2 Tɛsalonikakalu 3 - Ala Ya Salatikan Kula Kitabu

Ài yi Ala dali mɔ yɛ

¹ Ka ǹa kuma laban mɔ badenmalu, ài yi Ala dali mɔ yɛ, fɔsa mɔ Tii kumakan yi jɛzɛn falafala ka buɲali sɔlɔn, iwo a na buɲali sɔlɔnna ài bolo teme.

² Ài yi Ala dali ǹu fana yɛ, fɔsa Ala yi mɔ lakisi mɔɔ yon ni kɔnɔlɔgbolu ma, kamasɔlɔn bɛ limaniyanin tɛ.

³ Kɛɛ mɔ Tii yi lanande le le, a do kɛtɔ ài lasawatila k'ài matanga Soitana ma.

⁴ Mɔ lanin ài la mɔ Tii ya kafonɲɔɔya lɔ k'a fɔ ko ài yi taamana ka bɛn maa jamalilu le ma, ani ài kɛtɔ tola wo siya le kɔkan kudein.

⁵ Mɔ Tii y'ài josokun daka Ala ya kanundeya yɛ, ani Masa Tɔɔmasenin ya sawali.

Lailikan ka bɛn baalekɛbaliya ma

⁶ Mɔ badenmalu, m'ài jamalila yi ne mɔ Tii Masa Tɔɔmasenin Isa tɔɔ lɔ, k'a fɔ ko ài y'ài mataa mɔ badenma suu wo bɛ la, minu yi aiya dunuɲalɔtɛɛ kɛla baalekɛbaliya lɔ, ka maa laanalu to je, mɔ n'ài kalanna minu la.

⁷ Àilu gbu k'a lɔn ne gbesekele ài ka kan k'ài suma mɔ ma teme, kamasɔlɔn mɔ tɛɛ ài fɛlɔ waate min nɔ, mɔ tɛɛ tɛ baalekɛbali le.

⁸ Mɔɔ ma dɔnni kɛ mɔɔ foi le fɛlɔ gbaanzan. Kɛɛ mɔ tɛɛ mɔ lɔjala ka baale kɛ su ni tele, alako mɔ doni kana la ài suu suu kun.

⁹ A tɛ k'a fɔ jo tɛ mɔ bolo k'a kɛ ten, kɛɛ mɔ tɛɛ a fɛ ka kɛ misali le le fɔsa ài y'ài suma mɔ ma.

¹⁰ Hali mɔ tɛɛ ài fɛlɔ waate min nɔ, mɔ tɛɛ ài jamalila ko, ni mɔɔ min k'i ban baale ma, wo tii kà dɔnni kɛ.

¹¹ Kamasɔlɔn mɔ v'a mɛn ko ài dɔlu vɛ kɛ baalekɛbali le, minu tɛ ai bolo bilala baalekɛko lɔ, mafɔ dɔlu ya kolu.

¹² Mɔɔ suu wolu koni, m'ai jamalila k'a magbeleya mɔ Tii Masa Tɔɔmasenin Isa tɔɔ lɔ, ko ai lɔja ka baale kɛ josolajii boloma k'ai balo ɲinin ai jɛlɛ yɛ.

¹³ Àilu do mɔ badenmalu, ài kà sɛyɛ koɲumakɛko lɔ.

¹⁴ Mɔ na jamali minu dila lɛtɛlɛ min kɔnɔ, ni mɔɔ min k'i ban wolu ma, ài yi wo tii ma lakɔlɔsi k'ài mataa a la, fɔsa a yi maloya.

¹⁵ Kɛɛ ài kà a ye ài juu le, mafɔ ài y'a lali iwo ài badenma.

Folikan labannu

¹⁶ Mɔ Tii gbu min yi josolajii dila, wo y'ài josolajii waate bɛ, boloɲa bɛ ma. Mɔ Tii yi to ài bɛ fɛ.

¹⁷ Ǹe Pɔli le yi folikan min sɛvɛla yi ne m̀ bolo la. M̀ bolonɔ le ne ǹa lɛtɛlɛ bɛ lɔ, ani ǹa sɛvɛlikɛɲa.

¹⁸ Mɔ Tii Masa Tɔɔmasenin Isa ya nɛɛma yi kɛ ài bɛ yɛ.