2 Timote 2 - Ala Ya Salatikan Kula Kitabu

Masa Tɔɔmasenin Isa ya sɔdasi ɲuma

¹ Ile ǹ den koni, i i lɔgbeleya Masa Tɔɔmasenin Isa ya nɛɛma lɔ.

² I na kuma minu mɛnna ǹ da sele siyama ɲakɔlɔ, i yi wolu kalifa mɔɔ sɔvɛlu la, minu yi se ka dɔlu fana kalan.

³ I fɛ yi kɛ ǹa tɔlɔyalu la, iwo Masa Tɔɔmasenin Isa ya sɔdasi ɲuma.

⁴ Ni mɔɔ min vɛ donna sɔdasiya lɔ, wo tii ma tɛ gbalala dunuɲalɔtɛɛkolu le, mafɔ a kuntii ladiyanankolu.

⁵ Bɔlikɛba tɛnala jala sɔlɔnna ni a ma bɔli wo seliyalu latelen.

⁶ Sɛnɛkɛba min yi baale gbɛlɛn kɛla, wo le ka kan ka kɛ mɔɔ kunfɔlɔ le k'a ta nii sɔlɔn sɛnɛfen nɔ.

⁷ Ǹ'i min fɔla yi ne, i yi mili wo ma, ado mɔ Tii kɛtɔ koɲaye dila i ma ko bɛ lɔ.

⁸ I hangili yi to Masa Tɔɔmasenin Isa lɔ, Dawuda bɔzɔn, min lawulinin ka bɔ saya lɔ, iwo ǹ'i Samakan Kein kawanili kɛla teme,

⁹ ǹ'i tɔlɔya masɔlɔnna ka bɛn min ma haan fɔɔ ǹ silinin jɔlɔkɔ le tan iwo koyonkɛba. Kɛɛ Ala kumakan silinin tɛ feu!

¹⁰ Wo lɔ, ǹ'i ko bɛ le minala m̀ ma ka bɛn Ala ya mɔɔ taninnu ya ko ma, fɔsa ailu fana yi kisi Masa Tɔɔmasenin Isa sabu la ka habadan magbiliyali sɔlɔn.

¹¹ Kuma min yi tuɲa le le, ko: «Ni ǹu ni ale vɛ sa kelen ne, ǹu ni ale kɛtɔ niimaya kɛla kelen ne fana.

¹² Ni mɔ ka mɔ sawali, mɔ kɛtɔ masaya kɛla a fɛ fana. Ni do mɔ ka mɔ ban a lɔ, ale fana kɛtɔ a banna mɔ lɔ.

¹³ Hali mɔ ka kɛ lanandeyabali le, ale totɔ aa lanandeya le lɔ kudein, kamasɔlɔn a tɛ se a banna a jɛlɛ lɔ.»

Ala ya baaleden ɲuma

¹⁴ Iya mɔɔlu hangili bila k'a magbeleya Ala ɲakɔlɔ ko ai kà sɔsɔyali kɛ ka bɛn kumalu kɔlɔ ma. Sɔsɔyali wo suulu tɛ foi ɲiala, mafɔ ka fitina lana a lamɛnbalu ma.

¹⁵ I i lɔja ka kɛ baaleden ne, Ala diɲanin min ya baale ma, maloya tɛ min na aa baaledalu lɔ, min yi mɔɔlu kalanna tuɲa kuma la kobɛn.

¹⁶ I i jɛlɛ matanga kuma fuunnu ma, minu ni Ala ya siya bɛnnin tɛ i ɲɔɔ ma, kamasɔlɔn wolu le yi mɔɔlu mataala Ala la.

¹⁷ Kuma suu wolu kɛyine iwo daa kɛwon min mɔɔ falikolo dɔnna. Himene ni Filɛti yi wo mɔɔ suu dɔ le le

¹⁸ minu vɛ tuɲa siya bila, ai v'a fɔla ko Fulenilu Lawulilon vɛ ban timinna, ka mɔɔ dɔlu hangili ɲaami aiya limaniya lɔ.

¹⁹ Wo bɛ n'a kɛ, Ala gbu le na bonjusii min lɔla, wo bamayine kpekpe. Kuma minu le sɛvɛnin bonjusii wo kɔkan, ko: «Mɔ Tii k'a jɛlɛkanu mɔɔlu lɔn.» Ani ko: «Mɔɔ min v'a fɔla ko mɔ Tii ta le a le, fɔ wo tii y'a kɔdon telenbaliyakolu la.»

²⁰ Mulan minu yi bon ba kɔnɔ, a bɛ tɛ sanu ni wɔligbɛ le. A dɔlu yi je minu ladannin jili le, ani bɔɔ. A dɔlu yi je magbiliyaliko le kanma, a dɔlu fana yi je kokɔsɔnin ne kanma.

²¹ Ni mɔɔ dɔ k'a jɛlɛ lasɛnɛya ka bɔ kokɔsɔninnu ma, wo tii ma kɛtɔle iwo mulan magbiliyanin min bilanin a ta fan, min nafa y'a Tii yɛ, ani a lɔbɛnnin baale ɲuma suu bɛ dɔ kɛko le lɔ.

²² I i jɛlɛ matanga kavelenya niikanukolu ma, k'i lɔja telenmandeya lataamanko lɔ, ani limaniya, ani kanundeya, ani josolajii, ka la mɔɔlu kɔkan minu yi mɔ Tii tɔɔ kilila josolɔgbɛya boloma.

²³ I yi kolɔnbaliya sɔsɔyali fuunnu to je, kamasɔlɔn i k'a lɔn ne wolu yi nala sɔɔnsɔɔn ne le dein.

²⁴ Mɔ Tii ya bɔiden ma kan ka kɛ sɔsɔyalikɛba le, mafɔ a yi kɛ ɲumayande le le mɔɔ bɛ ma, min yi se ka mɔɔlu kalan k'aiya kolu kun a lɔ sawali boloma,

²⁵ a v'a kɛlɛkɛɲɔɔlu bilala siya ɲuma kɔkan sɔniyali boloma. Tumadɔ Ala kɛtɔ ai madɛmɛnna fɔsa ai y'ai jɛlɛ lasei a ma, ka tuɲa lɔn.

²⁶ Wo vɛ kɛla, ai kɛtɔ kɛla ai jɛlɛ kalama k'ai polokoso Soitana ya sɔɔ la, min n'ai minala a sawonankolu kɛko lɔ.