2 Timote 3 - Ala Ya Salatikan Kula Kitabu

Dunuɲa laban waate

¹ I y'a lɔn ko dunuɲa laban waate kɛtɔ gbeleyala.

² Kamasɔlɔn mɔɔlu kɛtɔ gbalala ai jɛlɛkanu kunko le le dein, ka kɛ nataba le wɔliko lɔ, ani wasokɛba, ani mɔɔ kafanin, ani jɛvɛlikɛba, ani kolobali ai wolobalu kanma, ani koɲumalɔnbali, ani Alabuɲabali,

³ ani mɔɔ kataigbɛlɛn, ani henabali, ani tɔɔtiɲalikɛba, ani jɛlɛlɔminabali, ani mɔɔ josolatɛɛnin, ani ɲagbo,

⁴ ani janvande, ani kolakɔlɔsibali, ani mɔɔ fannɔba. Ai jɛlɛ diyabɔkolu le kɛtɔ diyala ai yɛ ka timin Ala ya kolu la.

⁵ Ai do kɛtɔ ai jɛlɛ kɛla mɔɔlu ɲana iwo Alaɲasiyanɲɛmɔɔ, k'a talan ai v'i ban Ala fanga lɔ. I i majaan mɔɔ kaija wolu la feu.

⁶ Kamasɔlɔn ai dɔlu yi donna bonnamɔɔlu tɛma kewuya boloma ka moso hangilindannu kun mina, julumbu doni ba siinin minu kun, k'ai lafili niikanuko kaijakaijalu bolo.

⁷ Moso wolu yi kalan kula le sɔlɔnna waate bɛ, kɛɛ ai tɛnala sena tuɲa lɔnna feu!

⁸ Iwo Janɛsi ni Jambɛlɛsi k'ai lɔ Nabi Musa ɲa teme kɔlɔkɔlɔ le, kɛ́ minu lɔnin tuɲandeya kanma ten ne. Ai do hangili magbasiyine k'ai fo limaniya la.

⁹ Kɛɛ ai tɛnala taala ɲafɛ bakɛ, kamasɔlɔn bɛ kɛtɔ aiya hangilindanya yena gbesekele, iwo a kɛnin Janɛsi ni Jambɛlɛsi la teme.

Lailikan labannu

¹⁰ Ile koni yi ǹa kalanko kalama le feu, ani ǹ taamaɲa, ani ǹa kojatesiininnu, ani ǹa limaniya, ani ǹa sawali, ani ǹa kanundeya, ani ǹ'i kolu minala m̀ ma teme.

¹¹ I do k'a lɔn ǹ na jangata ni tɔlɔya minu masɔlɔnna Antiyɔsi so kɔnɔ, ani Ikoniyɔmu, ani Lisitile. Ǹ na jangata suu siyama le manɔla feu! Kɛɛ mɔ Tii na ǹ lakisila ka ǹ kun bɔ wo bɛ lɔ.

¹² Tuɲa le, a lɔɔ yi mɔɔ minu la ka taama Alaɲasiyanɲɛ boloma Masa Tɔɔmasenin Isa ya kafonɲɔɔya lɔ, wolu bɛ kɛtɔ jangata le masɔlɔnna.

¹³ Kɛɛ mɔɔ yonnu ni wunafalilu koni, a dɔ kɛtɔ tola lala aiya koyon ne kɔkan kudein, ai vɛ dɔlu lafilila iwo ailu gbu lafilinin teme.

¹⁴ Ile koni, fɔ i i bolo kɛ tuɲa la, i na min kalanna ka limaniya a ma, kamasɔlɔn i k'a lɔn i na kalan wo sɔlɔnna mɔɔ minu la.

¹⁵ Ka ta iya denniya waate ma, i vɛ lɔhɔlɔma kitabulu lɔn, minu yi se ka hangilimaya di i ma kisiko lɔ ka bɛn limaniya ma Masa Tɔɔmasenin Isa ma.

¹⁶ Kamasɔlɔn kitabu kɔnɔ kumalu bɛ bɔnin Ala le lɔ, ani nafa y'ai la ka mɔɔlu kalan, k'ai jobaliya, k'ai bila siya ɲuma kɔkan, ani k'ai makolo ka bɛn telenmandeya ma,

¹⁷ min y'a kɛ Ala ya mɔɔ yi kɛ mɔɔ dafanin ne, min yi se ka baale ɲuma suu bɛ dɔ kɛ.