2 Timote 4 - Ala Ya Salatikan Kula Kitabu

¹ Ka bɛn Masa Tɔɔmasenin lankɛnɛmayako ni aa masaya ma, ǹ'i jamalila Ala ɲakɔlɔ, ani Masa Tɔɔmasenin Isa min kɛtɔ niimalu ni fulenilu bɛ ya kiti tɛɛla, ǹ ko:

² i yi Ala kumakan kawani ka to wo la waate ɲuma ni waate gbɛlɛnnu lɔ, ka mɔɔlu jobaliya, k'ai makuma, k'ai lali, i vɛ ai kalanna sawali bɛlɛ boloma.

³ Kamasɔlɔn waate dɔ sentɔ, mɔɔlu tɛnala diɲala k'ai tolomalɔ kalan sɔvɛ ma. Kɛɛ ai kɛtɔ bilala ai jɛlɛkanu niikanukolu le kɔ, ka kalanmɔɔ siyama ɲinin ai jɛlɛ yɛ minu kɛtɔ ai tolo ladiyanankumalu fɔla ai yɛ.

⁴ Ai kɛtɔ ai tolo bɔla tuɲa la ka bila faɲafɔ talikulu kɔ.

⁵ Kɛɛ ile koni, i yi kɛ mɔɔ sɔvɛ le kudein, ka tɔlɔya mina i ma, ka kɛ Samakan Kein lasenba le, ani k'i senko bɛ kɛ Ala ya baale lɔ.

⁶ Ǹe koni, ǹ taa waate ma vɛ sulunya. Ǹ jeli yi bɔn bolo le ma, iwo fen min yi bɔnna salaka le Ala yɛ.

⁷ M̀'ɛ kɛlɛ ɲuma kɛ. Ado ǹ tɛɛ bɔli min na, m̀'ɛ se a dan ma ka m̀ bolo kɛnin to limaniya la.

⁸ Wo ma yi ne, telenmandeya jala ladalonin ǹ yɛ, min ditɔ m̀ ma lɔbalon mɔ Tii bolo, min kɛnin kititɛɛba telennin ne. Wo do tɛnala dila ǹe kelen ma, mafɔ mɔɔ minu bɛ jei siinin a nalon na kanundeya boloma.

Jamali labannu

⁹ I i lɔja ka na m̀ ma jona.

¹⁰ Kamasɔlɔn Demasi vɛ m̀ bila ka taa Tɛsalonika so kɔnɔ ka bɛn dunuɲa ladiyaɲɛ ma. Ado Kelesen vɛ taa Galatiya koovi lɔ, ani Tite fana taanin Damatiya koovi lɔ.

¹¹ Luka kelenpesa le yi ǹ fɛ butu. I vɛ kɛla nala, i yi na Malɛkɛ le, kamasɔlɔn nafa y'a la bubale ǹa baaleko lɔ.

¹² M̀'ɛ Tisiki lataa Ɛfɛsi so kɔnɔ.

¹³ Ǹa faaniba min tonin Kalapusi bolo Tolohasi so kɔnɔ, ani kitabulu, i yi na wolu le, saa gbolo kafalu bɛlɛbɛlɛ le.

¹⁴ Alɛzandele min yi siyaki le, wo na koyon siyama le kɛla ǹ na. Mɔ Tii do kɛtɔ a salala ka bɛn a kɛko wolu ma.

¹⁵ Ile gbu i jando i jɛlɛ lɔ aa ko lɔ, kamasɔlɔn a n'i wulila mɔ kumakannu kanma kojuuya.

¹⁶ Ǹ tɛɛ ǹ jɛlɛ kumanɔbɔla kititɛɛya lɔ siɲa kunfɔlɔ le waate min nɔ, mɔɔ foi ma na k'i lɔ ǹ kɔ kɔlɔ. Ai bɛ ka m̀ bilanin to. Ala y'ai makoto ka bɛn wo ma.

¹⁷ Kɛɛ mɔ Tii gbu le n'i lɔla ǹ fɛ ka ǹ sɛmɛdon, fɔsa ǹ tɛɛ se ka aa samakan dafanin lase siboloma gbɛlɛ mɔɔ wolu bɛ ma, ai tɛɛ a mɛn. Wo ma, ǹ ka kisi ka bɔ jala da.

¹⁸ Tuɲa le, mɔ Tii kɛtɔ ǹ lakisila ka m̀ bɔ koyon suu bɛ ma, ka ǹ lakananin ladon aa masaya lɔ haijɛnɛ. Magbiliyali yi ale le yɛ waate bɛ ani habadan. Amiina.

Folikan labannu

¹⁹ Ǹ'i Pisila ni a kɛ́ Akuila fola, ani Onesifɔli ya bonnamɔɔlu.

²⁰ Elasitusi tonin Kolɛnti so kɔnɔ, ado ǹ na Tolofimu tola Milɛtusi so kɔnɔ, kamasɔlɔn a tɛɛ man kɛnɛ.

²¹ I i lɔja, i yi na jani nɛnɛbɔ waate yi se. Yubulusi i fola, ani Pudɛn ni Linusi ni Kolodiya, ani mɔ badenma bɛ y'i fola.

²² Mɔ Tii yi to i fɛ. Ala ya nɛɛma yi kɛ ài bɛ yɛ.