, fɔsa ài yi Ala sawo dafanin lɔn ka bɛn hangilimaya ni koɲaye suu bɛ ma, Nii Sɛnɛyanin yi minu dila.

¹⁰ Wo vɛ kɛla, ài taamaɲa yi mɔ Tii lasawale, ka diya a yɛ boloɲa bɛ ma, ài vɛ koɲuma suu bɛ dɔ kɛla ka to taala ɲafɛ Ala lɔnko lɔ.

¹¹ M'i Ala dalila kɔtunun k'a fɔ ko a ài sɛmɛdon boloɲa suu bɛ ma ka bɛn aa fanga makawanin ma, fɔsa ài yi se ko bɛ minala ài ma sawali ni josoladiya boloma.

¹² Ài do yi balika bɔ mɔ Fa Ala yɛ, kamasɔlɔn a yi balayi minu ladalola mumininnu yɛ aa masaya lakɛnɛyanin nɔ, a na see dila ài ma fɔsa ài fɛ yi kɛ wo la.

¹³ Ale le na mɔ lakisila ka mɔ bɔ divi ya seetiiya kɔlɔ ka mɔ ladon a diyanan Denkɛ ya masaya lɔ,

¹⁴ wo min na mɔ kunmakala ka maa julumbulu lɔkoto.

Ala Denkɛ le yi fen bɛ kunna

¹⁵ Ale le Ala yenbali sawula le, ani Denkɛ kunfɔlɔ dannifen bɛ kunna.

¹⁶ Kamasɔlɔn fen bɛ ladannin ale le sabu la sangbolo lɔ ani duukolo kɔkan: fen yentalu, fen yenbalilu, masalu, seetiilu, fangatiilu, ani kuntiilu. Fen bɛ ladannin ale le sabu la, ani ale le yɛ.

¹⁷ A tɛɛ je kɔlɔman ne fen bɛ ɲa, ado fen bɛ y'ai nɔ lɔ ale le sabu la.

¹⁸ Ale le limaniyajama falikolo kun ne. Ale le a damina le, ani Denkɛ kunfɔlɔ min wulinin ka bɔ saya lɔ, fɔsa a yi lɔya kunfɔlɔ sɔlɔn fen bɛ kunna.

¹⁹ Kamasɔlɔn a na diya le la Ala yɛ k'a fɔ ko a jɛlɛkanu kɛɲa dafanin bɛ yi to a Denkɛ lɔ.

²⁰ Ado ka bɛn a Denkɛ ma, Ala ka ale ni fen bɛ wotɛbɛn duukolo kɔkan ani sangbolo lɔ, ka josolajii lana a Denkɛ jeli bɔnko fɛ kɔlɔman ma.

²¹ Waate lɔ, ài majaanyine tɛɛ Ala la k'ài kɛ a juulu le ka bɛn ài miliyalu ma ani ài kɛko yonnu.

²² Kɛɛ tandainɔ, a vɛ àilu ni ale wotɛbɛn a Denkɛ falikolo sabu la min sanin, fɔsa ài sɛnɛyanin yi lɔ a ɲakɔlɔ jalakibaliya ni hakɛtabaliya boloma.

²³ Kɛɛ fɔ ài lilen yi don limaniya lɔ k'ài bama. Ài na jeisii min sɔlɔnna Samakan Kein lamɛn fɛ, ài la kà maamaa k'ài mataa jeisii wo la feu. Samakan Kein la vɛ se dunuɲamɔɔ bɛ ma, ado ǹe Pɔli vɛ kɛ samakan min bɔiden ne.

Pɔli ya baale limaniyajama yɛ

²⁴ Wo lɔ saa, ǹ kɔnɔlɔdiyayine ka bɛn ǹa tɔlɔyalu ma àiya ko lɔ, kamasɔlɔn Masa Tɔɔmasenin ya tɔlɔya tɔ min tonin, ǹ'i wo le dafala ǹ falikolo lɔ limaniyajama yɛ, min kɛnin a falikolo le.

²⁵ Limaniyajama ya bɔiden ne ǹ ne, kamasɔlɔn Ala vɛ baale min kalifa ǹ na àiya ko lɔ, ko ǹ'i Ala kumakan dafanin lase ài ma.

²⁶ Wo do kɛnin Ala ya gbonoko le le, a tɛɛ vɛ min doon mɔɔ timinninu ma waate jaan kɔlɔ, kɛɛ tandainɔ a vɛ wo lankɛnɛmaya aa mumininnu yɛ.

²⁷ Ala n'a jatesiila ko k'ai lalɔnni gbonoko wo la, min do makawanin ka gbiliya dunuɲa siboloma bɛ ɲakɔlɔ. Gbonoko wo le min ne: Masa Tɔɔmasenin y'ài josokun nɔ, ale min àiya nɔɔlɔ sɔlɔnko jeisii le.

²⁸ Wo lɔ, m'i Masa Tɔɔmasenin ya ko lasena mɔɔ bɛ ma, k'ai lali, ani k'ai kalan hangilimaya bɛ la, fɔsa m'i mɔɔ kelenkelenna bɛ dafanin lalɔ Ala ɲakɔlɔ Masa Tɔɔmasenin ya kafonɲɔɔya lɔ.

²⁹ Wo ma yi ne, ǹ'i baalela, m'ɛ sɛɛ kɛla ka bɛn Masa Tɔɔmasenin ya fanga bɛ ma, a yi min labaalela ǹ nɔ bɛlɛbɛlɛ kɛ.