2 Tɛsalonikakalu 2 - Ala Ya Salatikan Kula Kitabu

Ala ya seliya tiɲaba

¹ M'a fɛ le ka ko dɔlu lagbɛ butu ka bɛn mɔ Tii Masa Tɔɔmasenin Isa nako ma, ani mɔ lakunɲa a fɛlɔ. Mɔ badenmalu, m'ài madiyala ko

² ni ài k'a mɛn ko mɔ Tii nalon vɛ ban sena, hali ni ai k'a fɔ ko ai na wo mɛnna maa kelayakuma le fɛ, niwotɛ maa kawanili lɔ, niwotɛ maa lɛtɛlɛ dɔ lɔ, wo vɛ kɛla, ài hangili kà ɲaami k'ài lamaamaa telemanin.

³ Ài kà diɲa mɔɔ foi y'ài manɛɛ boloɲa suu suu ma, kamasɔlɔn wo lon tɛnala sena haan fɔɔ mɔɔ siyama vɛ mulutula Ala kanma bene, ani seliya tiɲaba la vɛ nkɛnɛmayala, min kɛtɔ halakila Ala bolo.

⁴ Mɔɔlu y'a fɔla fen fen si ma ko ai tii, ani ai yi fen fen si batola, kɛ́ wo kɛtɔ a wulila wolu bɛ le kanma, haan fɔɔ ka taa don Ala ya lɔhɔlɔmabonba gbu kɔnɔ, k'i sii je k'a fɔ a jɛlɛ ma ko Ala.

⁵ Jalasa ài hangili ma to a lɔ k'a fɔ ko ǹ tɛɛ ài fɛlɔ waate min nɔ, ǹ na wo bɛ ɲafɔla ài yɛ?

⁶ Ài do ka wo lɔn, min y'a dansiila yi ne fɔsa a la yi nkɛnɛmaya a waate bɛlɛ lɔ.

⁷ Tuɲa le, seliya tiɲaba fanga yi baalela yi ne doon nɔ. A do kɛtɔ tola wo la haan fɔɔ a dansiiba yi bɔ a ɲa.

⁸ Wo vɛ kɛla, seliya tiɲaba la kɛtɔ nkɛnɛmayala. Kɛɛ mɔ Tii Isa kɛtɔ wo tii faala a dafɔɲɛ le, k'a halaki a nako makawanin nɔɔlɔ fɛ.

⁹ Seliya tiɲaba wo kɛtɔ nala Soitana ya seetiiya le le, ka faɲafɔko tɔɔmase ni kawananko suu bɛ dɔ kɛ,

¹⁰ ani ka telenbaliya suu bɛ dɔ kɛ ka halakibatɔlu lafili, minu m'ai bolo sii tuɲa kɔlɔ ka tuɲa ladiyaɲɛ min tɛɛ ai lakisi.

¹¹ Wo le y'a ma, Ala kɛtɔ kɔnɔlɔfiliko ba lajiila ai kɔkan, fɔsa ai yi la faɲafɔkolu la,

¹² ka wo kɛ ai bɛ latɔn sabu le, ailu minu ma la tuɲa la, mafɔ ka telenbaliyako ladiyaɲɛ.

Ala n'ài kilila ài lakisiko le lɔ

¹³ Mɔ badenmalu minu ya ko diyanin mɔ Tii yɛ, fɔ m'i kɛ balika bɔla Ala yɛ kudein àiya ko lɔ. Kamasɔlɔn a n'ài tala ài lakisiko le lɔ iwo sɛnɛfenden kunfɔlɔ, k'ài kɛ a ta le Nii Sɛnɛyanin sabu la, ani ka bɛn àiya limaniya ma tuɲa ma.

¹⁴ Ala n'ài kilila wo le lɔ maa Samakan Kein ya kawanili sabu la, fɔsa àilu fana y'ài ta sɔlɔn mɔ Tii Masa Tɔɔmasenin Isa ya magbiliyali lɔ.

¹⁵ Wo lɔ saa, mɔ badenmalu, ài lɔnin yi to kili k'ài bolo kɛ maa kalannu la kpekpe, ài na minu mɛnna mɔ da niwotɛ maa lɛtɛlɛlu kɔnɔ.

¹⁶ Mɔ Tii Masa Tɔɔmasenin Isa gbu ni mɔ Fa Ala, min na mɔ kanula ka habadan josolajii ni jeisii ɲuma di mɔ ma aa nɛɛma lɔ,

¹⁷ wolu y'ài josolajii, ka see di ài ma koɲuma suu bɛ dɔ kɛko lɔ, ài kɛkolu ni ài kumakannu lɔ.